Prayer of the Faithful during Christmas

Ka Jingduwai Ki Riewngeit ha ka Kristmas

1.     Ka Por Kristmas ka dei ka por jong ka jing kyrkhu. Ngi duwai na ka bynta ka  Balang, ba U Blei un kyrkhu ia ka balang jongngi hakane ka por advent da ka da ka mynsiem sngewrit, iarap lem bad iamap khnang ba ka balang jongngi kan suhthied ha ka jingieid, jingsuk, bad jingiatylli. Na ka bynta kane ngi kyrpad ia me ko Trai.

2.     Ka por Kristmas ka dei ka por ba wanrah jingshai. Ngi duwai na ka bynta U Kpa Bakhuid jong ngi U Pope Francis. U Pope Francis u long u briew ba jylliew ha ka jingngeit, ba ieid ia ki baduk, ba pynshlur ia ki samla, ba ai mynsiem ia ki longing longsem bad ba ai jingkyrmen ia ki phadar bad ki riewniam. Ngi duwai naka bynta jong i ba U Blei un kyrkhu ia i da ka jingshai U Krist khnang ba un nang iai lah ban ialam ia ka balang Katholik jongngi sha ka Jingshai U Krist. Na ka bynta kane ngi kyrpad ia me ko Trai.

3.     Ka por Kristmas ka dei ka por jong ka jingpynbna. Ngi duwai naka bynta ki Bishop, phadar, ki brodar, ki sistar bad baroh kito ki ba pynpriang ia ka khubor ba bha jong U Jisu ba U Blei un nang iai kyrkhu ia ki da ka mynsiem jong ka jingshlur, un ai ia ki ka met ba koit ba khiah bad ka mynsiem len lada ban dup lah ban pynbna ia ka khubor babha jong U Jisu kylleng satlak ka pyrthei. Na ka bynta kane ngi kyrpad ia me ko Trai.

4.     Ka por Kristmas ka dei ka por ban pynsuhthied ia ka jingieid jongngi bad U Blei bad ruh bad ki parabriew. Ngi duwai naka bynta ki pa pang ba shitom, ki ba duk ba toi, ki khunswet khun rangli bad ia baroh kito ki parabriew ki bym ioh jingieid, jingkmen ha kane ka pyrthei ba U Blei un bsuh ia ka mynsiem sngewlem ha ki parabriew ban iarap bad duwai ia ki. Na ka bynta kane ngi kyrpad ia me ko Trai.

5.     Ka por Kristmas ka dei ka por jong ka jinglen ialade. Ngi duwai na ka bynta ki nongshynshar ia ka ri bad ka jylla jongngi, Na ka bynta ki NGO bapher bapher bad ki briew ba trei na ka bynta ka jingbha ki parabriew ba U Jisu un kyrkhu ia ki da mynsiem ba luilui, ka mynsiem trei hok bad ka mynsiem ban long kum ki nongsharai ym kum ki nongbishar. Na ka bynta kane ngi kyrpad ia me ko Trai.

6.     Ka por Kristmas ka dei ka por jong ka jingiatylli. Ngi duwai naka bynta ki longing longsem ki ba la iapaid iapra ba U Blei un pyniatylli biang iaki ba kin don ka mynsiem sngewthuh, ba kin iamap bad ba kin iaieid biang. Na ka bynta kane ngi kyrpad ia me ko Trai.

7.     Ka por Kristmas ka dei ka por jong ka jingkmen. Ngi duwai na ka bynta i mei-i pa, ki hynmen ki para bad ki ba haiing ha sem jongngi ba U Khunlung Jisu un wanrah ka jingkmen, jingieid, jingsuk bad jingkyrkhu ia ki iing ki sem jongngi. Na ka bynta kane ngi kyrpad ia me ko Trai.

8.     Ka por Kristmas ka dei ka por ban kham pynjanai ia ka jingim jongngi. Ngi duwai na ka bynta jongngi i wei pa iwei ki ba don lang hangne ba U Jisu yn kyrkhu iangi da ka mynsiem ban kham trei shitom ha ki kam ki jam jongngi, ban kham pynleit jingmut ha ka pule puthi jongngi bad ba ngin don borabor hapdeng ka met ka bakoit ba khiah. Ngi duwai ruh na ka bynta baroh ki member ka BCCM ki ba la leit nangne na Bangalore bad ki bym lah ban wan ha kane ka sngi. Na ka bynta kane ngi kyrpad ia me ko Trai.