Shongkun ka jingrakhe ia ka World Disability Day, 2020 ha Mawkyrwat

 

Mawkyrwat, Nohprah 03, 2020: Ka District Legal Services Authority (DLSA), South West Khasi Hills District (SWKHD), Mawkyrwat ka la pynlong ia ka jingrakhe iaka World Disability Day, 2020 mynta ka sngi ba la pynlong ha shnong Mawthawpdah AEC Office Building, Mawthawpdah.

Haba kren halor ka phang pdeng jong ka jingrakhe ia ka World Disability Day, 2020 - “Building back better: towards an inclusive, accessible and sustainable post-COVID-19 world by, for and with persons with disabilities” ka kong Novarin Umdor, ba dang shu wan shimti kum ka District Social Welfare Officer jongka South West Khasi Hills District ka la ong ba bun bah ki kam kiba la sahkut bad bun ki briew ba la duh noh ia ki lad jingiarap bapher bapher namar ka khlam COVID-19. Ka la batai ruh shaphang ki skhim sorkar bapher na ka bynta ban iarap ia kito kiba don ki jingduna ha ka met ka phat ne ka bor pyrkhat bad ka la kyntu ia ki briew ba kin pynbiang ia ki kot ki sla kum ka Disability Certificate bad kiwei de khnang ba ka sorkar ka lah ban ai ki lad jingiarap ia ki. Ka la batai bniah ruh shaphang ka Permanent Disability Certificate bad ki Disability Certificate ba hap ban pynthymmai katkum ki por ba la buh.

            Ka Kong Wanri Marwein, Psychiatric, Social Worker, District Mental Health Programme (DMHP), Mawkyrwat ka la ong ba ka jingduna kam dei eh tang ha ki bynta jong ka met hynrei ki don ruh ki jingduna ha ka bor phyrkhat pyrdain bad ka DMHP ka peit ka khmih bad ai ki jingiarap bapher ia kum kitei ki nongpang. Ka la ai nuksa ruh ba ki don ki jingpang ba ki khyllung - khynnah kim nud ban peit ia ki kmie ki kpa hynrei ki shu iam beit, ki don ruh ki briew ba shu kren marwei marwei, ba shu byrngem ne pyntieng ia kiwei bad ki don ruh kiba pyrta ne thap kti marwei marwei bad kum kita ki briew bunsien ki dei na ka daw jong ka jingshitom ka bor pyrkhat. Ka la bynrap ruh ba lada ki kmie ki kpa ne ki bahaiing ki ithuh ne lap kham kloi bad leit phah sumar ki lah ban ioh jingkoit na ka jingpang jongki. Ka la bynrap ruh ba lada don ka jingiehbein, lehbein bad kyntait ia kito kiba shitom ka bor pyrkhat pyrdain ka lah ban poi sha u pud haduh ba kin dkhat noh syndon iala ka jong ka jingim namar kim lah shuh ban pdiang ia ka jingeh jongki ha ka imlang sahlang. Te ka la kyntu ba baroh ngi dei ban iarap bad ai mynsiem ia baroh kito ba duna ha ki dkhot met ne ka por pyrkhat pyrdain khnang ba kin im suk im kmen kumba long lem kiwei.

Ka nongiasaid ain jong ka DLSA, Mawkyrwat ka kong Nosmi Hahshah ka la kren halor ki lad jingiarap lyngba   ka ain kiba ki briew ba duna ha ka bor met bor phad ne bor pyrkhat ki lah ban ioh lyngba ka “Rights of Persons with Disabilities Act, 2016”. Ka la iathuh ba katkum ka ain ka long be-ain ban kyntait ia kiba don jingduna bad ki don ruh kajuh ka hok longtrai ban im laitluid ha ka imlang sahlang.  Ka la bynrap ruh ba ka Constitution jong ka ri India ka iada ia ka hok jongki bad dei namar kane ka daw ba kumba 3% na ki kam ha ki ophis sorkar la buh kyrpang ia kiba duna dkhot met ne bor pyrkhat tangba ka shong katkum ka jingtrei ne ka kam. Ka la ong ruh ba lyngba ka jingdon jong ka ain ban iada ia ki ba don jingduna katei ka ain ka la iarap ruh ha ka ban lap ia ka daw jong ka jingpang bad ban ioh ki lad jingiada. Ka la iathuh ba lyngba ka DLSA kito ba don jingshitom ha ka met ne ka bor pyrkhat ki lah ban ioh ia ka hok ba ki la shah sloit ha ka imlang sahlang, ne ia ki certificate ba ki donkam na ka bynta ban ioh ki skhim sorkar bad ki iarap ruh ban tehlakam ia ka jingshah ban bein ne niewbein ha ka imlang sahlang. Ka la iathuh ruh ba ki briew ba don jingduna ha ka met ka phat ne jingmut jingpyrkhat ki lah ban don ki sap ki phong bapher bha kum ka pud ka tem, ka rwai ka siaw, ka thoh ne ka jingdro ki dur bad kiwei de te ka la kyntu ba dei ban pynshlur bad ai mynsiem ia ki ba kin pynjanai ha ki sap ki phong ba ki don bad ba kin lah ban iashim bynta ha ki prokram bapher bapher ha ka imlang sahlang bad ha ki kam ophis kumjuh katkum ka jinglah jongki.

Ha katei ka jingrakhe ia ka World Disability Day, 2020 ba la pyniaid da u bah Janai Kupar Marwein, Dealing Assistant, DLSA u bah Y.Lyngkhoi, Myntri shnong Mawthawpdah u la ai ia ki kyntien pdiang sngewbha bad ka kong Shrik Lyngdoh, Multipurpose Rehabilitation Worker, Mawkyrwat ka la ai ia ki kyntien khublei.

 

Pynbna “Containment Area” ia ka shnong Rangblang Pdengshnong Sohsyniang

Mawkyrwat, Nohprah 01, 2020: Ka ophis jong ka Deputy Commissioner, South West Khasi Hills District, Mawkyrwat ka pynmih ia kane ka hukum ba katkum ki kyndon ain 2,3,& 4 jong ka Epidemic Diseases Act, 1897 kaba la pynlong iaka Meghalaya Epidemic Diseases COVID-19 Regulations, 2020 bad Amendment hadien kata ban tehlakam ia ka jingsaphriang jong ka khlam COVID-19, ba hadien ka jinglap ba don positive case/high risk contacts ha katto katne ki iing kiba don hapoh Rangblang Pdengshnong Sohsyniang, bad na ka daw jong ka jingiakynduh jong katto katne ki briew ba dei high risk bad low risk bad kito kiba ioh positive case, kito ki jaka ba kham don jingma bad ba shah ktah ki donkam ban hap buddien ia ki nongleit nongwan (contact tracing), jingshong pynkyrpang, testing, jingshongkhop marwei bad ban iada na ka jingsaphriang na ka bynta ka koit ka khiah jong u paid nongshong shnong ban lait na kino kino ki jingsaphriang jong u COVID-19.

Te namarkata, ka long kaba donkam ban pynbna ia shnong Rangblang Pdengshnong Sohsyniang kum ka “Containment Area” khnang ban khanglad ia ka jingrung jingmih ha kitei ki jaka. Ki kyndon ha kaba iadei bad katei ka hukum ki long ba yn ym shah ia ki briew ba kin leit banrung sha kitei ki jaka bad kumjuh ruh ki briew na kitei ki containment area kim dei ban mih shabar. Baroh ki briew kiba hap hapoh ka Containment area kin hap ban shongkhop ha ki iing ki sem. Yn ym shah ban pynlong kino kino ki jingkhawai ne jingialum paidbah ba kum kino kino ha kitei ki jaka. Yn ym shah ban don kino kino ki jingiakynduh la ki dei Social, Political, Religious, Economic ha kitei ki jaka. U Incident, Zone-I, Bah K. Hynniewta, District Statistical Officer bad Zonal Magistrate kin long ki Supervising Officer ban peit ban khmih ia ka jingbud ryntih ia kane ka hukum. Kane ka hukum kan ym  kynthup ia ki nongtrei ka tnad ka koit ka khiah, kito kiba pynbiang ia ki tiar ba donkam eh, ia ki Press ba kynthup ia ka Electronic bad Print Media, Petrol Pumps bad ia ki nongsam ia ki gas LPG. Baroh ki dei ban bud pyrkhing ia ki kyndon treikam ba la buh na ka bynta ban iada na ka jingsaphriang jong u COVID-19.

Lada don kino kino kiba pynkhein ia katei ka hukum kin shah pynshitom katkum ki kyndon ain jong ka Disaster Management Act, 2005 bad IPC. Na ka daw jong ka jingdonkam ba kyrkhieh kane ka hukum kan treikam mardor.

 

 

Pynjlan ia ka jingpynjari Curfew Miet (Night Curfew) ha SWKHD naduh ka 1 Tarik Nohprah haduh ka 8 tarik Nohprah, 2020

Mawkyrwat, Nohprah 01, 2020: Kumban bteng ia ka hukum pynjari Curfew Miet ba la pynmih ha ka 24 tarik Naiwieng, 2020, da ka District Magistrate, South West Khasi Hills District, Mawkyrwat bad kum ka lad ban iada bad ialeh pyrshah ban tehlakam, pynduna bad pynduh ia ka jingsaphriang ka khlam COVID-19. Te namarkatta ka Kong C. Kharkongor, IAS, District Magistrate, South West Khasi Hills District, Mawkyrwat ka pynjari CURFEW MIET  katkum ka kyndon ain 144 Cr.P.C ryngkat ka Regulation 3 jong ka Meghalaya Epidemic Diseases, COVID-19 Regulations, 2020 ha South West Khasi Hills District naduh ka 1 tarik Nohprah haduh ka 8 tarik Nohprah, 2020 naduh ka por 10.00 baje janmiet haduh ka por 5.00 baje mynstep man la ka sngi.

Katkum kane ka hukum yn ym shah ia ki briew bad ki kali ba kin mih ne iaid naduh ka por 10.00 baje janmiet haduh ka por 5 baje mynstep lait noh tang iakito ki kali ba kit ia ki tiar ne ia kito kiba trei ia ki kam ba donkam eh. Katei ka hukum kan ym kynthup ruh ia ki Medical Team bad ki ophisar ba  don COVID-19 duty, Police, Security bad Armed Forces, Civil Defense bad Home Guard Volunteers, Wholesale bad Retail Pharmacies, Fire & Emergency Service, MeECL & Power Grid, Officers bad Staff jong ka Corona Care Center, Press, Print & Electronic, Information & Public Relations Department, National Highways & Infrastructure Development Corporations Ltd (NHIDCL), bad Telecom service.

Hynrei kitei ki jingshakri ki dei ban bud ryntih ia baroh ki kyndon treikam ba kynthup ia ka jingpyniajngai parabriew, ka jingpynduna ia ki nongtrei, bad ia kiwei ki jingbthah jong ka sorkar lyngba ka tnad Health bad Family Welfare, khlem da pynkhein, Kumjuh ruh ka jingiaid jong ki kali ba kit ia ki tiar ba donkam eh, security forces, medical equipment bad ki dukan shna kali ha ki highway kin ym kynthup ha katei ka hukum hynrei ki dribar bad ki nongbud jong ki kali  kin hap ban leh screening bad bud ryntih ia ki kyndon treikam ba la buh. Ha kajuh ka por ka jingpyllait ia ki lad jingshakri ba donkam eh la ki dei official ne non-official, establishments ne agencies kin ym lait ia kito ba hapoh ki Containment Area katkum ki jingbthah ba la buh lait tang lada ki la ioh ka jingbit ban pyllait na katei ka ophis.

Ia ki Curfew Pass na ka bynta ki por hapdeng ka por 10.00 baje janmiet haduh ka por 5 baje mynstep ka ba long naduh ka 1 tarik Nohprah, 2020 (sngi Baar) haduh ka 8 tarik Nohprah, 2020 (sngi Baar) ki lah ban ioh na ka Transport Cell hapoh ka ophis jong ka Deputy Commissioner, South West Khasi Hills District.

Lada don kino kino kiba pynkhein ia kane ka hukum kin ngat hapoh ki kyndon ain 51-60 jong ka Disaster Management Act, 2005 bad kyndon ain 188 jong ka IPC. Na ka daw jong ka jingdonkam ba kyrkhieh kane ka hukum kan treikam mardor.

DC extends the promulgation of NIGHT CURFEW order under section 144 Cr.P.C at SWKHD

Mawkyrwat, December 01, 2020: In continuation to the Curfew Order issued on 24^th November, 2020 by the District Magistrate, South West Khasi Hills District, Mawkyrwat and in order to put in place preventive and mitigation measures so the pandemic of COVID-19 is contained, reduced and eliminated in South West Khasi Hills District and Meghalaya. Therefore, Smti. C. Kharkongor, IAS, District Magistrate, South West Khasi Hills District, Mawkyrwat promulgate NIGHT CURFEW in South West Khasi Hills District with effect from 1^st December to 8^th December, 2020 from 10.00 P.M to 5:00 AM daily under Section 144 Cr.P.C read together with Regulation 3 of the Meghalaya Epidemic Diseases, COVID-19 Regulations, 2020.

According to the order movement of individuals within the district shall remain prohibited between 10:00 PM to 5:00 AM (Night Curfew) each day and no plying of vehicles other than essential services/ essential commodities is permitted. The Order will not apply to Medical Team and officials on COVID-19 duty, Police, Security and Armed Forces, Civil Defense and Home Guard volunteers, Wholesale and Retail Pharmacies, Fire & Emergency Service, MeECL & Power Grid, Officers and Staff of Corona Care Centers, Press, Print & Electronic, Information& Public Relations Department, National Highways & Infrastructure Development Corporation Ltd (NHIDCL) and Telecom service. However, these services shall strictly comply with all protocols and procedures including social distancing, limiting of field staff to the barest minimum and other advisories of Government in the Health and Family Welfare Department, WITHOUT FAIL. Also, movement of vehicles carrying essential goods, security forces, medical equipments and shops for repair of trucks on highways is exempted. However, drivers and attendants of the vehicles shall be subject to medical screening as per laid down protocols. As per the order, the exemption granted to Official and Non-Official emergency / essential services, establishments and agencies above shall not extend to Containment Areas except for exemption granted therein. 

Curfew passes for timing falling between 10:00 PM to 5:00 AM with effect from 1^st December, 2020 (Tuesday) upto 8^th December, 2020 (Tuesday) to be obtained from Transport Cell, Office of the Deputy Commissioner, South West Khasi Hills District.

Any person violating the order will be liable to be proceeded against as per the provisions of Section 51-60 of the Disaster Management Act 2005 and Section 188 of the IPC. In view of the urgency of the matter, this order has been made ex-parte.

Ka jingrakhe ia ka World AIDS Day, 2020 ha Iew Mawkyrwat, South West Khasi Hills District, Meghalaya

 Mawkyrwat, Nohprah 01, 2020: Ka District Legal Services Authority (DLSA), South West Khasi Hills District, Mawkyrwat ka la pynlong ia ka jingrakhe ia ka World AIDS Day, 2020 kaba la pynlong ha Iew Mawkyrwat.

            Haba kren ha katei ka sngi u Bah W. Alexander Kharkongor, Meghalaya Aids Control Society u la ong ba jingrakhe ia ka World AIDS Day ka long ban kynmaw ia ki briew ba la duh noh ia la ka jingim na ka daw jong ka jingpang niangkulia (AIDS) bad ban ai mysiem ia kito kiba la ioh ia utei u kniang jingpang. U la iathuh ruh ba haduh mynta ym pat don dawai ban pynkoi ia u khniang HIV ne AIDS. U la bynrap ruh ba bunsien ki briew ki don ka jingshepthieng shaphang katei ka jingpang namar ba ki don ka jingsngewthuh bakla ba ka long ka jingpang iabit hynrei u la pynshai ba ki briew ki lah ban ioh ia ka jingpang HIV tang lada ki pynkhein ia ki saw kyndon bad kita ki long ka jing shongkha pathar ne im awria bad khlem da pyndonkam ia u condom ha ka por iashongkha khamtam lei lei ha ka por iashongkha bad kito kiba la don lypa ia u khniang HIV, ka lah ban bit ruh na ka jingshim snam na kito ba la don lypa ia u HIV te lada donkam snam dei ban leit sha ki jaka ba don license ban buh snam ba la buh kyrpang, ka jingpyndonkam da u juh u thyrnia injek ba la pyndonkam da ki ba pang HIV  ka long ka jingpynsaphriang ia ka jingpang HIV bad kane ja jur bha ia kito ba dih drok bad lah ban ioh na ka kmie kaba pun khun bad don HIV hynrei lada ki kmie ki leit wut wut sha hozpital tang shu armet lah ban iada ba katei ka jingpang kan ym hiar pateng ha ki khun. Te u la kyntu ba ha ka por ba kha khyllung ki longkmie ba don HIV ki dei ban leit kha sha hospital ban lait na kino kino ki jingma ha ka jingiabit na ka snam ha ka por ba kha. U la pynkut da kaba ong ba u HIV u dei tang u khniang bad lada ngi sumar ngi lah ban tehlakam ia ka jingsaphriang utei u khniang bad u la kyntu ruh ba ‘ngim dei ban peit matdong ne niewbein ia kito kiba ioh ia katei ka jingpang hynrei dei ban ai mynsiem ia ki bad shim kum ka lad ban iada ialade.

Ka nongiasaid ain jong ka DLSA, Mawkyrwat ka kong Nosmi Hahshah ka la iathuh ba ka jingthmu ba la pynlong ia ka jingrakhe ia ka World AIDS Day ka long ban ai jingtip sha u paidbah halor ki lad jingiarap ba ki briew ba shah ktah ha utei u khniang ki la ban ioh lyngba ka DLSA. Ka la batai ruh shaphang ka Human Immunodeficiency Virus and Acquired Immune Deficiency Syndrome (Prevention and Control) Act, 2017 da kaba ong ba kito kiba ioh ia ka jingang HIV-AIDS ki don ia ka hok longbriew manbriew bad ban iashim bynta ha ki kam ki jam kumba long lem kiwei. Ka la iathuh ruh ba katkum ka ain kito ki briew ba ioh jingpang HIV AIDS kim dei ban shah peit matdong ne kyntait ha ka imlang sahlang namar ka jingpang kam dei kaba iabit kulmar lada ngi long kiba phikir. Lada don kiba niew shilliang kin shah pynshitom da kaba shah set patok haduh 3 snem ne shah dainkuna 1 lakh tyngka. Lada ki briew ki ioh ia katei ka jingpang ki nongtrei ka koit ka khiah kim dei ban pynpaw pyrthei ia ka kyrteng jongki bad lada ki pynpaw ka longpyrshah ia ka hok longbriew jongki bad ka la ong ruh ba khlem ka jingmynjur ki briew yn ym lah ban leh test ia ka jingpang HIV. Ka la pynkut da kaba ong ba ka DLSA ka ai jingiarap lyngba ka free legal aids ne ban thung da ki plidar sorkar ban ai jingiarap ia kito kiba shah thombor tang na ka daw ba ki don HIV-AIDS.

Ka kong Wanri Marwein, Psychiatrist, District Mental Health Programme (DMHP), Mawkyrwat ka la ong ba ka jingpang jongngi ki briew kam de tang ka met ka phat hynrei ka lah ban long ruh ka jigpang jong ka jingmut jingpyrkhat. Te ka Constitution jong ka Ri India lyngba ka Article 21 ka ai ki lad jingiada ia ka hok longbriew man briew jongngi. Kumjuh ruh ka la bynrap ba ka DMHP ka ai jingiarap lyngba ka jingiasyllok ia kito kiba shah lehbein tang namar ba ki ioh ia u khniang HIV.

Ha katei ka jingrakhe la don ruh ki prokram pynbyrngia kum ka jinglehkai lyngkot ba kyrteng “Husiar” na ka kynhun Sei la i sap na  shnong Mawlangwir, ka jingrwai halor ka phang AIDS na kaTraditional Folk Troupe, Mawlangwir bad ka jingsam ia ka jingai sngewbha ba la ai da ka Meghalaya AIDS Control Society.

Ia jingrakhe World AIDS Day, 2020 la pyniaid da u Babu W.L Snaitang, Para Legal Volunteer, Mawkyrwat, u bah W.C.D Toi, Para Legal Volunteer, Mawkyrwat u la ai ia ki kyntien pdiang sngewbha bad ia ki kyntien ai khublei la pyndep da u bah Janai Kupar Marwein, Dealing Assistant, DLSA.

Ka jingrakhe kynmaw burom ia U Sngap Sing Syiem, Syiem ka Hima Maharam

“U Sngap Sing Syiem u long u briew u ba shlur, ba len lade bad ba trei shitom bad minot”: PHE Minister

Mawkyrwat, Naiwieng 30, 2020: Ka jingrakhe kynmaw burom ia U Sngap Sing Syiem u kla kawait jong Ka Hima Maharam kaba la pyniaid da Hynniewtrep Youth Council (HYC), South West Khasi Hills District (SWKHD) ha ka jingiatreilang bad ka ophis jong ka Deputy Commissioner, SWKHD, Mawkyrwat ryngkat ka Hima Maharam Syiemship ba la pynlong ha Multipurpose Hall, DC Office ka la long kaba shongkun.

            Haba kren kum u kongsan u Bah Renikton Lyngdoh Tongkhar, PHE Minister, Govt of Meghalaya & MLA Mawkyrwat Constituency u la ai ka jingkhublei ba kyrpang ia ki nongtrei ba hakhmat eh ha ka jingialeh pyrshah ia ka khlam COVID-19 kum ki ASHA, Nongialam Shnong, Doctor, Nurses bad kiwei de da kaba ong ba ka mynsiem kheinduh bad jinglen lade jong ki ka long thik kum ka jingiakhun pyrshah u Sngap Sing Syiem ia ki shipai pareng mynshuwa. U la kyntu ruh ba ki briew kin nang iaibud pyrkhing ia ki kyndon treikam kum ka jingdeng ia ki mask, ka jingpyniajngai parabrirew, ka jinglehkhuid da kaba sait bha ia ki kti bad bud ia kiwei ki jingbthah ba iadei bad ka jingteh lakam ia u COVID-19. Haba kren shaphang u “Sngap Sing Syiem u la ong ba ka jinglong shlur, ka jinglen lade, ka jingtrei shitom bad minot jong u Syiem ka la pynlong ia u ba kan im ka kyrteng bad sah ka nam ha ka ri bad ka jaitbynriew jongngi”. U la bynrap ruh ba ka jingsdang ia ka college ha ka kyrteng u Sngap Sing Syiem ka la nang pynim bad pynkynmaw shuh shuh iangi shaphang ka jingtrei radbah u Sngap Sing Syiem na ka bynta ka ri bad ka jaitbynriew. U la ong ruh ba ka Sorkar Meghalaya naduh u snem 1994 ka la ithuh ia u Sngap Sing Syiem bad ka la ai shuti ia ka South West Khasi Hills District ban rakhe kynmaw burom ia utei u syiem. U la kyntu ia baroh ba ngin long ki ba shakri hok ia ka ri bad ka jaitbynriew da kaba ong ba ka jingshakri ialade kan sa pynlah iangi ban shakri ia kiwei kumjuh namar ngi don iala ka bynta bapher bapher ban kyntiew ia ka imlang sahlang.

            Ka kong Caramai Kharkongor, IAS, Deputy Commissioner, South West Khasi Hills District, Mawkyrwat ka la iathuh ba katkum ka khana Samari ngi ju tip ba ka don ka Anglo Khasi War ka ba la sdang ha u snem 1828 bad ka dei ka thma ba ialeh pyrshah ia ka East India Company ha kaban shna ia ka surok ban pyniasnoh ia ka Guwahati bad ka Sylhet. Ki Syiem Khasi ki khlem sngewtynnad bad iahap jingmut ia katei ka jingthmu bad dei ha kata ka por ba ka sa don ka thma ha ka jingialam u Tirot Sing Syiem, U Syiem ka Hima Nongkhlaw. U Syiem Tirot Sing u la khot la wer ia ki Syiem Khasi baroh ba kin iasnoh kti lang ha kaban ialeh pyrshah ia ki phareng. Hadien ka jingshahkem jong u Tirot Sing Syiem ha u snem 1833, u Sngap Sing Syiem u la ieng rangbah ban ialeh pyrshah bad bud ia ki dienjat jong u Syiem Tirot Sing ha kaban ialeh pyrshah ia ki phareng. Ka la ong ruh ba ngi dei ban sngewsarong ia u syiem ba u dei u briew u ba shlur, u baieid ia ka jaitbynriew bad u ba ngeit ha ka riti synshar jongngi ki khasi. Ka la kyntu ruh ba kum ki khasi ngim dei ban klet ia ki riti dustur khasi jongngi bad ngi dei ban niewkor ia ka riti synshar paidbah.

            U Pa’iem Niandro Syiemiong, Syiem ka Hima Maharam Syiemship u la iathuh ia ka khana samari shaphang u Sngap Sing Syiem. U la pynshai ruh ba kane ka sngi 30 tarik Naiwieng kam dei ka sngi kynmaw ia ka jingkhlad noh u Sngap Sing Syiem hynrei ka dei ka jingkynmaw ia ka jinglum dorbah bah jong u Syiem ha u snem 1847 bad pynbna sha u paidbah ka Hima iaka ki pud sawdong jong ka hima da kaba kyntu ba ki khun ki raiot jong ka Hima kim dei ban ailad ia ki mynder ba kin wan kam nongkynti ia ki khyndew ki shyiap ba hap hapoh ka Hima Maharam. U la iathuh ruh ba u Sngap Sing Syiem u dei u Syiem ba 7 bad u la synshar kumba 28 snem ia ka Hima kaba long naduh u snem 1820 haduh 1848.

            U Vice-President HYC CEC u Bah Rhembor Saibon u la ong ba “ka jaitbynriew ba burom ia ki riewkhraw ka dei ka jaitbynriew ba im”. U la ban ruh ba kane ka dei ka sngi ba ka jaitbynriew kam dei ban klet ia ki matti bad ki dienjat jong Sngap Sing Syiem namar ka jinglen lade jong u. U la iathuh ba u Sngap Sing Syiem u la trei radbah ban iada ia ki khyndew ki shyiap hapoh ka Hima bad u dei u ruh u Syiem ba khaduh ban iakhun ia ki pareng. U la bynrap ba U Sngap Sing Syiem u don ka jingiadei paralok ba iajan tam bad U Syiem Tirot Sing ka Hima Nongkhlaw bad ka khana jongki arngut ka iasyrierm bha ba ki la shah shet kylla tang ha ki sbai rupa. U la ong ruh ba kitei ki syiem ki la iakhun da ka stieh bad ka ryntih pyrshah ia ki dohlieh hynrei ka jingiakhun mynta ka dei pyrshah ia ki dohiong namar ba ka jaitbynriew jongngi ka don ha ka saw ka sian ha ka jingwan leh jubor jongki. U la ong ruh ba u Sngap Sing Syiem yn jyn da la kmen lada u iohi ba ki Myntri ka Sorkar jylla ne ki MLA kin trei shitom ban pynioh noh ia ka Inner Line Permit (ILP) baan iada ia ka ri bad ka jaitbynriew Khasi jongngi. 

            Kum shibynta jong ka jingrakhe ia ka sngi kynmaw burom ia U Sngap Sing Syiem u kla ka wait bad u Nongialam ka Hima la pynkup burom ia ki 10 ngut ki ASHA, Volunteer jong ka Seng Samla Shnong Mawkyrwat bad Mawlanwir, bad ia ka ophis jong u District Medical & Health Officer, South West Khasi Hills District, Mawkyrwat ba ki la iakhun pyrshah ia ka thma bajur eh mynta kaba long ka khlam COVID-19.

            Ia katei ka prokram la pyniaid da u bah Arbok K. Jahrin, President HYC SWKHD bad ia ki kyntien ai khublei la pyndep da u bah Moonkingstar L. Paliar, G.S HYC SWKHD.