Ka hukum katkum ka Section 144 Cr.P.C ha SWKHD

Ka ophis jong District Magistrate, South West Khasi Hills District, Mawkyrwat lyngba ka hukum katkum ka Section 144 Cr.P.C. ka pyntip sha u paidbah ka district ba baroh ki dukan, ki iew bad ki ophis kin khang naduh ka shiteng synnia jong ka miet 20 tarik Lber, 2020 haduh shiteng synnia jong ka miet 21 tarik Lber, 2020 bad ruh yn ym shah ia ka jingialum ne jingkynduh briew palat ia ka 5 ngut ha ki jaka paidbah bad kiwei ki jaka ba shabar  na ki iing ki sem jongki.

Ka Sorkar Meghalaya lyngba ka tnad Health and Family Welfare Department ka la pynbna ia ka jingkhanglad ka jingiaid ki kali bad ruh ba baroh ki dukan, ki iew bad ki ophis kin khang naduh ka shiteng synnia jong ka miet 20 tarik Lber, 2020 haduh shiteng synnia jong ka miet 21 tarik Lber, 2020 ha baroh kawei ka jylla kum shibynta ban pyntreikam ia ka jingpynduna ha ka leit ka wan bad ban tehlakam ia ka jingpang Corona Virus.

Kumjuh ruh ka jingpang Novel Corona Virus (COVID-19) ka ba long ka jingpang ba iabit bha ba la pynbna kum ka jingpang ba ktah ia ka pyrthei baroh kawei (pandemic) da ka World Health Organisation (WHO), ka la pur sted sha baroh kawei ka ri ha tang kine ki taiew ba la dep bad ka wanrah jingma ia ka koit ka khiah bad ka jingim jong ki nongshong shnong.

Ka ophis jong I District Magistrate, South West Khasi Hills District, Mawkyrwat ka la pynmih ki jingbtah ban iada ia ka jingsaphriang jong ka jingpang COVID-19 sha ki Syiem, Myntri, Sordar, Mulor, Nongialam Niam, NGOs, Seng Kynthei, Association, ki nongpeit ia ki iew ki hat bad sha u paidbah ban bud ryntih ia ki kyndon ba la buh da ka Sorkar kum ka jingkhang ia ki skul, ka jing pynsangeh noh ia baroh ki jingialang, ki jingiakynduh paidbah, ban kiar na ki jaka paidbah kum ki iew ki hat, ban bud ryntih ia ka jingpynjngai ialade na kiwei pat, jingleh khuid bad ka jingtap ia ka shyntur da ka jain rumal haba jyrhoh ne synriah.

Ka ophis ka la bthah ruh ba baroh ki tourist ba na bar, ki nongwan jngoh kai, ki khynnah skul ki ba wan na bar ka jylla ki dei ban ai jingtip mardor shaphang ka jingpoi jongki sha ka District lyngba u District Helpline Number 108 bad baroh kiba kum kita ki briew ki dei ban pynduna ia ka iaid ka ieng ka jongki bad ba kin shong beit tang marwei ne ha iing (Self isolation) bad ban peit khmieh haduh 14 sngi ba hato ki don ne em ia ki dak ki shin kum ka jyrhoh ne synriah.

La tip ruh ba ka jingpang COVID-19 ka pur lyngba ka jingiadei ne ne jingiakynduh bad kito kiba la ioh ia ka jingpang, watlada ka pyni ne kam pyni ki dak ki shin, te namar katta ka lad jingiada ba bha tam ban khanglad ia ka jingpur sted katei ka jingpang ka long ka jingiajngai parabriew, ka jingpyduna ban kynduh bad ki wei bad ka jing shong beit marwei ha ki jaka sumar (quarantine) jong ki briew ba la suba ba ki don ia katei ka jingpang ioh ki kylla long ki nongpynsaphriang ia katei ka jingpang.

La lap ruh ba ki jaka paidbah kum ki iew, ki jaka jingialang, ki kali kum ki bus, ki sumo bad kiwei ki kali rit (LMVs) ki long ki jaka ba lah ban pur sted bha namar ka jingkhapngiah bad ka jingiajan parabriew.

Ka long ruh ka jingshisha ba bun ka jingrung jingmih jong ki nongleit nongwan, ki khynnah skul hapoh bad shabar ka District ha kine ki artaiew ne shibnai mynshuwa ym lah ban tip bha ia ka rukom leit rukom wan, bad ruh ba ka District ka don ha khapud bad ka ri Bangladesh ba la don kiba ioh pang COVID-19, bad ki iew border ruh ki dang iaid ha kine ki taiew ba la dep lyngba ki iew border (border haat) ne ki jaka khaii ia ki marpoh khyndew ha kaba ki paidbah ki ia rung ia mih bad kumjuh ruh ba ka District ka long kawei na ki jaka jngoh kai ba bun bha ki nongwan peit kai na kylleng ka pyrthei ba juwan ha kine ki aiom jong u snem.

Te i Kong Isawanda Laloo, IAS, District Magistrate, South West Khasi Hills District, Mawkyrwat I la I donkam ban shim ki lad jingiada ia ka jingpur sted bad jingsaphriang jong ka jingpang COVID-19 hapoh ka District da kaba buh ki kyndon bad ki jingbthah jong ka Sorkar Meghalaya, bad ban wanrah ia ka jingtip jong u paidbah shaphang ka jingdonkam kaba jur ban iajngai parabriew (Social distancing) bad ban shong khop hala ki shnong ki shnong ne ki jaka (community isolation) kaba long tang ka lad ban iada ia ka jing saphriang jong ka jingpang COVID-19 bad ka long kaba donkam eh ban buh ia ki jingkhanglad.

Te kumta kum ka jingkhanglad ia ka jingpur sted jong ka jingpang COVID-19 bad katkum ka jingpynkupbor lyngba ka Section 144 Cr.P.C, I District Magistrate I la pynjari ia kine ki kyndon harum:-

1.      Ba ki iew ki hat, ki dukan bad ki jaka jngoh kai ki dei ban khang khyrdep

2.      Baroh ki kali kamai ki dei ban sangeh kamai

3.      Yn ym shah ia ka jingialum ne jingkynduh briew palat ia ka 5 ngut ha ki jaka paidbah bad kiwei ki jaka ba shabar  na ki iing ki sem jongki.

            Kane ka hukum kan ym treikam ia ki pulit, Security Forces, ki Medical team bad ia ka COVID-19 Task Force Members kiba don duty.

            Kane ka hukum kan treikam naduh ka shiteng synnia jong ka miet 20 tarik Lber, 2020 haduh ka shiteng synnia jong ka miet 21 tarik Lber, 2020 bad kan treikam ha baroh kawei ka South West Khasi Hills District. Na ka daw jong ka jingdonkam kaba kyrkieh kane ka hukum kan treikam mardor.

Hukum ka DC ban ai kyrteng bad shong kylluid ha ki kali kamai paidbah

Ka ophis jong I Deputy Commissioner, South West Khasi Hills District, Mawkyrwat ka la pynmih ia kane ka hukum khnang ban iada na ka jingsaphriang bad jingroi sted jong ka jingpang na u Corona Virus. Ka DC ka la bthah ia baroh ki nongleit nongwan shabar ka District bad ki ba shong da ki kali kamai paidbah ba ki dei ban ai kyrteng, address bad phone number jong ki sha u driver uba niah ia ka kali da kaba pyndap ha ki form ba la pynkhreh bad u driver jong ka kali yn hap ban submit ia ka form ba la dep pyndap sha ki Police Check Point kiba don ha Mawkyrwat Police station bad ha Umjarain.

Shuh shuh, ban pynjngai iaka rukom shong khnang ban iada naka jingiabit  iaka jingpang u Corona Virus, baroh ki driver ki dei ban pyntikna ba ka seating capacity jong baroh ki kali kamai hapoh bad shabar ka District ki dei ban bud ia ki kyndon katkum ka MV Act kata kamut ha ki tourist taxi, tang 3 ngut (arngut sha dien, I wei sha khmat bad u driver) bad ha ki Maxi Cap (Sumo, Bolero, Maxx) kan long tang 5 ngut (ar ngut sha dien, ar ngut ha pdeng bad iwei sha khmat bad u driver). Kane ka hukum ka treikam naduh ka 20 tarik bnai March, 2020 haduh ka 31 tarik bnai March, 2020 bad haduh ban da pynbna da kumwei pat.

Ka Jingpyntip Paidbah Shaphang U Corona Virus hapoh SWKHD

Katkum ka Notification kaba wan na u Chief Secretary jong ka Sorkar Meghalaya bad katkum ka jingpynbna jong ka World Health Organisation (WHO) badang shen ba ka jingpur jong ka jingpang COVID-19 (Corona Virus) kum ka Public Health Emergency of Internatinal Concern (PHEIC) namar ka jingiabit sted bad saphriang kylleng ki ri ka pyrthei.

Kumta ka Sorkar Meghalaya lyngba ka ophis jong  I Deputy Commissioner, South West Khasi Hills District, Mawkyrwat khnang ban teh lakam ia ka jingsaphriang ka jingpang COVID-19 (Corona Virus) bad ka lad ban ai jingiada ia ki nongshong shnong ka jylla ka la buh da ki kyndon ban bud pyrkhieng khnang ban iada ia ki nongshong shnong ka jylla kumba la kdew harum:-        

1.      Ki jaka pule hapoh ka District ki dei ban khang khyrdep naduh ka 17/3/2020 haduh ka 31/03/2020. Ki khynnah ki dei ban shong beit hapoh iing bad ban shim jinghikai lyngba ki TV ne ki Internet.   

2.      Lada long kaba lah dei ban pynkynriah noh ia ki exam bad ia ki exam kiba dang iaid shakhmat dei ban pynlong tat ynda la lah ban pynjngai kumba shi meter  iwei na iwei pat I khynnah.

3.      Pynduna ne pynkynriah ia ki jingialang ba bun briew lymda ki long kiba donkam bha. Ha ka juh ka por ia ki exhibition, ki conference, ki workshop, ki jingpynlong dorbar shnong, ki jingialehkai sports, jaka jngi (Swimming pools),  ki mela, jingkhawai, iakop kwai, youth festival, concert programme, prokram jong ki niam bad kiwei kiwei ki dei ban pynsangeh ne pynkynriah shuwa shipor.

4.      Ki Restaurant ne ki dukan sha dukan ja ki dei ban pynthikna ia ka rukom sait kti bad ka jinglehkhuid. Ki dei ruh ban pynthikna ba kawei ka miej na kawei pat kan don ka jingjngai kumba shi meter eiei.

5.      Ha ki  jingiathoh kyntiew kurim ki dei ba pynduna ia ki nongwan shim bynta ha ka jingkhawai lane pynkyriah shuwa lada long kaba lah.

6.      La kyrpad ia ki nongleit nongwan kum na Delhi, Mumbai, Punjab bad kiwei kiwei ki jaka ba  shah ktah ha u Corona Virus ba ki dei ban pyntip mar mar sha ka ka ophis jong I Deputy Commissioner lyngba une u helpline number +91-9485395373. Kumjuh ruh la kyrpad ia ki nongleit nongwan shabar jong ka State ba kin sangngeh shuwa shipor lada long kaba lah.

7.      La kyrpad ia ki nongshong shnong kiba wan na bar jylla ha ka shibnai mynshuwa ba kin contact ia u District helpline number +91-9485395373 bad kumjuh ia ki khynnah pule kiba wan shuti ban pyntip kumjuh da kaba khmih bniah iala ka jong ka koit ka khiah bad ban shongkhop ha iing katba lah.

8.      La kyrpad ia ki paidbah ba kin leh khuid bad kiar na ka ba biah pathar ne bynthiew bad ban da tap bha da ka jain rumal ne tissue paper haba ki synriah ne jyrhoh.

9.      La kyrpad ia kito ki nongleit nongwan da ki kali paidbah ba kin shimkhia ban sumar bha bad  ynda ki la poi ha ki dei ban da sum da sait bha. La kyrpad ruh ba kin sngewbha ban kiar na ki jaka paidbah kum ki iew bad kiwei kiwei. 

10.  Ki jaka jngoh kai ki dei ban buh da ka por bad ban ym tam ia ka 50 ngut ki nongleit nongwan ha ka juh ka por.

11.  Ha ka juh ka por la kyrpad ia ki Nongialam jong ki niam bapher bapher, ki rangbah shnong, bad kiwei kiwei ba kin ia trei lang khnang ban lah ban teh lakam na ka jingphriang jong kane ka jingpang.