********KHUBLEI******** ******** *********KHUBLEI******** ******** *********KHUBLEI***********

********WELCOME******* ******** ********WELCOME******* ******** ********WELCOME********

******** स्वागत हे/ SVAAGAT HE******** ******** ******** स्वागत हे/ SVAAGAT HE****************

WELCOME DEAR VIEWERS....

1. Do you want to enjoy and relax yourselves then WELCOME to this blog....
2. Do you want to know about Khasi Tribe (Maram) of Meghalaya, about Matrilineal system....
3. Do you want to know about Bhagavad Gita and Bible...

December 26, 2014

Ka Kristmas ka dei ka por ban long kum U Krist ba im



Ka Kristmas ka dei ka por ba ia u Krist la kha. Ka pynkynmaw ruh iangi ba, ‘U Krist u la shah iap, U Krist U la mihpat bad U Krist un sa wan pat’. U Jisu u la wan sha kane ka pyrthei 2014 snem mynshuwa bad u la iai shong iai sah bad ngi naduh kita ki por bad un sa bteng ban wan ha ka jingim jongngi man ka sngi. Ki briew ba duwai, ba puson shaphang U Jisu, ki briew ba iamap, ba iasuk, iaieid, kiba iarap ia ki parabriew, bad ki briew ba len lade ban pynbha ia ka imlang sahlang kin sa shem ia U Jisu ha ka jingim jongki. Ka Kristmas ka dei ka tlong ba wanrah jingim ha ka jingiadei jongngi bad U Blei bad ki parabriew bad ka mei mariang jongngi. Ka Kristmas ka dei ka por ba U Blei u pynpaw ia ka jingieid bapura, ka jingieid khlem jingthew iangi ki khun bynriew. Ban puson kham janai ia ka jingmut kane ka por jongka jingkyrkhu kine ki symboh pyrkhat harum ki lah ban iarap iangi.
Ka Kristmas ka dei ka por jong ka jingpynbna.
U Angel Gabriel u la pynbna ba yn sa kha ia U Jisu (Lk 1:26-32). U la pynbna ha ki nongap langbrot ba la kha ia U nongpynim ka pyrthei (Lk 2: 8-20).  Ka por Kristmas ka dei ka por jongka jingpynbna ba wanrah jingbha. U Blei u pynbna ba u ieid ianga ngi haduh katta katta bad u la phah ia U Jisu ban wan siewspah iangi. U Blei u la phah ia ki angel ban pynbna ia ka khubor jong ka jingkmen. Ngi kum ki khun kyntang jong U Blei ngi dei ban long ki nongpynbna ne ki nongpynphriang ia ka khubor babha U Blei bad pynkynmaw ba U Blei u ieid eh iangi. Ngi dei ban long ki briew ba kiwei kin lah ban iohi ia U Jisu baim ha ngi.
Ka Kristmas ka dei ka por jong ka jinglen lade.
Ka por Kristmas ka dei ka por jong ka jinglen lade. Ka Maria ka la len ialade da ka ba ong ‘Hakhmieh nga long ka shakri jong U Trai, ai kan urlong ha nga katkum ba phi ong’ (Lk 1: 38). Ka por Kristmas ka dei ka por ba ngin bret lut ia ka jinglong shimet ne ka jingkhwan bad ngi dei ban pyrkhat ia ka jingbha jong baroh. Ka Maria ka la aiti kylluid mynsiem ialade ha ba U Blei u wan long briew hangne ha sla pyrthei ym ialade shimet hynrei ban siewsphah ia ka pyrthei baroh kawei. Lada ngi aiti kylluid mynsiem ialade na ka bynta ki kam U Blei bad ki kam lehbha ia ki parabriew ngin sa ioh ki jingkyrkhu na U Blei.
Ka Kristmas ka dei ka por jong ka jingkmen.
Haba ka Maria ka la leit jngoh ia ka Elizabeth, Ka Elizabeth ka la ong, ‘U khunlung ha kpoh jongnga u la ryngkoh da ka jingkmen’ (Lk 1:44). Ki Angel ki la rwai ‘Burom h’U Blei sha jrong’ (Lk 2: 14) bad ka Anna ka la iaroh ia U Blei tang shu iohi ia U Jisu (Lk 2:38). Ka por Kristmas ka dei ka por ba U Blei u wan ban pynkmen ia ngi. Ka dei ka por ba ngi kmen namar U Blei u la kyrkhu iangi lyngba ki briew bad ka mariang. Ngi ruh ha kane ka aiom Kristmas ngi dei ban long ki atiar ban wanrah jingkmen ha ka jingim ki parabriew. Ka jingiaieid, jingiamap, ka jingleit jngoh ia ki ba duk ba toi, ki briew ha ki iing sah tymmen ne leit kynduh ia ki khynnah ba khunswet khun rangli bad kine ki jingleh bha jongngi kin sa wanrah jingkmen iangi. Ka jingpynkmen jongngi ia kiwei ka long ka jingpynkmen jongngi ia U Jisu bad ialade hi.
Ka Kristmas ka dei ka por jong ka jingkyrmen.
Ka jingkha ia U Jisu ka wanrah jingkyrmen ia baroh ki briew khamtam lei lei ia ki jait bynriew Ju ba ap khmieh ia ka jingwan U Messaiah. Ki riewstad na ri mihngi ki la kylli da ka jingkyrmen na U Herod, ‘Hango la kha ia i khyllung i ban long U Syiem ki Ju? (Mt 2: 2). U angel u la ong ha ki nongap langbrot, ‘wat sheptieng namar nga wanrah ka khubor ba bha’ (Lk 2: 10). Ka por Kristmas ka ai mynsiem ia ngi ba ngim dei ban duh jingkyrmen ha ka jingim jongngi. Ngi dei ban long ki briew ba trei shitom bad ba shaniah tylli tyllan ha U Blei bad U Blei un sa btin lynti iangi. Ngi ruh kum U Jisu u ba wanrah jingkyrmen ngi dei ban long ki ba ai jingkyrmen ia kiwei. Ki briew ba dap jingkyrmen ha lade ki lah ban ai jingkyrmen ia kiwei.
Ka Kristmas ka dei ka por ba ka kam ka kren khamjam ban ia ka ktien.
U Ignatius bakhuid na Loyola u la long, ‘ka jingieid ka dei ban kham pynpaw ialade da ki kam ba ym tang da ki ktien’. Ka por Kristmas ka dei ka por ba U Blei u pynpaw ia ka jignieid jong U iangi ym tang da ka ktien hynrei da kaba phah iala U jong U Khun U Jisu Krist. Ngi ki briew ngi dei ba bud ia ki nuksa U Blei. Ngi dei ban  kloi ban iarap ia ki ba lanot bad ngi dei ban long ki briew kiba kylluid mynsiem ban noh shynniang na ka bynta ka jingbha ka imlang sah lang jongngi. Ki briew ba kylluid mynsiem ia kiwei kin sa ioh jingkyrkhu shiphew shah na U Blei.
Ka Kristmas ka dei ka por jongka jingpynbna, jinglen lade, jingkmen, jingkyrmen bad ka por jong ka jingieid da ki kam. Lada ngi kwah ban ba U Jisu yn wan shong ha ngi shimet shimet ne ha ka iing ka sem jongngi ngi dei ban long ki ba la khreh. Ngi dei ban ban im ka jingim ba kiwei ki lah ban iohi ia U Jisu ba im ha ka jingim jongngi. Lada ngi im kum U Jisu kane ka pyrthei kan sa long ka pyrthei ba dap jingkmen, jingkyrmen, jingieid bad jingiamap. Ai ba U Jisu yn pyrsad ia ka jingim jong U ha ngi khnang ba ngi lah ban im bha ha kane ka pyrthei. Kristmas Basuk bad snem Thymmai Bakmen iaphi baroh.


Published in Mawphor on 24/12/2014
Powered By Blogger

Jakhong, Mairang, Meghalaya

FIND OUT WHAT YOU WANT