Ka jingbthah ban tehlakam ia ka jingsaphriang jong u khniang jingpang COVID-19

I Deputy Commissioner, South West Khasi Hills District katkum ka jingbthah ba la ioh na ka World Health Organization (WHO), ka shithi ba la phah da ka tnad Health and Family Welfare Department, Government of Meghalaya bad ka shithi na ka Ministry of Home Affairs, Government of India ban tehlakam ia ka jingsaphriang jong u khniang jingpang COVID-19 (Corona Virus) bad kum ka lad jingiada iaki nongshong shnong jong ka district ka kyrpad ia ki nongshong shnong ba kin pyntreikam bad bud pyrkhing ia kine ki kyndon harum:

1.      Lada don kino kino kiba wanphai na ki ri ne ki jylla bapher bapher ba la shah ktah ha u khniang jingpang Corona Virus ki dei ban pyntip mar mar sha u toll free number 108 ne sha District Control Room number 9485395373. Ki dei ban bud pyrkhing ia ka jingshong marwei (self quarantine) kaba 14 sngi bad lada don kino kino ki dak ki shin jong u COVID-19, kum  jingsuhkhriat, ka jyrhoh, baiongkhlieh, jingbym lah ban ring mynsiem, jingthait bad jingpang met ki dei ban pyntip mar mar sha ka Medical Team ne Control Room jong ka District.

2.      Baroh ngi dei ban sait bha borabor ia ki kti da ka sabon bad ka um kumba 20 second eiei, lane pyndonkam da ka sanitizer.

3.      La kyrpad ia ki paidbah ban ym biah/bynthiew pathar bad ha kajuh ka por la kyrpad ba kin tap ia ka shyntur bad ka khmut haba jyrhoh, synriah bad shitmet da ki rumal, jingda ne ki mask khnang ba kan long kum ka jingiada haba ki jyrhoh ne synriah bad ba kan ym bit ia kiwei. Bad ia ki mask phi dei ban da sait borabor ynda phi la dep pyndonkam ia ki.

4.      Bret ia ki tissue, ki jingsopkti ne ki mask kiba phi la dep pyndonkam ha ki tin niut bad don jingtap.

5.      Ki Paidbah ki dei ban pyrshang ban iajngai parabriew (Social distancing) bad ban shong khop hala ki shnong ki shnong ne ki jaka (community isolation) kaba long tang ka lad ban iada ia ka jing saphriang jong ka jingpang COVID-19.

6.      Haba phi iakynduh ia ki paralok ne ki bahaing wat nym ia khublei kti, ktah, kdup, ne doh hynrei phi lah ban shu iakren kham pajih, ne haba ai khublei lah ban shu rah kti, kohnguh khlieh, dem lane Namaste.

7.      Ki paidbah ki dei ban mih na la iing la sem ne na ki shnong ki thaw tang lada ki donkam eh ban leit thied jingthied, leit shim dawai, ne kino kino ki jingdonkam ba kyrkhieh bad ba donkam man ka sngi.

8.      Yn ym shah ia ka jingialum ne jingkynduh briew palat ia ka 5 ngut ha ki jaka paidbah bad kiwei ki jaka ba shabar  na ki iing ki sem jongki.

9.      La khang shipor ia baroh ki jingialang paidbah kum ki jingiaseng, ki jingkhawai kyntiew kurim, ki Dorbar Shnong, ki Meeting ne kino kino ki jingiabam khana paidbah. 

10.  Ban pynsangeh noh shuwa ia baroh ki kynja tamasa kum ki Tournament bapher bapher, ki Inter-Dong, ne kino kino ki jingpynialehkai ia ki khynnah kiba wanrah ia ka jingbun paid ne jing bun briew.

11.  Lada don kino kino ki jingjia bym lah kiar kum ki jing iap briew ha ki shnong ki thaw, la shah ban pynlong ia ki jingiaseng ha ka sngi ontep bad dei ban shim khia ba ka jing don jong ki briew kan nym tam ia ka  20 (arphew) ngut. Katba lah ha kum kine ki iing dei ban pyntreikam ia ka jingiashong jngai ne kham pajih iwei na iwei pat la kumno kumno 1.5 M (shi meter shiteng) bad ban bud pyrkhing ia ka jingsait khuid ia ki kti ha man la ka 30 minit bad ban lehkhuid ia ki sawdong sawkun.

12.  Kito ki nongleit nongwan da ki kali paidbah  ki dei ban shimkhia ban sumar bha ialade da kaba deng ki mask, pyndonkam ia ki kti da ki sanitizer bad  ynda ki la poi ha iing ki dei ban da sum da sait bha. La kyrpad ruh ba kin sngewbha ban kiar na ki jaka paidbah kum ki iew bad kiwei kiwei. 

13.  La kyrpad ia ki Nongialam jong ki niam bapher bapher, ki rangbah shnong, bad kiwei kiwei ba kin ia trei lang khnang ban lah ban teh lakam na ka jingphriang jong kane ka jingpang.

14.  Ka jingpang COVID-19 ka pur lyngba ka jingiadei ne jingiakynduh bad kito kiba la ioh ia ka jingpang, watlada ka pyni ne kam pyni ki dak ki shin, te namarkata ka lad jingiada ba bha tam ban khanglad ia ka jingpur sted katei ka jingpang ka long ka jingiajngai parabriew, ka jingpyduna ban kynduh bad ki wei bad ka jing shong beit marwei ha ki jaka marwei (quarantine) jong ki briew ba la suba ba ki don ia katei ka jingpang ioh ki kylla long ki nongpynsaphriang ia katei ka jingpang.

15.  Ki nongdie dukan kim dei ban die tam dor ia ki marbam mardih bad ban ym buhrieh ia ki mar ki mata ha ka por ba wan shim jingkhein da ka office. Lada lap ia kino kino kiba leh pyrshah ia kane yn pynshitom ia ki katkum ki kyndon ain jong ka Essential Commodities Act 1955.

16.  Ki Wholesalers, Distributors bad Retailers jong ki marbam mardih bapher bapher kiba la song, kiba thep ha ki bilor, ne ki ba die madan hapoh ka jylla Meghalaya ba ki dei ban pynthikna ban peit ba kin ym die sha ki paidbah nongbam ia ki marbam mardih kiba la khleh (adulterated)/substandard/ba la duh (damaged)/ ne ba la kut ka tarik (expired) bad kumjuh ruh ki nongthied nongbam ki dei ban da peit bha ha ka por ba ki thied. Lada don kino kino kiba pynkhein yn shah pynshitom katkum ka kyndon ain jong ka Food Safety & Standard Act, 2006.

17.  Lada don kino kino kiba shemlanot bad mat jingeh na ka daw jong ka jingduna marbam mardih, jingbym don pisa ba la duh bylla, ka jingbymlah shuh ban wanphai shala iing la sem ne kiwei kiwei jingeh sngewbha ban pyntip sha ki Helpline number bapher bapher ba iadei bad ki jingeh jongphi.

18.  Ki number ban ai jingiarap ia ki paidbah jong ka District ki long

i.   District Control Room number 6909904336/603316297/9485395373.

ii.  U Helpline Number ia kiba la sahkut (Stranded Persons) u long 8258802600.

iii.U Helpline number na ka bynta ka jingdonkam ba kyrkieh ha ka koit ka khiah (Medial Emergencies) u long 8787788748.

iv. U Helpline number ban pyntip lada don kiba wan na bar ka Jylla  u long 9485395373

v.  U Helpline number ban  ai jingiarap pisa (financial assistance) ia kito ba la duh bylla bad bym ioh kiwei pat ki lad jingiarap u long 6009908007/ 8794890140 ne phi lah ban phah email lyngba ka email id: sdmalachmier@gmail.com

Kane ka long ka thma ban iakhun pyrshah ia ka jingsaphriang jong kane ka khlam na ka daw jong u khniang jingpang Corona Virus (COVID-19). Ka dei ka thma jong ka jingim bad ka jingiap. Ka jingiatreilang jong phi iwei pa iwei bad ka Sorkar  da kaba phin bud pyrkhing bha ia kitei ki mat bala kdew haneng ngin sa lah ban tehlakam bad jop ia ka jingialeh jongngi pyrshah ia u khniang jingpang COVID-19.