Ki Kyndon Treikam (SOPs) ban iada bad teh lakam ia ka jingsaphriang u COVID-19 ha ki jaka leh niam/Iingmane (SOPs at places of worship/ religious places)

Katkum ka Order No.POL.75/2020/Pt-I/108, dated 13 tarik Nailar 2021 ba la pynmih da u Chief Secretary, jong ka Sorkar Meghalaya bad hadien ka jingiamir jingmut lang bad ki nongialam niam , la shah ban plie noh ia ki  Iing mane/ Jaka lehniam hapoh ka district naduh 16 tarik Nailar, 2021 lem bad ka jingbud ryntih katkum kine ki kyndon ba la kdew harum:-

I.    Nongrim

Ki jaka leh niam/Iingmane ki dei ki jaka kiba bun bah ki briew kiba leit ban ioh jingtngen ha ka mynsiem. Ban iada ia ka jingsaphriang u COVID-19 kalong kaba donkam ba baroh ki dei ban bud pyrkhing ia ki kyndon sumar sukher bad ki lad jingiada ha kum kine ki jaka.

Ha kane ka kylla kaba ar jong ka khlam (second wave) shibun bah ki briew ki shah ktah na u COVID-19 tang namar ka jingiabit kloi (highly transmissibility) jong u Covid-19 (Delta Variant). Kumta, ka long kaba donkam eh ban shim ia ki lad jingiada ha kum kine ki jaka leh niam / iing mane ban iada na ka jingsaphriang u COVID-19.

Kane ka jingbthah ka batai shai ia ki lad jingiada kiba bniah ba dei ban bud ryntih nalor ki kyndon kiba la don lypa ha kine ki jaka ban iada na ka jingsaphriang u COVID-19.

Ki jaka leh niam / iingmane kiba don ha ki jaka ba dang don jingpyrkhing ia ka rung ka mih (containment zones ) kin dang khang khyrdep .Tang kito kiba don shabar jong ki jaka ba pyrkhing ki lah ban plie.

II. Ki lad jingiada kyllum:

                 La ai jingmut ia Kito kiba hapoh ka 18 snem ka rta, 65 snem ka rta shajrong, ki briew kiba don lypa ka/ki jingpang bad kiba armet ba kin shong shwa ha la iing. Tang kito ki briew kiba la dep ai tika covid-19 baroh arsien ( 1^st dose & 2^nd dose) ki lah ban leit ha ki jaka mane / iing mane. Ki nongialam niam kin ai jingmut ia ki parabangeit halor kine ki kyndon.

            Nalor nangta, la pynshisha ba ka jingai tika Covid-19 kalong kaba lah ban iada pyrshah ia ka khlam COVID-19, na ka jingshitom jur, thiah hospital bad ka jingiap, baroh ki riewngeit jong ki niam/ balang la pynshlur ia ki ban ai tika ialade. Kum ka lad jingiada, kalong kaba donkam ba ki briew kiba leit sha ki jaka mane / iingmane kidei ban long kiba la dep ai tika la kumno kumno shi sien (1^st dose).

            Ki lad jingiada ba la kdew harum kidei ki kyndon kiba suk eh ban bud ryntih ban khanglad ia ka jingsaphriang na ka jingma u COVID-19. Kine ki kyndon kilong kiba donkam ban bud ryntih da baroh (nongpyniaid bad ki paidbah) ha kine ki jaka barabor.

Kine ki kynthup:

1.     Ka jingpyniajngai iwei na iwei kalong kaba donkam bad ki briew kidei ban pyniajngai ialade kumba 5 phut ha ki jaka paidbah. 

2.     Baroh kidei ban deng ia ki mask. Ka jingpyndonkam da ki N-95 masks lane 2 tylli ki mask kalong ka lad jingiada kaba kham bha.

3.     Dei ban pynmlien ban sait ia ki kti da ka sabon (kumba 40-60 sekhon) wat la ki kti ki khuid. Lah ban pyndonkam ruh ha kano kano ka por da ka jingsleh kti (alcohol-based hand sanitizers) kumba 20 sekhon.

4.     Dei ban bud pyrkhing ia ki lad iada ha ka por ba jyrhoh lane synriah. Kane ka kynthup ia ka jingda ia ka shyntur bad khmut haba jyrhoh / synriah da ki kot tissue /jain rumal/ tymbuit. Dei ban bret ha ki jaka bret kyrpang ia kine ki kot tissue.

5.     Baroh kidei ban sngap thuh bha ia la ka koit ka khiah bad haba sngew shitom dei ban pyntip mar mar sha ki bor ba dei peit lyngba ki distrik helpline number lane War room ha ki block.

6.     La pyrkhing tyngeh ia ka jingbiah pathar ha ki jaka paidbah.

III. Ka jingdon ki nongwan ha ki jaka leh niam / iingmane:

1)   Ki jingiaseng kiba man ka por:

Ø Ha ki iingmane khristan, ka jingdon briew ha ka por ba long jingiaseng kam dei ban palat ia ka shibynta na ka laibynta (one-third) ia ka jingdon ki jaka shong ha ki iingmane. Nalor kata, ki jaka shong kiba don hapdeng artylli kiwei pat ki jaka shong dei ban ieh thylli. Ki briew ki dei ruh ban pyniajngai kumba 5 phut na kiwei pat.

Ø  Ha ki Temples, Mosquues, Gurudwaras bad kiwei kiwei ki jaka leh niam, ki briew kidei ban tikna ban pyniajngai iwei na iwei kumba 5 phut. Na ka bynta ki jingduwai ha ki jaka      mane, ki briew kim dei ban tam iwei na ka laibynta (one-third) jong ka rukom shong ha ki jaka duwai.

Ø  La pynshlur ia ki briew na ka juh ka longiing ba kin ia shonglang shi jaka ha ki jaka lehniam.

Ø  Kino kino ki jingiakynduhlang (meetings) kiba donkam na ka bynta ki nongpyniaid niam lah ban pynlong bad ki nongiashim bynta kidei ban long tang hapoh 20 ngut.

2)     Ki jingiaseng ba kyrpang :

(a)     La shah ia ki jingiaseng jingpynrung dkhot balang, ki   jingduwai bad ki jingpynkyntang khyllung, ki jingpynbaptist,bhogs, ka jingkyntang ha ka kam U Blei, ka jingkhawai U Trai bad kiwei  kiwei bad kaba bud ia ki kyndon harum :-

(i)   Ka jingdon jong ki briew kiba shah pynkyntang bad ki nongialam niam ha ki jingiaseng, ka dei ban long katkum ka jingdon ki jaka ne jingheh ka iingmane bad ban pynduna ki briew iwei na ka laibynta (one-third)  jong ka rukom shong lane 50 ngut ne kano kaba kham duna.

(ii)  Ki tiar ba pyndonkam ha kine ki jingiaseng bapher bapher ka long katkum ka jingdonkam jong ki kynhun bapher bapher bad ka jingiadei ha ka jinglehniam.

(iii)                   Ka jingpynkyntang bad ka jingkhawai u Trai, dei ban leh ia ka niam ka rukom khlem kano kano ka jingpyniadei para briew.

(b)       Ka jingkyntiew kurim ha iingmane la shah katkum ki kyndon harum:

(i)              Ka jingdon jong ki briew ha iingmane (ki nongiathoh, kiba haiing hasem, ki nongialam niam bad kiwei kiwei kynthup kiba shah khot sngewbha (invitees), ki dei ban long iwei na ka laibynta (one-third) jong ki jaka shong lane 50 ngut ne kano kano kaba kham duna. 

(ii)            Ka jingiateh ktien lane jingkhawai iathoh ha bar iingmane/ jaka mane kum ha ki jaka iathoh (marriage hall) bad kiwei kiwei kim dei ban palat ia ka 20 ngut ki nongwan.

(iii)          La khang ban don ka jingkhawai pdiang sngewbha ia ki briew ha ki jaka iathoh.

(iv)           Dei ban pan jingbit na ka ophis jong I Deputy Commissioner/ Sub-Divisional Officer (Civil), Ranikor shuwa ka sngi iathoh, ha kaba iadei bad ka tarik, ka por bad ka jaka pynlong ia ka jingkyntiew kurim.

Ki kyrteng jong ki briew kiba wan ha iing mane, dei ban pynbeit da ki balang lane ki kynhun niam kiba dei peit bad kidei ruh ban ai sha ka ophis I Deputy Commissioner/ Sub-Divisional Officer (Civil), Ranikor lada donkam na ka bynta ka jingbuddien (contact tracing).

IV.       Baroh ki iingmane /jaka leh niam dei ban pyntikna ban bud ia ki kyndon:

1)     Dei ban buh da ki jingpynkhuid ia ki kti (sanitizer dispenser) lane jaka sait kti bad jingthew jingshit (thermal screening) ha ka jaka rung (entrance).

2)     Tang ki briew ki bym don dak jingpang, yn shah ban rung sha ki jingiaseng.

3)     Yn shah ia ki briew ban rung tang lada ki pyndonkam ia ka mask.

4)     Dei ban wah ne pynieng ha jaka ba iohi bha ia ki poster ha ka ktien Phareng bad ktien lajong kiba batai ia ki lad jingiada na u COVID-19 bad ka jingmyntoi ban ai tika COVID-19. Ka tnat ka Koit ka Khiah jong ka Sorkar Meghalaya kan pynbiang ia kine ki jingdonkam (IEC material). Dei ruh ban pyni ne pynsngew lyngba ki jingkren bad video ban pynphriang jingtip halor ki lad jingiada na u COVID-19.

5)     Phiah ia ka rukom wan ki paidbah ha ki iingmane.

Ø  Na ka bynta kane, ki iingmane ki lah ban pynlong bun tylli ki jingiaseng ha kano kano ka sngi. Ka por pynlong jingiaseng kam dei ban palat ia ka shi kynta. Kumjuh ruh dei ban pynduna ne phiah ia ka jingwan ki briew ha kiwei pat ki jaka pynlong jingiaseng.

Ø  Yn ym shah ban don ka jingialum paidbah ne ban pynlong jingialang ha phyllaw iing mane / jaka leh niam hadien ba la kut ka jingiaseng.

(6) (a) Ha ki jaka mane Blei / iingmane bym shah ban rung ryngkat bad ki juti:

Ø  Lada lah, dei ban loit ia la ki juti ha la ki jong ki kali. Lada long kaba lah, ki briew ki dei ban buh hi ia la ki juti marwei marwei lane shi iing shi sem. Ki briew ki dei ban sait ia ki kti ki kjat da ka um bad sabon shuwa ban rung ha phyllaw.

(b) Ha kaba iadei bad ki iingmane bad kiwei ki jaka mane, kiba lah ban rung ryngkat  

      bad ki juti.          

Ø  Dei ban pynbiang ia ki dawai (disinfectant) ha ka jaka rung (entrance) khnang ban pynkhuid ia ki juti.

7)     Dei ban buh ki briew ban pyniaid ia ki paidbah ha ki jaka pynieng kali bad shabar jong ki jaka mane da kaba bud ia ki kyndon pyniajngai para briew hashuwa bad hadien ba la kut ka jingiaseng lane jingialang.

8)     Lada don ki dukan, ki jaka dih kophi bad kiwei kiwei, shabar ne hapoh ki sawdong sawkun jong ka iingmane dei ban bud pyrkhing barabor ia ki kyndon pyn-ia-pajih para briew.

9)     Dei ban buh da ki dak pyniajngai ban pynieng ia ki briew khnang ban pyntikna ba ka don ka jingiajngai iwei na iwei ha ki jaka mane. 

10) Katba lah, dei ban buh la ka jong ka jaka rung bad jaka mih ia ki paidbah.

11) Dei ban pyniajngai para briew kumba 5 phut haba ieng ban rung shapoh.

12) Ka rukom shong ka dei ban long ha kata ka rukom ba kan don ka jingpyniajngai iwei na iwei pat.

13) Na ka bynta ki kor pynpyngngad / jaka pyllait lyer, dei ban bud ia ki jingbthah jong ka CPWD kaba batai ba ka jingshit jingkhriat ban buh ha baroh ki kor pynpyngngad ka dei ban long hapdeng 24 – 30° C, ka jingsngem ka dei ban long hapdeng 40-70%, dei ban don ki jaka ba pyllait ban rung lyer khuid bad dei ban biang ki jaka rung bad mih lyer.

14) Ym shah ban ktah ia ki statue / ki dur blei / ki kitab bakhuid bad kiwei.

Ø Ha ki iingmane khristan, ki briew ki dei ban wanrah la ki jong ki kot jingrwai bad ki Baible bad dei ban kiar na kaba ia pyndonkam lang.

Ø Lada don ki tiar ki tar ba pyndonkam lang ha ki jaka mane  bad bym lah ban long la ka jong, ia kum kita ki tiar dei ban pynkhuid bad pyndonkam da ki kti ba la sop bad pynduna ia ka jingpyndonkam bun briew.

15) Ka jingma na ka jinglah ban saphriang ka jingpang, katba lah dei ban shu pyntem ia ki jingrwai niam bad ym dei ban shah rwai ia ki choir ne kynhun nongrwai.

Ø Ha iingmane, wat haba rwai dei ban deng beit ia ki mask.

16) Kiar na ka ba pyndei para briew haba ia khublei.

17) Dei ban kiar na kaba pyndonkam lang ia u shylliah haba duwai bad ki bangeit ki dei ban wanrah la u jong u shylliah ne jain siang ia kaba ki lah ban rah noh bad ki.

18) Ym dei ban shah ban sam para kti ia kum ki Prasad / sam ne synreit umkhuid bad kiwei kiwei ha ki jaka mane. Ia ki jingkynshew lada donkam, dei ban buh ha ki jaka ba la buh kyrpang ha ki jaka ban rung ne ban mih.

19) Ki jaka shet (Community kitchen)/ langars/ “Ann-dann” bad kiwei kiwei kiba don ha ki jaka mane kidei ban bud ia ki kyndon pyniapajih para briew ha ka por ba phynkhreh bam bad sam ia ki jingbam.

20) Ha ka por ba don Holy Communion ne Jingkhawai U Trai ha ki iingmane, ki Phadar / Pastor / Briew kiba sam ia ka jingkhawai u Trai ki dei ban sait bad sleh dawai ia la ki kti, bad phong da ki jingda kti lada long, shwa ban sam ia ka Jingkhawai u Trai dei ban pyntikna ba ym don ka jingpyniadei para briew.

Ø Ki jingainguh bad jinglum jingkynshew ha ki iingmane dei ban leh khlem da don ka jingpyniadei para briew

21) Dei ban sait bad pynkhuid bha ia ki jaka leh niam na ka por sha ka por bad ki nongpeit ia ki jaka leh niam ki hap ban peit ia kane. Dei ban pynkhuid bha khamtam eh ia ki painkhana, ki jaka sait kti sait kjat.

22) Ki bor pyniaid ia ki jaka mane ki dei ban pynkhuid bad sait dawai bunsien ia ki jaka leh niam.

23) Katba lah, dei ban sait bunsien ia ka madan jong ki jaka leh niam.

24) Dei ban pynbiang ia ki jaka bret ia ki mask/ jingsop kti kiba ki bangeit ne ki nongtrei ki kum ieh.

25) Katba lah, ki balang bad ki jaka leh niam ki lah ban leh live streaming ia ki jinglehniam khnang ba ki riew tymmen, ki khynnah bad ki briew kiba don bun jingpang ki lah ban iashim bynta. 

26) Katba lah, ki briew ki dei ban leit jingiaseng sha ki iingmane ba jan tam bad ki jaka sah jongki. Kane kan iarap ban kiar bad pynduna ia ka rukom iaid rukom ieng ki briew.

27) Lada don jingsuba ne don ba ioh ia u COVID-19 ha jaka mane :

(a)             Buh ia u nongpang ha ka karma ne jaka kaba pynkyrpang na kiwei.

(b)             Pynbiang ka mask / jingda khmat tad haduh ba u doctor un da eksamin ia u / ka.

(c)             Pyntip mar mar sha ka jaka sumar pang kaba don hajan (hospital / clinic) lane phone ha u distrik helpline number (la suh lang ha ka Annexure-I).

(d)             Ki bor ba dei peit ia ka koit ka khiah (district RRT/ u doctor sumar pang) kin sdang ia ki kam kum kaba sumar ia u nongpang, ban wad ne test ia ki briew kiba u / ka ki iakynduh bad ka jingdonkam ban synreit dawai.

(e)             Dei ban sait dawai (disinfection) ia ka jaka baroh kawei lada shem ba u / ka briew ki ioh ia ka jingpang.

V.           Ki Prokram / Jingrakhe / Jingiaseng ba long ha ki por ki por, ne katkum ki aiom ne ba shisien shisnem

Ki don kiwei pat ki jinglehniam ha ki calendar jong ki kynhun balang bapher bapher ba long ha ki por ki por, ne katkum ki aiom ne ba shisien shisnem, Kine bunsien ki iadei bad ka jingbun paid ha ka ban iashim bynta bad ki long ruh ki jingrakhe jong ki shnong bad ha kum kine ki don ruh ba la ai shuti paidbah (Public Holiday)

Na ka bynta kine ki jinglehniam / Jingkhawai ne ki prokram namar ba ki khring bun briew yn khang shuwa, bad ki kynhun niam ba dei bynta ki dei ban ioh jingbit na ka Sorkar lyngba I Deputy Commissioner / Sub-Divisional Officer (Civil), Ranikor kaba ia pher na kawei ka jingleh niam sha kawei pat.

      Kitei ki jinglehniam kim ym kynthup lang ha ki jinglehniam ba man ka sngi ne ba shisien shi taiew kiba ju leh ha ki jaka mane.

VI.       Kino kino kiba pynkhein (violations)

                        Ha kino kino ki prokram /Jingrakhe / Jingiaseng, lada don kino kino kiba pynkhein ia kitei ki kyndon ba la kdew haneng lane lada ki briew / kynhun kiba thmu ban pynsaphriang bakla ha kaba iadei bad ka jing ai tika covid-19 (vaccination), ka ophis jong I Deputy Commissioner / Sub-Divisional Officer (Civil), Ranikor kan pynshitom ia kino kino ki briew / kynhun katkum ki kyndon ain.