Pynduhjait ia ka Jingbamsap: U Anna u dei ban pynkyndit bynriew iangi.

Pynduhjait ia ka Jingbamsap: U Anna u dei ban pynkyndit bynriew iangi.

Bamsap, Bamsap, Bamsap ka jingbamsap ka la bamsap shisha iaka jingmut jingpyrkhat jongngi, ka spah ka phew jongngi bad iaka jingiadei jongngi bad ki parabriew ne bad u Blei.

Ha kine ki sngi ba lah dep ngi iohi ka jingialeh ba shyrkhei ba u Anna Hazare bad ka kynhun jong u ki la ioh ia ka jingkyrshan u paidbah namar ba ki briew ki la isih ia ka jingjyllei ka jingbamsap ha ka ri India jongngi. Hadien ka jingiakren hapoh Parliament shaphang ki kyndon ba u Anna u la pan, u Prime Minister Manmohan Singh ula thoh ka shithi sha u ha ka 26 tarik jong u August, 2011, bad u la ong ba ka Parliament ka la mynjur ia ki lai tylli ki kyndon bad kita ki long (1) ka Citizen Charter, (2) Ban pynhap ha ka Lokpal ia ki ophisar ba rit kyrdan ruh bad (3) ban sdang Lokayuktas ha ki State. U Anna Hazare u la jop bad ngi dei ban sngewsarong ba ka sorkar ‘jong’ u paidbah, ‘da’ u paibah bad ‘ia’ u paidbah ka la sngap ia u paidbah ban ialeh pyrshah iaka jingbamsap. Ka sorkar ka la mynjur ia u paidbah ban ialeh pyrshah ia ka jingbamsap. Ngi dei ban peit sani ba ka sorkar kan pynurlong shisha ne em?

Ngi dei ban iaroh ia U Anna Hazare bad ka kynhun jong u namar ba ki la ialeh pyrshah ban pynduh ia ka jingbamsap ha ka ri jongngi. Hynrei ia ka lynti kaba u Anna u lah shim da kaba leit shah thngan ha Ramlila bad ka jingsait jabieng ia u paidbah nga tharai kam dei ka lynti ban leh. Ha Mumbai la don iwei I longkmie iba la sdien phasi ialade kum ka jingkyrshan ia u Anna, bad mynta I khun jongi ba dang 10 snem I hap ban im khlem kmie shijingim. Bun ki ba la mynsaw jur ba ki la pyrhsang ban thombor ban rung ha phyllaw Parliament bad ki Pulit ki la sympat iaki. Bun ki nongkyrshan jong u Anna kiba la shah thngan ki la shah kit sha hospital bad napdeng jongki ki la ioh jingpang bajur bad hap ban jynjar baroh shijingim. I paralok jongnga na Delhi I la iathuh ba ka jingim ha Delhi ka long kaba tieng bha namar kim tip lano kin shah kem shah tied, ki kam ki jam ki la dkhoh bad la dap tang da ki jakhlia suda. Ki skul ki college ki la khang ban kyrshan ia U Anna. Ki briew ha Ralegoan Sidhi, shnong u Anna, ki la khie syllen ia ka khlieh bad don kiba la thoh “Nga dei u Anna” bad iaid lyngkhuid ha ki surok. Da ki phew hajar tyngka ki la theh iaka pisa hakane ka jingialeh ha ka jaka ban pynroi pynpar. Hato ka dei seh mo ban ialeh ia ka jingbamsap ha kane ka rukom? Kham kordor ka pisa ne kham kordor ka jingim, ka burom ka akor, ka jingkoit jingkhiah, ka jingnang jingstad?

Ka jingialeh pyrshah u Anna Hazare bad u paibah ia ka jingbamsap ka dei ban pynkyndit bynriew iangi ki khun Khasi. Sngewsih ban ong baka jylla Meghalaya ka long ka wei naki jylla ba bamsap tam ha ri India. Kumno sha ngi ki Khasi ngim lehrain ban bamsap ne leh tuh haba ngi khot ialade ki khun “ba tiphok tipsot, ki khun ba tipbriew tipblei”? Lada ngi ngeit ba u Blei u la ai ia ki ain ki kanun bad la hiar pateng shangi, Balei mo ngi pynkhein ia ki ain U Blei ne jong u Longshuwa manshuwa? Ki briew mynta haba ki leit wat kam kin ym iohkam dalei lei ruh em khlem da ai pisa ne don jingiadei, hato kane kam dei she mo ka jingbamsap? Ngi dei ban kiar naka ka jingbamsap ym dei tang namar ba ka pyniajngai iangi na U Blei hynrei namar ba;

1. Ka jingbamsap ka bamsap ia ki jingmut jingpyrkhat jongngi

Ki briew haba ki bamsap ki pyrkhat tang kumno ban ioh khambun ka pisa. Ka jingmut jingpyrkhat ka long tang ha ka spah pyrthei. Ka jingmut jongngi kam long shuh kaba laitluid ban pyrkhat kum u Soso Tham, u Shakespeare, U Socrates ne kum kino kino ki briew bakhraw kiba pyrkhat laitluid bad kiba thoh ba kren ia kaei kaba mih naka dohnud. Ka jingbamsap ka hikai iangi ban leh tuh ha ka jaka ban lehbha, ban im arsap ha ka jaka ban im kum ki paralok bad ban pyndonkam ia ka pistol ha ka jaka ban pyndonkam ia u khulom bad ia ka jabieng. Ka jingbamsap ka pynkulmar jingmut iangi.

2. Ka jingbamsap ka bamsap iaka ioh ka kot jongngi

Ngi ki Khasi ngi don ka ain ban ‘Kamai iaka hok bad ban im tiphok tipsot’. Ka jingkhwan shimet ka la wanrah iaka jingbamsap. Ki briew mynta ki kwah ban trei malu mala bad kwah pat ban ioh iaka ba bha tam, ki kwah ban trei khyndiat bad ioh pat shibun, bad ki kwah ban shu bamsuk na ka umsyep kiwei. Ki ba riewspah ki kham riewspah da ka jingbamsap bad ki ba duk kin hap im kyrduh. Ha ka kamai kajih ki briew kim iohshuh iaka ba dei hok namar ki la hap ban iaid lyngba bun ki nongbamsap ban iohdie iohthied. Hadien ba la ioh pisa ne spah shibun kin leh kumno iaka? Kim lah ban bam, ban thiah, ban ioh jingkoit jingkhiah ne ban im ka kyrteng bad sah ka nam.

3. Ka jingbamsap ka bamsap iaka jingiadei parabriew

Balei U Anil bad Mukhesh Ambani ki iashun iashrut hadien ba ki iohlut katba ki kwah? Dei naka daw ba ka spah pyrthei kam ai jingsuk, pynpan ka pynsniew iangi. Mynta wat ha ka longiing longsem ruh la kynrei ka jingbamsap. U/ka lok haba ki die ki jhur ki jhep ne ki mar ki mata kim wanrah ne iathuh hok ha iing iaka jingioh namar ki kwah ban pynat iaka pla. Mynta shipara ki ia bishni bad bamsap ha ka jingiadie ne bhah ia ki khyndew ki shyiap. Wat shiparalok ruh la duna ka jingshaniah namar ka jingbamsap. Khie lei twat kam sha Meghalaya wat lada lait post sorkar makna phin ym ioh khlem pat da ai pisa. Ka jingbamsap ka pynjngai iangi na ki bahaiing hasem, na ki kur ki kha, ka ki long ki jor bad na ki paralok.. K ajingbamsap ka long kum ka bih ha ka jingim briew.

Kawei ka jingsniew kan ialam iangi sha kawei pat ka jingsniew haduh ba ka jingsniew kan synshar iangi. Ko khun Khasi khara, ko khun tiphok tipsot to kein ngi ia kyndit bynriew noh mynta bad kum U Anna Hazare ngin ialeh pyrshah iaka jingbamsap. Ngim dei ban sangeh ban ialeh pyrshah iaka jongbamsap haduh ba ngin da jop bad pynlong ia ka ri bad khamtam lei ka jylla Meghalaya jongngi kum ka ri Taiwan bym don jingbamsap. To ngin ym ailad iaka jingbamsap ba kan synshar iaka jingim, jingmut jingpyrkhat, ka longing longsem bad ia ki kam ki jam jongngi. Ngi dei ban ialeh pyrshah ia ka jingbamsap haduh ba ki briew kin sngewthuh ba ka jingtep eitmiaw ia ka jingsniew kan sa pynjot pyntwa iangi. Ngi dei ban phikir, kiar bad ialeh pyrshah iaka jingbamsap shuwa ba kan bamsap bad pynjot pyntwa iangi.

Khublei Shibun