Ka jingrakhe kynmaw burom ia U Sngap Sing Syiem, Syiem ka Hima Maharam

“U Sngap Sing Syiem u long u briew u ba shlur, ba len lade bad ba trei shitom bad minot”: PHE Minister

Mawkyrwat, Naiwieng 30, 2020: Ka jingrakhe kynmaw burom ia U Sngap Sing Syiem u kla kawait jong Ka Hima Maharam kaba la pyniaid da Hynniewtrep Youth Council (HYC), South West Khasi Hills District (SWKHD) ha ka jingiatreilang bad ka ophis jong ka Deputy Commissioner, SWKHD, Mawkyrwat ryngkat ka Hima Maharam Syiemship ba la pynlong ha Multipurpose Hall, DC Office ka la long kaba shongkun.

            Haba kren kum u kongsan u Bah Renikton Lyngdoh Tongkhar, PHE Minister, Govt of Meghalaya & MLA Mawkyrwat Constituency u la ai ka jingkhublei ba kyrpang ia ki nongtrei ba hakhmat eh ha ka jingialeh pyrshah ia ka khlam COVID-19 kum ki ASHA, Nongialam Shnong, Doctor, Nurses bad kiwei de da kaba ong ba ka mynsiem kheinduh bad jinglen lade jong ki ka long thik kum ka jingiakhun pyrshah u Sngap Sing Syiem ia ki shipai pareng mynshuwa. U la kyntu ruh ba ki briew kin nang iaibud pyrkhing ia ki kyndon treikam kum ka jingdeng ia ki mask, ka jingpyniajngai parabrirew, ka jinglehkhuid da kaba sait bha ia ki kti bad bud ia kiwei ki jingbthah ba iadei bad ka jingteh lakam ia u COVID-19. Haba kren shaphang u “Sngap Sing Syiem u la ong ba ka jinglong shlur, ka jinglen lade, ka jingtrei shitom bad minot jong u Syiem ka la pynlong ia u ba kan im ka kyrteng bad sah ka nam ha ka ri bad ka jaitbynriew jongngi”. U la bynrap ruh ba ka jingsdang ia ka college ha ka kyrteng u Sngap Sing Syiem ka la nang pynim bad pynkynmaw shuh shuh iangi shaphang ka jingtrei radbah u Sngap Sing Syiem na ka bynta ka ri bad ka jaitbynriew. U la ong ruh ba ka Sorkar Meghalaya naduh u snem 1994 ka la ithuh ia u Sngap Sing Syiem bad ka la ai shuti ia ka South West Khasi Hills District ban rakhe kynmaw burom ia utei u syiem. U la kyntu ia baroh ba ngin long ki ba shakri hok ia ka ri bad ka jaitbynriew da kaba ong ba ka jingshakri ialade kan sa pynlah iangi ban shakri ia kiwei kumjuh namar ngi don iala ka bynta bapher bapher ban kyntiew ia ka imlang sahlang.

            Ka kong Caramai Kharkongor, IAS, Deputy Commissioner, South West Khasi Hills District, Mawkyrwat ka la iathuh ba katkum ka khana Samari ngi ju tip ba ka don ka Anglo Khasi War ka ba la sdang ha u snem 1828 bad ka dei ka thma ba ialeh pyrshah ia ka East India Company ha kaban shna ia ka surok ban pyniasnoh ia ka Guwahati bad ka Sylhet. Ki Syiem Khasi ki khlem sngewtynnad bad iahap jingmut ia katei ka jingthmu bad dei ha kata ka por ba ka sa don ka thma ha ka jingialam u Tirot Sing Syiem, U Syiem ka Hima Nongkhlaw. U Syiem Tirot Sing u la khot la wer ia ki Syiem Khasi baroh ba kin iasnoh kti lang ha kaban ialeh pyrshah ia ki phareng. Hadien ka jingshahkem jong u Tirot Sing Syiem ha u snem 1833, u Sngap Sing Syiem u la ieng rangbah ban ialeh pyrshah bad bud ia ki dienjat jong u Syiem Tirot Sing ha kaban ialeh pyrshah ia ki phareng. Ka la ong ruh ba ngi dei ban sngewsarong ia u syiem ba u dei u briew u ba shlur, u baieid ia ka jaitbynriew bad u ba ngeit ha ka riti synshar jongngi ki khasi. Ka la kyntu ruh ba kum ki khasi ngim dei ban klet ia ki riti dustur khasi jongngi bad ngi dei ban niewkor ia ka riti synshar paidbah.

            U Pa’iem Niandro Syiemiong, Syiem ka Hima Maharam Syiemship u la iathuh ia ka khana samari shaphang u Sngap Sing Syiem. U la pynshai ruh ba kane ka sngi 30 tarik Naiwieng kam dei ka sngi kynmaw ia ka jingkhlad noh u Sngap Sing Syiem hynrei ka dei ka jingkynmaw ia ka jinglum dorbah bah jong u Syiem ha u snem 1847 bad pynbna sha u paidbah ka Hima iaka ki pud sawdong jong ka hima da kaba kyntu ba ki khun ki raiot jong ka Hima kim dei ban ailad ia ki mynder ba kin wan kam nongkynti ia ki khyndew ki shyiap ba hap hapoh ka Hima Maharam. U la iathuh ruh ba u Sngap Sing Syiem u dei u Syiem ba 7 bad u la synshar kumba 28 snem ia ka Hima kaba long naduh u snem 1820 haduh 1848.

            U Vice-President HYC CEC u Bah Rhembor Saibon u la ong ba “ka jaitbynriew ba burom ia ki riewkhraw ka dei ka jaitbynriew ba im”. U la ban ruh ba kane ka dei ka sngi ba ka jaitbynriew kam dei ban klet ia ki matti bad ki dienjat jong Sngap Sing Syiem namar ka jinglen lade jong u. U la iathuh ba u Sngap Sing Syiem u la trei radbah ban iada ia ki khyndew ki shyiap hapoh ka Hima bad u dei u ruh u Syiem ba khaduh ban iakhun ia ki pareng. U la bynrap ba U Sngap Sing Syiem u don ka jingiadei paralok ba iajan tam bad U Syiem Tirot Sing ka Hima Nongkhlaw bad ka khana jongki arngut ka iasyrierm bha ba ki la shah shet kylla tang ha ki sbai rupa. U la ong ruh ba kitei ki syiem ki la iakhun da ka stieh bad ka ryntih pyrshah ia ki dohlieh hynrei ka jingiakhun mynta ka dei pyrshah ia ki dohiong namar ba ka jaitbynriew jongngi ka don ha ka saw ka sian ha ka jingwan leh jubor jongki. U la ong ruh ba u Sngap Sing Syiem yn jyn da la kmen lada u iohi ba ki Myntri ka Sorkar jylla ne ki MLA kin trei shitom ban pynioh noh ia ka Inner Line Permit (ILP) baan iada ia ka ri bad ka jaitbynriew Khasi jongngi. 

            Kum shibynta jong ka jingrakhe ia ka sngi kynmaw burom ia U Sngap Sing Syiem u kla ka wait bad u Nongialam ka Hima la pynkup burom ia ki 10 ngut ki ASHA, Volunteer jong ka Seng Samla Shnong Mawkyrwat bad Mawlanwir, bad ia ka ophis jong u District Medical & Health Officer, South West Khasi Hills District, Mawkyrwat ba ki la iakhun pyrshah ia ka thma bajur eh mynta kaba long ka khlam COVID-19.

            Ia katei ka prokram la pyniaid da u bah Arbok K. Jahrin, President HYC SWKHD bad ia ki kyntien ai khublei la pyndep da u bah Moonkingstar L. Paliar, G.S HYC SWKHD.