Rakhe ka ophis DMHO SWKHD ïa ka National Oral Health Program (NOHP) ha Ïew Mawkyrwat

Mawkyrwat, Lber 20: Ka ophis jong u District Medical and Health Officer (DMHO), South West Khasi Hills District, Mawkyrwat, mynta ka sngi ka la ïoh ban pynlong ïa ka National Oral Health Program (NOHP) ha Ïew Mawkyrwat bad ka phang pdeng jong ka ne ka prokram ka long “Sarong ïa la ka jong ka shyntur” (Be proud of your mouth). 

            Haba kren ha ka jingïalang, u Dr. P.M. Nadon, District Nodal Officer jong ka National Tobacco Control Program (NTCP), South West Khasi Hills District, u la ong ba kane ka dei ka sngi ba kyrpang ban kynmaw ïa ka jingkordor jong ka shyntur namar ka shyntur kaba khuid bad ba koit ba khiah ka lah ban pynjrong ïa ka jingim u briew. 

            U la ong ruh ba khnang ba yn lah ban ïoh ïa ka shyntur kaba koit kaba khiah, ka donkam ban da sumar ïa ka man la ka por. 

            “Ka shyntur ka dei ka lynti ban pynrung ïa ki jingbam ba bun jait ha ka met u briew (gateway to the body) la ka long ki jingbam kiba thiang ne kiba kthang ruh”, u la ong. 

            Kumta u la pynkynmaw ba ka long kaba donkam ba kum ki briew ki dei sumar bha ïa la ka shyntur naduh ki bniat, u thyllej bad baroh ki bynta kiba don hapoh ka shyntur namar ba ka shyntur hi ka pyni ïa ka jinglong jong ka met hi baroh kawei. “Lada u briew u don ïa ka met kaba koit ba khiah, ka mut ka shyntur ka la pyni nyngkong. Shwa ba ngin tip shapoh, ngin tang shi peit ïa ka shyntur ha ka jingim ba man la ka sngi jong ngi, ngi lah sngewthuh kaba kumno ka met jong u briew ka don. Lada ngi tang shu ïohi ba ki don ki jingthut ha ki dohbniat, ngi lah ban sngewthuh ba lehse ki dei kiba don ïa ka jingpang shini lane ïa kano kano ka jingpang”, u la ong.

            U la kren ruh shaphang ki san tylli ki kyndon (five golden rules) ba ki briew kin bud khnang ban sumar ïa la ka shyntur ban lait na kino kino ki jingpang ha ka shyntur. Kaba nyngkong ka long ban shut bniat ar sien ha ka shi sngi la kumno kumno kumba ar minit ei ei. Kaba ar ka long ban pynkhuid ïa ka shyntur man ba la dep bam da kaba kynruh da ka um khnang ba ki jingbam kin ym sahkut ha ki bniat. Kaba lai ka long ban kiar na ki jingbam kiba thiang khamtam eh na ka bynta ki khyllung. Kaba saw ka long ban bam ïa ki jingbam kiba jyrngam kum ki jhur im. Kaba san ka long ban phah ïit (check up) ïa ki bniat la kumno kumno man ka hynriew bnai.        

            U la kren ruh shaphang u duma u ba long u wei na ki jingdih kiba pynthut tam ïa ka met jong u briew ym tang ïa u ta u nongdih hynrei ïa baroh kiba lah ban shah ktah lyngba ka jingdih duma jong u ta u wei. U la ïathuh ruh ba u duma u don ïa kata ka nicotine u ba ka bih jong u ka long kham sniew shuh shuh ban ïa kiwei pat ki jait jingdih. Halor ka jingktah na u duma, u la ong ba u duma u lah ban pynïoh ym tang ïa ka jingpang bampong hynrei ïa kiwei pat ki jait jingpang kum ka stroke bad kiwei kiwei.

            U la kren ruh shaphang ka jingpynkheiñ ïa ka jingdih duma ha ki jaka paidbah. U la pyntip shaphang kita ki jaka paidbah kiba ki briew kim dei ban dih duma namar ba lada lap ïano ïano u ba leh kumta kamut ba u la pynkheiñ ka kata ka Section 4 jong ka aiñ ‘The Cigarettes and Other Tobacco Products Act, 2003 (COTPA)’ kaba mana ban dih duma ha ki jaka paidbah. U la kren ruh shaphang ka Section 6 kaba khang pyrshah ïano ïano ban die duma ne sikret ha ki khynnah kiba hapoh ïa ka 18 snem ka rta bad kam shah ruh ban kin buh ïa ki dukan die sikret ha syndah jong ka skul hapoh ka 100 yards na ka skul. U la ïathuh ruh ba ka jingdaiñ kuna na kaba pynkheiñ ïa kine ki aiñ ka long naduh T. 5 haduh T. 200. Lada yn lap biang ïa u juh u briew uba pynkheiñ ïa kane ka aiñ, yn sa ai ïa u ta da ka challan bad yn khot ïa u shapoh ka Kashari jong ka distrik.

            Ha kane ka sngi la ïa donlang ki u DHMO ka South West Khasi Hills District, u Dr. F.R. Lartang, bad ki katto katne ki nongtrei jong ka koit ka khiah. La pynshit pynshngaiñ ruh ïa kane ka jingïalang lyngba ka drama lyngkot na ka Ïonglajong Musical Socio & Cultural Organisation (ÏMS&CO), Mawlangwir bad ka jingshad.

            Ha kane ka juh ka sngi la ïoh ruh ban sam paidbah ïa ki Colgate bad ki brut shut bniat sha ki paidbah bad kumjuh ruh la ïoh ruh ban leit tah ïa ki jingthoh (poster) hapoh Ïew Mawkyrwat ban pynsngewthuh shuh shuh ïa ki paidbah halor ki jingsniew jong u duma, sikret bad kiwei de ka ba ktah ïa ka koit ka khiah jong ki briew.