Ai ba kiwei kin iohi ia U Jisu haphi
Ha kine ki sngi Ka pyrthei baroh kawei ka duwai kyrpang shaphang ka jingiatylli ki Kristan baroh kawei. Ka jylla Meghalaya ka don 70.3% ki Kristan bad katno ngi iohlaidluid ha ka jingmane Blei jongngi. Ngim ju phohsniew shaphang ka jingshah thombor ha ki Hindu, Muslim ne kiwei ki kynhun niam kum ba shah kiwei ki khristan sha Kandhamal, Mangalore ne Gujarat. Ka ri Khasi ka long ka ri ba tip briew, tip blei bad ka ba tip burom tip akor. Ngi sngewsarong ba ka ri khasi ka long ka ri baieid kyrpang U Blei bad la don katto katne ki kynhun balang ba la sdang tynrai ha ka ri Khasi jongngi.
U Jisu u hikai ia ngi ba ngin iaieid markylliang. “To ngin iaieid iwei pa iwei namar ka jingieid ka wan na U Blei”, ong u Ioanis ( 1Jn 4:7). Hato ngi ki Kristan ha Meghalaya ngi iaieid ne em iwei ia iwei kumba u Jisu u kwah? Ha ka por ba nga dang kynnah nga la shem kawei ka jingjia ba sngewsih bha ianga kum shaphang ki kristan. La don kawei ka shnong ba don tang shi kynhun balang Kristan bad tang kawei ka iing Catholic. Ha kawei ka sngi la don iwei I briew na ka kynhun Catholic ba la iap. Ynda ki Trai iing ki la mut ban tep ki briew katta ka shong baroh shibalang ki la ia wan bad khang pyrshah ban tep namar ba ki kynnoh ba yn sa wanrah jingsniew ha ka shnong ka thaw. Kita ki trai iing ki la tep la ka tep bad phi tip jia aiu? Hadien shitaiew ki briew katta ka shnong ki la wan sha kata ka iing bad ki la behshnong ia ki. Ym tang katta ki lah phah khlong ia ka met iap bad ki hap ban leit tep noh sha kawei pat ka jaka. Nga tang shu iohsngew iakane ka mynsiem jongnga ka la sngewbitar haduh katta. Ngi khot ialade ki kristan shaei patde kata ka mynsiem Kristan kaba U Jisu u hikai. Kan myntoi aiu iangi ban leit iingmane bad long ki ba leh hok tang sha iingmane hynrei ngim khein briew iala ki marjan marpa? Wat ym long ki pharisi ba shu pynpaw tang shabar hynrei ka dohnud ka dap tang da ka jingjakhlia. Da ka ba ki beh shnong ia kita ki Catholic ki la beh shnong ia U Jisu. Hato U Blei ne U Jisu u dei U Blei tang jong ki Presbyterian, Methodist, Trumpet, Catholic ne jong baroh ki briew? Hato U Jisu u hikai iangi ba ngin iaieid ne ia bishni? Balei ngi iashun para kristan? Phim tip mo ba lada phi iashun para kristan phi iashun bad u Jisu?
Don tang U wei U Blei bad U dei U Blei jong baroh ka jaitbynriew bad jong ki kynhun balang bapher bapher. Ka shong ha ngi ba ngin jied kano kano ka kynhun balang ne ban iaisah ha ka niam u longshuwa manshuwa. Ka Niam kam long ka thong jongngi. Ka thong jongngi ki briew ka long ba ngin ia long kawei bad U Blei. Te ka Niam ka long tang ka nongiarap ne nongkdew lynti iangi ba ngin iajan bad U Blei bad ban ialong kawei bad U. Ko khun Khasi khara lada phi dei na ka niam Khasi, Catholic, Presbyterian ne kano kano ka niam to 'Ngin ia tylli lang Kawei'. Mynta ngi dang iohlaidluid ha ka jingmane Blei jongngi namar ba ngi khambun ki Kristan ha ka jylla. Bun kiwei ki Kristan kum ha China, Pakistan ne wat ha India kim lah ban phla ia la ka jingngeit ne ban leit jingiaseng namar ba ki sha kem bad shah pynshitom bein. Te Lada ngi ki kristan ngim iatylli, husiar bha ioh ba kiwei ki kynhun niam kum ki Hindu, Muslim ne kiwei de kin sa pynlongmraw iangi. To kein ngin iatylli kawei, ngin iaburom parabriew, ngin ym iashun lada ngi iapher ka niam, ngin iarap markylliang namar ba ngi don tang U wei U Blei.
Ko Nongialam, Kmie, Kpa, Samla bad khynnah baroh to ngin rad diengkhong ia ka jingbishni bad jingiashun na ka jaitbynriew khasi jongngi. To ngin long U Jisu baim ha kane ka pyrthei. Aiba kiwei kin iohi ia U Jisu ha ngi iwei pa iwei ym ha ki iingmane, ki dur ne ha ki jaka pilgrim. Lada ngi iashun parabriew ngi iashun bad U Jisu. Lada ngi kren bein para briew ngi kren bein ia U Jisu. Lada ngi lynthem maw ia ki parabriew ngi lynthem maw ia U Jisu. Lada ngi bishni bad ngi kyntait parabriew ngi kyntait ia U Jisu namar ba U Jisu u im ha ngi ki briew. U Paulus u ong ba ngi long ka temple U Mynsiem bakhuid. Te lada ngim khein briew ia ki para briew ngi beh ia U Mynsiem bakhuid ban shong hangi. Hato phi kwah ne em ban kmen, ban ioh jingieid, ban shongsuk, ban phuhsamrkhie bad kumta ter ter. Lada phi kwah te sdang kein ban ai jingkmen, ai jingieid, ai jingsuk, ai jingiaraplem bad ai jingphuhsamrkhie ia kiwei. “Leh ia kiwei kumba phi kwah ia kiwei ba kin leh ia phi”.
Ko khun U Hynniew Trep to ngin beh krat ia ka jingbymiadei jingmut bad ka jingbishni bad ngin ia tylli lang para briew. To ngin iarap markylliang bad ai jaka ia U Jisu ha ka jingim jongngi. Ngi dei ban iaieid para Khasi namar ba “U Blei u long ka jingieid bad namar ba U Blei u la ieid shuwa iangi” (1jn 4:13-19). Dei tang ynda ngi iaieid parabriew kumba ngi ieid ialade U Jisu un sa wan shong sah bad ngi shi junom bad ka ri khasi jongngi kan iatylli lang kawei bad iaineh baroh shirta.
