Plie u Additional DC, ïa ka ‘Swachhta Hi Seva’ ha South West Khasi Hills District

Mawkyrwat, ‘Nailur 16: U Additional Deputy Commissioner, South West Khasi Hills District, u bah S.C. Laloo, MCS, mynta ka sngi u la plie ïa ka ‘Swachhta Hi Seva Campaign’ kaba mut ‘ka jinglehkhuid ka kamram jong ngi’ hapoh ka Hall O/o jong u Executive Engineer PHE, Mawkyrwat bad ka dei ka campaign ba kum ka ophis jong u Executive Engineer, PHE Mawkyrwat Division-cum-Member Secretary, District Swachh Bharat Mission kan pynlong ïa ki prokram bapher bapher ha kaba ïa dei bad ka jingïashimbyntalang da ki shnong ki thaw bad da kaba pynlong ïa ki cleaning drives, pick and walk, rally, slogan completion bad kiwei kiwei ki program kiba ïa dei bad ka khuid ka suba.

            Na ka liang jong u, bah S.C. Laloo, MCS u ba dei u kongsan ha kane ka sngi u la ai ka jingbatai khyndiat ba kane ka ‘Swachhta Hi Seva’ ka ïa dei ruh kum ka Jal Jeevan Mission kaba dei ban pynbiang ïa ka umbam umdih sha ki rympei ïing baroh kiba don hapoh jong ka Ri India kaba ïar. Haba bynrap ïa ka jingkren, u la pynpaw ruh ka jingsngewkmen ba u la ïoh ban don bynta lang ha kane ka sngi khamtam eh ban don bynta ha ka ban plie ne launch ïa ka ‘Swachhta Hi Seva’ hapoh kane ka South West Khasi Hills District kaba long kawei na ki program ban pynsngewthuh ha ki paidbah halor ka jinglehkhuid.

            Haba kren halor ka ‘Swachhta Hi Seva’ u la ong ba kane ka dei kawei na ki jingïohi jngai jong u Myntri ba Rangbah duh jong ka Ri India, u Narendra Modi ha kaba ka la don ruh shibun ki jingïakren, ki jingïatai-nia bad ki jingmir jingmut jong ki heh jong ka pyrthei baroh kawei bad wat haduh ka Dorbar bah jong ka United Nation Organisation (UNO), namar kane ka pyrthei ba ngi shong ngi sah mynta ka don hapdeng ka jingma ba ki briew ha kane ka juk ba ngi im ki la don bun eh kiba pyndonkam da ki jingkynja plastik bad ha ki duriaw lei lei ki la dap haduh 40% jong ka jingdon ki plastik. Kumta lada kane ka jingbun jong ki plastik kan dang ïai bteng ha ki duriaw, ha ki jaka sor ne jaka nongkyndong sa 5 ne 10 snem kiba bun ki briew kin sa ïoh ïa ki jingpang kiba khyllah.

            U la pynpaw ka jingsngewnguh ïa ka sorkar India ba lyngba kane ka ‘Swachhta Hi Seva’ ka long ka jingkhot ïa ki paidbah nongshong shnong jong ka Ri India ba kin nang kumno ban leh khuid ïa ki sawdong ki sawkun bad ymdei tang ka jingleh khuid hynrei lada lah lei lei pynduna na ka jingpyndonkam ïa ki plastik. U la ai jingmut ruh na ka bynta ki nongshong shnong jong ka distrik ba kim dei ban shu hun ban long ki nongpeit kai ïa ki jingjaboh jong ki lynti ki synkien, hynrei dei ban pynbeit da ki kynja program shi sien ha ka shibnai ban ïa pynkhuid ïa ki sawdong ki sawkun jong ki shnong ki thaw khnang ban wanrah ïa ka khuid ka suba bad khamtam eh ïa ka koit ka khiah jong ki paidbah.

            U la pynkynmaw ruh ba kam biang tang ban pynkhuid tang ïa lade, ïa la ki jong ki ïing ki sem ne ki phyllaw ïing la jong, hynrei kaba donkam ka long ba dei ban hikai naduh na la rympei ne ïa ki paidbah nongshong shnong ban leh khuid ruh de ïa ki sawdong sawkun.

            U la ai ruh ka jingïaroh ba da ka jingdon jong ki jaka ba pyngngad ha kane ka distrik ka la wanrah shibun ki jingmyntoi khamtam eh ban ïoh ban ring mynsiem ïa ka lyer kaba khuid. Kumta ka long kaba donkam ba kin pynneh pynsah ïa kane ka lyer kaba khuid kaba suba bad ymdei ban pynjakhlia noh ïa ka da kaba bret pathai ïa ki plastik ne ki jakhlia ha ki um ki wah, ne pom pathar ïa ki dieng ki siej hynrei dei ban tyngkai ïa ki ha ka rukom kaba dei.

            Haba kren shaphang ka jingpynpoi um ha ki longïing lyngba ka Jal Jeevan Mission ne JJM, u bah S.C. Laloo, MCS u la pynkynmaw ruh ba ki shnong kiba la dep ban ai na ka bynta ban ring um lyngba ka kane ka skhim haduh mynta ki don haduh 5522 tylli ki longïing na ka 21,816 jong ka jingdon jong ki longïing hapoh jong ka distrik baroh kawei bad kane ka jingjop ka dang la long tang 25% bad la khmih lynti ba ha kine ki sngi ki ban sa wan ynsa lah ban pyndep katkum ka por ba la buh.

            Namarkata, u la buh ka jingkyrpad ïa ki paidbah nongshong shnong jong ka distrik hi baroh kawei ba kin don ka jingïatreilang bad ki bor sorkar ban wanrah ïa ka khuid ka suba jong ki sawdong sawkun bad ymdei ban shu don tang ka jingïakawang ktieh ne jingkhñium iwei ïa iwei pat.

            Ïa ka program la pynïaid da u bah Shekborlin Shiangbai, SBM Mawkyrwat Block bad bud sa ka jingkren na u Executive Engineer PHE, Mawkyrwat Division-cum-Member Secretary, District Swachh Bharat Mission, u bah S. Snaitang. Ka presentation halor ka ‘Swachhta Hi Seva’ na u Pynjanai L. Thongni, District Co-ordinator, DSBM (G), ka jingrwai kyrpang na ka kynhun Ïonglajong bad ka jingkren aikhublei na u bah Bakhrawbor Lyngkhoi, Accountant, DSBM (G).

Shongshit ka jingiakop pynmih ia ki jingbam teimet (recipe competition on nutritive food for pregnant women) ha Mawlangwir

Mawkyrwat, 'Nailur 16, 2021: Ka ophis jong ka Child Development Project Officer (CDPO), ICDS Project, Mawkyrwat mynta ka sngi ka la pynlong ia ka ‘Jingiakop pynmih bam tei met (Food recipe competition on nutritive food) na ka bynta ki longkmie ba armet’ ba la pynlong hapoh Indoor Mini Stadium, Mawlangwir ha kaba la iashim bynta da ki longkmie ba armet, ba aibuin khun, ki theilud, ki Self Help Groups, ki nongtrei Anganwadi bad ki ASHA jong ka shnong Mawlangwir.

Ha ba kren ha katei ka sngi ka kong B. Nengnong, DPO, ICDS Cell, Nongstoin, West Khasi Hills District ka la ong ba ka jingrakhe ia ka POSHAN MAAH kaba la sdang naduh 2018 ka long shibynta jong ka POSHAN Abhiyaan. Ka la bynrap ruh ba u POSHAN MAAH u dei u bnai ba ju pynkynmaw ban peit ia ka jingheh jingsan ba pura jong ki khun ki kti, ka jingsumar bha ia ki longkmie ba armet bad ba dang aibuin khun. Ka la iathuh ba ka sorkar ka ai ki jingbam bynrap (Supplementary Food Programme) lyngba ki Anganwadi centre ban iarap ia ki khun ki kti, ki longkmie ba armet, ki theilud bad ki tymmen ki kro kumjuh ruh ban kyntiew ia ka jingheh jingsan bad jingkoit jingkhiah. Ka la pynshai ruh ba ka long kaba donkam bha ban thew ia ki khynlung khynnah ban tip ia ka jingheh jingsan (nutritional status) jongki, kumjuh ruh ban tip ba hato ki hap ha ka rong jyrngam, rong stem ne rong soh. Lada ki hap ha ka rong jyrnagm kamut ba ki khun ki koit ki khiah, lada ki hap ha ka rong stem ki khun ki donkam ia ka jingpeit bniah jong ki kmie ki kpa bad ki anganwadi bad lada ki hap ha ka rong soh katta ka mut ki don ka jingshitom bad ki anganwadi ki dei ban kyntu ia ki kmie ki kpa ba kin leit mar mar sha ki hospital ne PHC ban ioh jingsumar ba bniah. Ka la bynrap rap ruh ba “Khnang ba ka iing ka sem, ka shnong ka thaw, ka jaitbynriew bad ka jylla hi baroh kawei kan long ka ba koit ba khiah ka long kaba donkam ia ka jingiatreilang jong baroh. Ka la ban ruh ba ki longkmie ki dei ban iatreilang bad ki Anganwadi ha ka por ba ki leit jngoh iing (home visit) bad haba ki kyntu ia ki ba kin leit ai ia ki tika bapher bapher na ka bynta ka jingbha jong ki khyllung bad ki longkmie. Kumjuh ruh kyntu ia ki longkmie ba armet ki dei ban bam bha, dih tista ia u  dawai Iron Folic Acid bad ban leit check up na ka por sha ka por. Ka la ong ba ka jingsumar bha ia ki khyllung. Ka la kren ruh halor ka phang “ka jingdonkam jong ka 1000 sngi ha ka jingim jong ngi ki briew” katta naduh ba dang pun haduh ba I khyllung yn dap 2 snem ka rta. Ka la pynkut da ka ba kren halor ki kper rep jhur ha kyrpong iing (Poshan Vatika) bad kyntu ia ki Anganwadi bad ki longkmie baroh ba kin shimkhia khnang ban ioh ki jhur ba lait na ki dawai bad kiba plung bha. Ka la ong ba ka jingbam ia ki jingbam tynrai bad ba thung hi ki long kiba tei met bad ba don bun ki jingdonkam jong ka met.

U Bah P. Snaitang, Superintendent jong ka Food & Supply, Nonstoin u ba dei  u nongpeit ia ka Mawkyrwat ruh u la ong ba ki jingbam ba ngi bam mynta ki long ki jingbam ba la bun ka dawai te namar katta ka jingrep ia ki jhur ha ki kper kyrpong iing ka long kaba donkam bha. U la batai halor ka jingdonbynta jong ka tnad Food & Supply, ICDS bad Education ban pynpoi ia ki jingbam ba teimet ban kyntiew ia ka koit ka khiah jong ki paid nongshongshnong. U la iathuh ruh shaphang ka skhim National Food Security Act, 2013 (NFSA) kaba sam ia u khaw Antyodaya Anna Yojana (AAY) sha ki longiing ba duk bad ia u khaw Priority HouseHolder (PHH) sha ki longiing ba kham bit kham biang. U la kyntu ruh ia ki riewkynthei ne longkmie ba la dap 18 snem ka rta shajrong ba kin shim ia ka skhim Pradhan Mantri Ujjwala Yojana 2.0 na ka bynta ban ioh jingrap ha kaban pyndait ei ia ki LPG ha ki iing ki sem jongki. U la pynkut da kaba ong ba ki longkmie ba armet, kiba aibuin khun, kiba don ki khyllung ba hapoh 6 snem ka rta bad ki theilud ki dei ban pyndonkam bha bad bam tista ia ki jingbam ba ai napoh ICDS lyngba ki Anganwadi centre namar ki long ki jingbam ki ba bha tam ban tei ia ka met ka phat bad ban ioh ka met ba koit ba khia krta bha.

Ha katei ka prokram ‘Jingiakop pynmih bam tei met (Food recipe competition on nutritive food) na ka bynta ki longkmie ba armet’ ka la don ruh ka jingsam ia ki jingbam tei met ha san (5) tylli ki longing, la ai khusnam ruh sha ka ka Anganwadi centre na Pyndenumsaw-3 ka la ioh ia ka khusnam kum ka Anganwadi centre ba don ia ka kper rep jhur kaba bha tam, ka Anganwadi Centre na Mawlangwir-6 ka la ioh ia ka khusnam kum ka Anganwadi centre kaba khuid tam. Ha ka jingiakop pynmih bam ba shongshit bha ka Pynroilang SHG ka la ioh ia ka khusnam lahduh, ka Anganwadi Centre Mawlangwir-1 ka la ioh ia ka kyrdan ba-ar (2), bad ka Anganwadi Centre Mawlangwir-5 ka la long ba-lai (3). Ha katei ka prokram ba la pyniaid da ka kong H. Sahkhar, CDPO, ICDS Project Mawkyrwat, ka kong T. Wanniang, Lady Supervisor ka la ai ki kyntien ai khublei bad ka kong M. Lyngkhoi, Block Project Assistant, Poshan Abhiyan ka la ai ia ki kyntien ai khublei.

Muja ki khynnah rit ban leh YOGA ha ka jingrakhe ia ka POSHAN MAAH ha ka shnong Pyndenumsaw

 

Mawkyrwat, ‘Nailur 14, 2021: Kum shibynta jong ka jingrakhe ia u bnai POSHAN ka ophis jong ka Child Development Project Officer, Mawkyrwat mynta ka sngi ki la pynlong ia ka jinghikai bad jingleh YOGA na ka bynta ki khynnah bad ki longkmie ba la pynlong ha ka madan jong ka Pyndenumsaw Govt. RCLP School.

U bah D. Kyndiah, AEE, PWD (Rd) Nonghyllam Sub-Division bad Member Art of Living, Jowai u ba ai jinghikai bad ialam ia katei ka prokram YOGA u la ong ba ka YOGA ka long kaba donkam eh ha ka jingim jongngi namar ba ka pynlong kawei ia ka met jingmut, ka jingmut jingpyrkhat bad ka mynsiem. U la bynrap ruh ba ka YOGA ka pynlong ia ka met, ka jingmut jingpyrkhat bad ia ka mynsiem jongngi ba kan khiah krat bha bad ngi lah ban pyndep bha ia ki kam ki jam jongngi ha ryngkat ka jingkmen bad jinghun ka mynsiem.

Ka kong H. Sahkhar, CDPO, ICDS Project, Mawkyrwat ka ba la pyniaid ia katei ka jingialang ka la pynshai shaphang ka jingmut YOGA da kaba ong ba ka dei rukom kilan met (exercise) kaba kaba kynthup naduh ka jingring bad pynhiar mynsiem, ka jing leh meditation, ka jingpynkhih ia ka met ka phat jongngi ha ki rukom bapher bapher bad kaba pynlong discipline ia ka jingim jongngi. Ka la ong ruh ba kane ka jingle YOGA kadei kawei na ki bynta ba kongsan ha ka jingrakhe ia ka POSHAN MAAH namar nalor ka jingbam ia ki jingbam tei met ka jingkilan met ban ioh ka met ba khiah krat bha ka long kaba donkam bha. Ka la bynrap ba ka ICDS ka ai ki jingbam bynrap nalor ki jingbam ba ngi ioh na iing man ka sngi khnang ba ki khyllung ki heh kin plung bha bad kin iohlut ia ki jingdonkam ka met katba ki dang heh dang san. Ka la ban ruh ba ka YOGA ka long kaba donkam eh ia ki khynnah ban pynkhih ki kti ki kjat, ban ring bad pynhiar mynsiem bad ban aibor ia ka mynsiem jongki khnang ba kin long kiba khiah krat bha.

Haba kren ha katei ka sngi u Bah K. Marwein, Myntri Shnong Pyndenumsaw u la iathuh ba ka shnong Pyndenumsaw ka don kumba 300 tylli ki longiing bad 4 tylli ki Anganwadi Centre. U la pynpaw ba ka jingdon ki Anganwadi Centre hapoh ka shnong ka long ka jingiarap kaba kraw ia ki khyllung khynnah, ia ki longkmie ba armet bad ia ki longkmie ba dang aibuin. U la ong ruh ba ka tynrai jong ka jingpule puthi ka sdang na ki Anganwadi centre bad ki jinghikai na ki Anganwadi Centre ki long kiba janai bad kiba pynsngewtynnah bha ia ki khynnah.

Ha katei ka prokram ka kong T. Wanniang, Lady Supervisor ka la ai ia ki kyntien pdiang sngewbha bad ka kong M. Lyngkhoi, Block Coordinator, POSHAN Abhiyaan ka la ai ia ki kyntien ai khublei.