Mawkyrwat, Risaw 27, 2021: Ka District Legal Services Authority, Mawkyrwat ha ka jingiatreilang bad ka ophis jong u Superintendent of Police, Mawkyrwat mynta ka sngi ki la pynlong ia ka prokram ai jinghikai shaphang ki ain ki kanoon ba iadei bad ka ka jingpyndonkam bakla ia u drok bad ka jingkhaii beain (Legal Awareness on Drugs abuse and Illicit Trafficking) kum shi bynta jong ka jingrakhe ia ka Pan India Awareness and Outreach Programme ha kaba iadei bad ka Azadi ka Amrit Mahotsav kaba la pynlong hapoh Iew Mawkyrwat.
Haba kren ha katei ka sngi ka kong Alcydalin Lyngkhoi,
Clinical Psychologist, DMHO, Mawkyrwat ka la batai bniah shaphang ka jingmut
jong u drok da kaba ong ba ki dei ki jingdih pynbuaid kiba ktah ia ka jingmut
jingpyrkhat jongngi bad la bynta ia u drok ha ki saw bynta kum ki stimulants
(ki drok ba ai bor), ki depressants (ki drok ba pyntlot bor), ki opioids ne
opiates (ki drok ba pynjah ia ka jingpang shipor), bad ki hallucinogens (ki
drok ba ktah ia ka jabieng bad pynlong ia ki ba kin sngew ba ki don sha kawei
pat ka pyrthei). Ka la ong ruh ba ka jingkyrni ia u drok ne ka kyiad ka long ka
jingpang bad ki briew ki donkam ban phah sumar. Ki drok ne ki jingdih pynbuaid
ki ktah bad iuhroit ia ka jingmut jingpyrkhat. Ka la bynrap ruh ba katei ka
jingpang kyrni ka ktah ia ka koit ka khiah jong u nongdih shimet, ia ka iing ka
sem, ia ka imlang sahlang, ka ioh ka kot bad ia ka ri bad ka jait bynriew baroh
kawei. Ka la bynrap ruh ba ki nongpang ba la ngop ha ki jingdih pynbuaid ka
ktah bha ia ki samla lud ne ba dang khie san namar ka jingmut jingpyrkhat
jongki kam pat long rangbah hynrei ki don ki lad jingiarap lyngba ka adolescent
clinic lada ki kwah ban koit. Ka la ong ruh ba shisien ba ki briew ki la
pyndonkam shisien ia u drok ne ki jingdih pynbuaid kan pynkwah ban pyndonkam
biang bad hadien ba la ioh mad 3 sien kan sa tehmraw iaki. Ka la kyntu ia baroh
ba kin long kiba husiar bha ban ym shah pynjulor ia ka imlang sahlang ha u
drok.
U bah SI Shimborlang J
Kharbhih, 2nd OC Mawkyrwat Police Station u la batai sani bha halor ka ain The
Narcotic Drugs and Psychotropic Substances Act, 1985 (NDPS Acts). U la ong ba ain
ka mana ia ki briew ba kin thung, pynmih/shna, buh halade, thied ne khaii,
pynkit, kynshew bad pynlang ne ban bam ne dih ia kino kino narcotic drok ne ki
psychotropic substance. U la bynrap ba u drok u kynthup ia u natural,
semi-synthetic bad synthetic drok, u coca leaf, cannabis (hemp), opium, bad
poppy straw; bad psychotropic substances ki kynthup ia ki drok bai oh na ka
mariang (natural) ne synthetic material ne kino kino ki kynja jingdih
buaid. U la khot la wer ia ki briew ba
kyrni ha ki jingdih pynbuaid ba kin leit pyntip dalade sha ki pulit ba kin ioh
ia ka jingsumar bad ban lait na ka jingpynsaja katkum ka ain. U la kyntu ia ki
paidbah ba kin ai ka kti kamon kti kadiang ba kin ialaeh pyrshah ia u nongshun
ba sniew tam ka jaitbynriew da kaba pyntip sha ki pulit. U la bynrap ruh ba ki
kmie ki kpa ki dei ban long kiba peitngor ban peit ia ki khun naduh Class 8
haduh Degree namar kane ka dei ka por ba ki khynnah ki ngop bha ha u drok. U la
ong sha ki khun samla ba kin jied ia ki paralok bad kiar na ki paralpk ba sniew
ban iarap iaki ba kin kylla. U la pynkut da kaba ong ba baroh ki dei ban ong
"Em ia u drok".
Ka Panel Lawyer jong ka DLSA, Mawkyrwat ka kong Nosmi Hahshah ka la ong ba katkum ka NDPS Acts yn pynshitom ia ki briew katkum ka jingdon u drok ne ki jingdih pynbuaid ha ki bad katkum ka jingthmu ban pyndonkam ia u drok. Ka la ong ruh ba lada thied dawai dei ban ioh da ka jingthoh na ki doctor ban lait na ka jingshah ialam bakla. Ka la kyntu ruh ia ki nongdie dawai ba kin husiar haba ki die ia ki dawai ioh ki nongthied ki pyndonkam bakla ia ki. Ka la kyntu ruh ba lada ki briew ki kwah ban thung ia ki kynja jingthung ba lah ban pynkylla kum ki dawai ki dei ban pan da ka licence ba pura na ki bor ba dei peit. Ka la khot la wer ia ki longkmie longkpa, ki nonghikai skul, ki shnong ki thaw, bad ki khun samla ba kin long kiba peitngor ban ym ailad ia u drok ne ia kino kino ki jingdih pynbuaid ba kin ioh ban rung ha ka imlang sahlang namar ba lada synshar u drok ne ka kiad kin sa teh mraw bad pynjot ia ka imlang sahlang, ia ka ri bad ka jaitbynriew hi baroh kawei. Ka la kyntu ba baroh ki dei ban rah ia ka khubor ba ki briew kin kiar na u drok bad ym dei ban kren beit ia ki ba ngat ha ka jingdih drok namar ka don ka lad ban koit ban khiah.
Ia katei ka porkram la pyniaid da u bah W.L. Snaitang,
Non-Official Member DLSA, Mawkyrwat, la ioh ka prokram pynbyrngia (skit) na ka
kynhun NKD1, Mawlangwir bad la kren ai khublei da u bah Ardybester, Staff
District and Sessions Court, Mawkyrwat
