Plie pyrda u CEM ïa ka tnad treikam ka KHADC ha South West KHD

 Mawkyrwat, Lber 24, 2020: U bah Titosstarwell Chyne, Chief Executive Member (CEM) jong ka Khasi Hills Autonomous District Council (KHADC), mynta ka sngi u la plie pyrda ïa ka ïing thymmai kaba long ka tnad treikam jong ka KHADC ha South West Khasi Hills District (SWKHD), Mawkyrwat ha ka jingïadonlang u bah Gigur Myrthong, Deputy Chief Executive Member, bah Teiborlang Pathaw, EM I/c Council Building, bad kiwei de ki EM ba kynthup ïa u bah Martle N. Mukhim, bah Victor Ranee, bah Jambor War, bah Rangkynsai Kharbuki, bah Mitchel Wankhar, bah Lamphrang Blah, L.O, KHADC, ki Syiem, ki Myntri bad Rangbah Shnong bad kiwei de.

            Haba kren kum u kongsan ha katei ka sngi u bah Titosstarwell Chyne u la ong ba ka long kaba sngewtynnad ban ïoh ïa ka lad ban pynurlong ban plie ïa ka jingangud ba la thrang ka KHADC bad u paidbah la bun ki snem bad u da ai khublei ruh ïa ki nongïalam barim ba la trei shitom ban pynurlong ïa katei ka thong. U la ïathuh ba la tei ïa ka tei ka ïing naduh u snem 2019 ha ka mang tynga ba T. 1.60/- klur tam.  U la bynrap ruh ba mynta ki la don 7 ngut ki nongtrei permanent bad 6 ngut ki nongtrei Causal ha katei ka ophis. U la pyntip ruh ba ka kamram ba shakhmat eh katei ka ophis mynta ka long ban lum ïa ka professional tax bad kat ba nang mih ki por ka ophis kan sa pynïar ïa ki tnad treikam jong ka bad sa buh khambun ki nongtrei ban pynsuk ïa ki paidbah jong ka dong ka thaiñ ban pyndep ïa ki kam ha kaba ïadei bad ka KHADC.

            U la kular ruh ban buh ki ophisar ban peit ïa ka jinglong jingman katei ka ophis ha kajuh ka por ban long ki nongpynpoi bad pyndep ïa ki kam ki jam ha kaba ïadei bad ka jingtreikam ba dei ban pyndep napoh head office ha shillong. U ïathuh ruh ba ka Executive Committee ka angnud ban pynkhlaiñ ïa ka District Court ha Mawkyrwat ban ïarap ïa u paidbah bad ban thung kam thungjam ïa kiba bun ki plidar ne ki nongïasaid aiñ. U la pynpaw ruh ba ki don katto katne ki nongtrei ka KHADC kiba shim kabu bad kim pyndep hok ïa ka kamram jong ki te namarkatta, u la kyntu ïa ki ba kin ym shim kabu, kin ym long ki nongtrei ba wan tang ha ki sngi ïew, kin pyndep hok ïa ka kamram jong ki da kaba wan man ka sngi namar ba ka KHADC ka thung kam bad ka siew ïa ki.

            U la ban ruh ba ka ophis ka siew tulop ïa ki da ka khajna ba ki ïohlum ma ki, te ki dei ban treihok ïa ka kam khnang ba u paidbah un ïoh ïa ka jingshakri ba pura bad khnang ba ka jingïoh (revenue) jong ka KHADC ka nang kiew ban wanrah ïa ka roi ka par.

            Haba kren halor ka phang jong ka jingïa ka jia ki syiem bad ki raiot, ula ong ba ka Executive Committee kam kwah ban ïaleh politik bad ka kam jied syiem ne ka jingpynïaid jong ki hynrei lada don kino kino ki jingujor kin hap ban bishar bniah katkum ka nongrim bad rai katkum ka bor ba la pynkhamti ha ka District Council.

            U bah Gigur Myrthong, Deputy Chief Executive Member u la pynpaw ba na ka liang ka council kan pyrshang ban pynbiang katba lah ïa katei ka ophis bad thawlad thawlynti ban kyntiew ïa ka ïoh ka kot jong ka council hynrei ka shong ha ki nongtrei ba kin pynitynnad bad pynrteikam ïa katei ka ophis. U la kyntu ïa ki nongtrei baroh ba kin treihok bad peitbha ïa ki jingdonkam jong ka dong ka thaiñ ha kaba ïa dei bad ki kam bad ka KHADC. U la pynkut da kaba ong ba ka Council ka dei ka khlieh jong ka jaidbynriew bad tang shu bakla kan sa wanrah ïa ka jingjot ïa ka ri bad ka jaidbynriew.

            U bah Teiborlang Pathaw, EM I/c Council Building u la ong ba ka long ka jingkmen bakhraw ban plie ïa katei ka ophis ban ai ïa ka jingshakri ba janai tam bad ban pynkhlaiñ ïa ka jingtreikam jong ka KHADC sha ka dong ka thaiñ. U la kyntu ïa ki nongtrei baroh ban ai ka jingshakri ba pura bad ban pynsting ïa ki paidbah ha kaba ïa dei bad ki kam KHADC bad ba u paidbah un hun.

            U nongïalam jong ka liang pyrshah u bah Lamphrang Blah, u la pynpaw ïa ka jingsngewkmen ban sakhi ïa ka jingplie ïa katei ka tnad treikam jong ka KHADC bad u la ong ba ka jingplie ïa katei ka tnad treikam ka long ka jingkyrkhu kaba bha tam sha ka district baroh kawei. U la bynrap ba katei ka ophis kan pynsuk shi katdei ha ka liang ka por, bor bad ka dor jong u paidbah. U la ong ruh ba ai ba katei ka ophis kan ym long kaba don tang ki miej bad shuki hynrei ba kan long ka jaka treikam ban ïada ban pynneh pynsah ïa ka khyndew ka shyiap bad pynklaiñ bad pynskhem ïa ka riti dustur synshar jong ngi bad ngim dei ban pynsynjor ïa ka ri bad ka jaitbynriew jong ngi. U la ban ruh ba ka pisa ka treikam hynrei to ngin long kiba husiar ba ka pisa kan ym pynduh ïa ka hok jong ngi, kan ym ai lad ïa ka jingwantur kyrthlep ki mynder ri, bad ba kan ym die duh ïa ka riti synshar bad ka ri bad ka jaidbynriew jong ngi.

            U Pa'iem Niandro Syiemiong, Syiem ka Hima Maharam, u la ïathuh ba ki don saw tylli ki hima ban hap hapoh ka jingpeit jong katei ka KHADC South West Khasi Hills District. Ka jingdon ka ophis ba pura kan sa wanrah ïa ka jingsngewtrai ïa ka KHADC ban pynneh pynsah ïa ki riti dustur jong ngi ki khasi. U la ong ba katei ka ophis kan long ka jingkyrkhu kaba khraw ban ïarap ïa u paidbah ka it ka hima ban pyndep ïa ki kam ki jam jong ki.

            Ha katei ka prokram ba la pynïaid da u bah Carnes Sohshang, MDC, Mawkyrwat Constituency ka la don ruh ka jingkren na u bah Paskal Wahlang, Myntri Shnong Jakrem, ka drama lyngkot na ka Ïonglajong, Mawlangwir halor, “ka jingdie ïa ki jaka puta bad ka jait bynriew ha ki bar jylla da kaba pynbiej da ka pisa”, ka jingshad ‘Mariang’ na ka kynhun nongshad Franciscan Youth Federation, South West Khasi Hills Zone, ka jingkren ai khublei na u bah Martle N. Mukhim bad ka jingduwai na u Bah Jambor War.

“Ka um ka dei ka jingim”, ong ka DC ha ka jingrakhe ia ka World Water Day, 2021

 Mawkyrwat, Lber 22, 2021: Ka ophis jong u Executive Engineer, PHE cum Member Secretary, DWSM (JJM), South West Khasi Hills District, Mawkyrwat ka la pynlong ïa ka jingrakhe ia ka World Water Celebration, 2021 halor ka phang “niewkor ia ka um” kaba la pynlong hapoh PHE Hall, Mawkyrwat. 

Haba kren kum ka kongsan ha katei ka sngi ka kong C. Kharkongor, IAS, Deputy Commissioner, South West Khasi Hills District, Mawkyrwat ka la ong ba “ka um ka long ka jingim haka ba ngi ki briew, ki mrad, ki sim ki doh bad ki jingthung jingtep ki donkam eh”. Ka la buh ka jingkylli ba balei ngi ki briew ngi la poi haduh kane ka apot ba ngim ioh shuh u slap u ba biang, ngi ioh ia u slap ha ka por bym dei slap bad da slap la mih sa ki jingeh na ka daw jong ka jingslei um kaba ktah ia ka jingim jongngi. Ka la ong ba ka jingleh jongngi ki briew ka pynkylla ia ka jinglong ka mei mariang ha kaba ki bad ki lum ki wah ki tyrkhong bad jakhlia, ki dieng ki siej ki la shah pom patar, ki klaw ki la pluh bad ki dohum dohwah ki la shah dusmon. Ka la ong ruh ba ka jingleh jongngi ki briew ka wanrah bun jait ki jingpang kum ka pynhiar, suhot, prie, jyrhoh, sahiaw bad kiwei de. Te namarkatta, ka la kyntu ba ngi dei ban burom bad tyngkai ia ka mei mariang. Ka la bynrap ruh ba bunsien ngi khein ia ka um ba ngi shu iohei bad ngim niewkor iaka hynrei ka la ong ba ka la dei ka por ba ngin khein kor ia ka bad sdang ban kylla ia ka rukom pyrkhat pyrdain bad jinglong jongngi da kaba ngi pyrshang ban pynlang ia ka um. Ka la ong ruh ba ka khlam COVID-19 ka pyni ruh iangi ba na ki 3 tylli ki jingdonkam ban iada na katei ka klam ka dei ka jingsait ia ki kti na ka por sha ka por da ka um bad ka sabon bad lada ngim lah ban leh iaka kan kham jynjar ban tehlakam ia ka. Ka la kyntu ruh ba ka jingburom bad niewkor jongngi ia ka um ka long ba ngin sumar ia ki tyllong um bad ngim dei ban bret jakhlia pathar.

Ka kong H. Suja, IEC Consultant (JJM) ka la kren halor ka phang “niewkor ia ka um”. Ka la ong ba ngi donkam ban niewkor bad pynneh pynsah ia ka um khnang ba ngin lah ban ïoh ïa ka jingbha ha ka imlang sahlang bad ha ka pateng ban sawan. Ka la ong ruh ba ka jingkyrduh um ka lah ban wanrah ia ka jingiapait ha ki shnong ki thaw, ka wanrah ia ka khlam ba pynjot ia ka jingim ka jongngi, ki jingri jingdup, ki jingthung jingtep bad baroh kiba don jingim ha ka pyrthei. Ka la bynrap ruh ba ka thma bah balai ka lah ban wan tang namar ka um te namarkatta, ka long kaba donkam eh ban iada ia ka um da kaba kiar na ka jingpom pathar ia ki dieng ki siej, pynjakhlia ia ka um ban ban tynkai ia ka. Ka la ai jingmut ba ngin pyrshang ban bud ia ki lai tyllli ki ‘R’  (reduce,  reuse & recycle ) da kaba pynduna ia ka jing pyndonkam ia ka um,  pyndonkam biang ia ka, pynkhuid biang ïa ka um bad to ngin kyndit bynriew katba ym pat dier ka por. 

U bah Wanlambok Warbah, ASWCO, Soil and water conservation u la kren halor ka phang ‘Catch the rain where it falls and when it falls’.

Ha katei ka jingrakhe ia ka World Water Day, 2021 u bah S. Snaitang, EE PHE Mawkyrwat Division u la kren maitphang, U bah R. Nongdhar, SDO (PHE), Mawkyrwat Sub-Division u la ai ia ki kyntien lamphrang, u bah Steven Roy Wahlang, District Coordinator, JJM u la pyniaid ia katei ka jingialang bad ka kong L. Lyngdoh, HRD Coordinator ka la ai ia ki kyntien ai khublei. Ka la don ruh ka jingpyni bad batai (exhibition) halar ka JJM ba la leh da u bah T. Lyngkhoi, ka jingshim smai ban sumar ia ka um, ka skit na ka kynhun Ionglajong bad ki jingpyniakop draw bad rwai. Ha ka jingiakop rwai ‘sur tynrai (folk songs)’ ka Presbyterian Secondary School, Mawlangwir ka la ioh ia ka nam lahduh ba la bud da ka Little Star H.S School, Mawkyrwat ha ka kyrdan kaba ar bad ka Nativity H.S School ka ia ioh ia ka kyrdan kaba lai. Ha ka jingiakop rwai solo ka Biamon Marbaniang ka la wan nyngkong, ka Dawanhun Lyngdoh ba-ar bad ka B. Diengdoh ka la wan balai bad kine baroh lai ki dei ki khynnah na Nativity H.S School, Mawkyrwat. Ha ka drawing bad painting competition la ioh ia ka nam lahduh da u David Dkhar bud sa u Damebantei Marbaniang bad ka Julie Grace Syiemlieh ka la wan ha ka kyrdan ka ba-lai.

Rakhe ka ophis DMHO SWKHD ïa ka National Oral Health Program (NOHP) ha Ïew Mawkyrwat

Mawkyrwat, Lber 20: Ka ophis jong u District Medical and Health Officer (DMHO), South West Khasi Hills District, Mawkyrwat, mynta ka sngi ka la ïoh ban pynlong ïa ka National Oral Health Program (NOHP) ha Ïew Mawkyrwat bad ka phang pdeng jong ka ne ka prokram ka long “Sarong ïa la ka jong ka shyntur” (Be proud of your mouth). 

            Haba kren ha ka jingïalang, u Dr. P.M. Nadon, District Nodal Officer jong ka National Tobacco Control Program (NTCP), South West Khasi Hills District, u la ong ba kane ka dei ka sngi ba kyrpang ban kynmaw ïa ka jingkordor jong ka shyntur namar ka shyntur kaba khuid bad ba koit ba khiah ka lah ban pynjrong ïa ka jingim u briew. 

            U la ong ruh ba khnang ba yn lah ban ïoh ïa ka shyntur kaba koit kaba khiah, ka donkam ban da sumar ïa ka man la ka por. 

            “Ka shyntur ka dei ka lynti ban pynrung ïa ki jingbam ba bun jait ha ka met u briew (gateway to the body) la ka long ki jingbam kiba thiang ne kiba kthang ruh”, u la ong. 

            Kumta u la pynkynmaw ba ka long kaba donkam ba kum ki briew ki dei sumar bha ïa la ka shyntur naduh ki bniat, u thyllej bad baroh ki bynta kiba don hapoh ka shyntur namar ba ka shyntur hi ka pyni ïa ka jinglong jong ka met hi baroh kawei. “Lada u briew u don ïa ka met kaba koit ba khiah, ka mut ka shyntur ka la pyni nyngkong. Shwa ba ngin tip shapoh, ngin tang shi peit ïa ka shyntur ha ka jingim ba man la ka sngi jong ngi, ngi lah sngewthuh kaba kumno ka met jong u briew ka don. Lada ngi tang shu ïohi ba ki don ki jingthut ha ki dohbniat, ngi lah ban sngewthuh ba lehse ki dei kiba don ïa ka jingpang shini lane ïa kano kano ka jingpang”, u la ong.

            U la kren ruh shaphang ki san tylli ki kyndon (five golden rules) ba ki briew kin bud khnang ban sumar ïa la ka shyntur ban lait na kino kino ki jingpang ha ka shyntur. Kaba nyngkong ka long ban shut bniat ar sien ha ka shi sngi la kumno kumno kumba ar minit ei ei. Kaba ar ka long ban pynkhuid ïa ka shyntur man ba la dep bam da kaba kynruh da ka um khnang ba ki jingbam kin ym sahkut ha ki bniat. Kaba lai ka long ban kiar na ki jingbam kiba thiang khamtam eh na ka bynta ki khyllung. Kaba saw ka long ban bam ïa ki jingbam kiba jyrngam kum ki jhur im. Kaba san ka long ban phah ïit (check up) ïa ki bniat la kumno kumno man ka hynriew bnai.        

            U la kren ruh shaphang u duma u ba long u wei na ki jingdih kiba pynthut tam ïa ka met jong u briew ym tang ïa u ta u nongdih hynrei ïa baroh kiba lah ban shah ktah lyngba ka jingdih duma jong u ta u wei. U la ïathuh ruh ba u duma u don ïa kata ka nicotine u ba ka bih jong u ka long kham sniew shuh shuh ban ïa kiwei pat ki jait jingdih. Halor ka jingktah na u duma, u la ong ba u duma u lah ban pynïoh ym tang ïa ka jingpang bampong hynrei ïa kiwei pat ki jait jingpang kum ka stroke bad kiwei kiwei.

            U la kren ruh shaphang ka jingpynkheiñ ïa ka jingdih duma ha ki jaka paidbah. U la pyntip shaphang kita ki jaka paidbah kiba ki briew kim dei ban dih duma namar ba lada lap ïano ïano u ba leh kumta kamut ba u la pynkheiñ ka kata ka Section 4 jong ka aiñ ‘The Cigarettes and Other Tobacco Products Act, 2003 (COTPA)’ kaba mana ban dih duma ha ki jaka paidbah. U la kren ruh shaphang ka Section 6 kaba khang pyrshah ïano ïano ban die duma ne sikret ha ki khynnah kiba hapoh ïa ka 18 snem ka rta bad kam shah ruh ban kin buh ïa ki dukan die sikret ha syndah jong ka skul hapoh ka 100 yards na ka skul. U la ïathuh ruh ba ka jingdaiñ kuna na kaba pynkheiñ ïa kine ki aiñ ka long naduh T. 5 haduh T. 200. Lada yn lap biang ïa u juh u briew uba pynkheiñ ïa kane ka aiñ, yn sa ai ïa u ta da ka challan bad yn khot ïa u shapoh ka Kashari jong ka distrik.

            Ha kane ka sngi la ïa donlang ki u DHMO ka South West Khasi Hills District, u Dr. F.R. Lartang, bad ki katto katne ki nongtrei jong ka koit ka khiah. La pynshit pynshngaiñ ruh ïa kane ka jingïalang lyngba ka drama lyngkot na ka Ïonglajong Musical Socio & Cultural Organisation (ÏMS&CO), Mawlangwir bad ka jingshad.

            Ha kane ka juh ka sngi la ïoh ruh ban sam paidbah ïa ki Colgate bad ki brut shut bniat sha ki paidbah bad kumjuh ruh la ïoh ruh ban leit tah ïa ki jingthoh (poster) hapoh Ïew Mawkyrwat ban pynsngewthuh shuh shuh ïa ki paidbah halor ki jingsniew jong u duma, sikret bad kiwei de ka ba ktah ïa ka koit ka khiah jong ki briew.

Ai jinghikai bad sam ia ki symbai jong ki jingthung ba tei met ha ka jingrakhe ia ka Poshan Pakhwada ha SWKHD

 Mawkyrwat, Lber 19, 2021: Ka ophis jong ka Child Development Project Officer, Integrated Child Development Scheme (ICDS), Mawkyrwat ha ryngkat ka jingiatreilang bad ka District Agriculture Office, District Horticulture Office bad ka ophis jong u EE, PHE, Mawkyrwat mynta ka sngi ki la pynlong ia ka prokram ai jinghikai halor ki jingthung kiba ai ia ki jingbam ba tei met ha ryngkat ka jingsam ia ki symbai jingthung na ka bynta ban sdang ia ki Poshan Vatika sha ki Anganwadi Centre bad ha ki sawdong sawkun jong ka shnong. Ka kong C. Kharkongor, IAS, Deputy Commissioner, South West Khasi Hills District, Mawkyrwat ka la long ka kongsan ha katei ka prokram ba la iashim bynta da ki 60 ngut ki nongtrei Anganwadi (AWWs) bad ki ophisar Sorkar jong ki tnad bapher bapher kaba la pynlong hapoh PHE Hall, Mawkyrwat. Ka DC ka la sam ruh ia ki symbai jingthung ha ki Anganwadi workers ba kin ioh ban sdang ban ia ki kper rep ha phyllaw anganwadi centre jongki.

Haba kren ha katei ka sngi ka kong C. Kharkongor ka la ong ba bun ki khynnah rit kim ioh ka jingbam kaba tei met bad ki ioh ka jingpang duna bam (malnutrition), jinglyngkot (stunting), jingduna thew (underweight), jingpang duna snam (anaemia) bad kiwei de ki jingpang. Ka la iathuh ruh ba khnang ban kyntiew ia ka koit ka khiah hapoh ka ri u Prime Minister Narendra Modi u la plie pyrda ia ka Poshan  Abhiyaan ha ka 8 tarik Lber, 2018 bad ban rakhe ia ka Poshan Pakhwada bad Poshan Maah man la u snem. Ka la pyntip ba ka phang pdeng jong ka jingrakhe ba saw taiew jong ka Poshan Pakhwada ka long “kumno ban wat lad ban kyntiew ia ka jing duna bam da kaba thung ia ki jing thung ba tei met ha ki kper ha phyllaw iing jongngi”.  Ka la kyntu ba baroh ki Anganwadi ki dei ban sdang ban thung ki jhur ba tei met bad ba khlem ai dawai ha ki anganwadi centre jongki bad ai ia ki khyllung, ki longkmie ba armet bad ia ki ba dang aibuin khyllung da ki jhur tei met ba ki rep hi khnang ba kin ioh ia ka met ka ba koit ba khiah. Ka la pynshlur ruh ia ki ba kin iasnoh bynta lang bad ki SHGs ha ki shnong ki thaw jongki khnang ba kin ioh ia kiwei pat ki jingiarap. Ka la pynkut da kaba ong ba lada ki khyllung, ki longkmie bad ki longkpa ki khiah krat bha ka district bad ka jylla hi baroh kawei kan sa long kaba khiah krat bha.

Ka kong I. Lakiang, ADH, District Horticulture Office, Mawkyrwat ka la kren halor ka phang kumno ban shna sboh na ki phlang ki kynbat, kumno ban pyndonkam ia ka ha ka jaka jong ki dawai bad kumno ban thung ki jingthung khlem da ai ki dawai (fertilizers) ba shu thied na iew. Ka la ong ruh ba ka jingbam ka dei kaba kongsan eh ha ka jingim jong ngi bad haba ngi bam ka jingbam jongngi ka dei ban kynthup ia baroh ki jait vitamin, minerals, protein, ki soh bad kiwei kiwei de khnang ba ngin ioh ka met ba koit ba khiah krat bha. Ka la bynrap ba ka jingbam kam dei ba ngin bam tang ban kdang hynrei ba kan kylla long doh long snam ha ngi bad tei iangi. Ka la kyntu ba baroh ki dei ban sdang ban shna hi ia ka sboh bad haba thung ia ki jingthung ha ki kper jongki ki dei ban pyndonkam da ka sboh ba ki shna hi ym da ki sboh dawai bat hied na iew namar ba ka ktah ia ka koit ka khiah jong ki hi bad jong baroh ki nongbam ia kitei ki jingbam. Ka la bynrap ruh ba ki anganwadi ki dei ban long ki nongrah khubor sha ki shnong ki thaw jongki bad wanrah ka jingkylla ha ka imlang sahlang.

Ka IEC Coordinator jong ka JJM, EE, PHE Office, Mawkyrwat ka kong H. Suja ka la kren halor ka phang ka jingdonkam jong ka um kaba khuid. Ka la ong, “Ka um ka dei ka jingim” bad ka jingdonkam jongka ka ka long ryngkat dor bad ka jingdonkam jongngi ia ka lyer, ka bam bad kiwei de. Ka la bynrap ruh ba ngi dei dei ban long kiba husiar ban sumar ïa ka mariang khamtam lei lei ia ka um namar ba lada ngi pynjot iaka mynta ka lawei ban sawan kan sa mat tang ki jingeh suda. Ka la iathuh ruh ba ka thong jong ka Jal Jeevan Mission (JJM) ka long ban pynpoi ia ka umbam umdih kaba khuid ba suba sha man la ki thliew iing hynrei ban sumar pat ia ki ka long ka kamram jong ki trai ba ioh ia kitei ki kor um. Ka la kyntu ba ngi dei ban long ki nongsumar ia ka mei mariang khnang ba ki jingkyrkhu jongka kin ym kut tang ha ka pateng ba mynta hynrei ha ka lawei ban sawan ruh kumjuh.

Ha katei ka prokram ai jinghikai ba la pyniaid da ka kong B. Nengnong, DPO, ICDS Cell, Nongstoin, la pdiang sngewbha da ka kong Heli Sahkhar, CDPO, Mawkyrwat bad la kren ai khublei da u bah C. Massar, CDPO, Ranikor.