Mawkyrwat, Rymphang 22, 2022: Ka Block Mission Management Unit,
MSRLS/NRLM, Mawkyrwat C&RD Block mynta ka sngi ki la pynlong ia ka Convergence
Camp (ne ka jingiasynrop lang) jong ki tnad sorkar bapher bapher, ha Community
Hall, Jakrem ban ai jungmyntoi ia u
paidbah nonshongshnong ha kaban pynrung kyrteng na ka bynta u Aadhaar, e-Shram,
National Social Assistance Programme (NSAP),
Megha Helath Insurance Scheme (MHIS), Social Security Schemes-PMJJBY, PMSBY,
APY, KCC loans (ram nongrep), DDU-GKY bad kiwei de. U Bah W. Biam, MCS, ADC bad
Project Director, DRDA, South West Khasi Hills District, Mawkyrwat u la long u
kongsan bad u bah Bah I. Lawryniang, MCS, BDO, Mawkyrwat C&RD Block
u la long u symbud kongsan.
Haba kren ha katei
ka sngi u Bah W. Biam u ong ba ka jingthmu ka sorkar ka long ban pynpoi ia ki
lad jingiarap ha ki shnong ki thaw (service at the doorstep). U la kyntu ruh ia
ki paidbah ba kin pynsaphriang ia ka khubor khnang ba kiwei kin sngewthuh ban
shim ia ka kabu ban pynrung kyrteng na ka bynta ki skhim sorkar bapher bapher.
U la ong ruh ba ka sorkar ka ai ki jinghikai bapher bapher kum ka
jingkhapsniuh, jingpynbha briew, ka jingshna ia ki tower bad kiwei kiwei ki
jinghikai khlem da siew pisa khnang ban
iarap ia u paidbah ban kiew ha ka ioh ka kot ne ban dup lah ban sengkam seng
jam. U la ong ruh ba ka long kaba donkam ban pynshlur ia ki khun samla ban leit
sha ki jinghikai bad sdang ban seng ia ki kam lajong namar ka long kaba eh ban
ioh kam iohjam.
U Bah I.
Lawryniang, MCS, BDO, Mawkyrwat C&RD Block u la batai shaphang ka
jingdonkam ban sdang ia ki kam lajong ban kyntiew ia ka ioh ka kot bad ban weng
ia ka jingduk. U la ong ruh ba lyngba ka jingsynrop lang jong ki tnad sorkar
bapher bapher, ka sorkar ka kwah ban pynsuk ia u paidbah ban ioh ia ki kot ba
donkam ban ioh ia ki jingiarap na ki skhim sorkar jong ki tnad bapher bapher.
Ban pynsngewthuh shaphang
u Aadhaar ka Kong I Nongkhlaw, RO, Planning Department ka la ong ba ka Aadhaar
Card ka la long kawei na ki kot ba donkam bha na ka bynta ban ioh ia ki
jingmyntoi jong ki skhim bapher bapher jong ka sorkar ba kynthup naduh u khaw
ration, MHIS, e-Shram, ki skhim pension bad kiwei de.
ka la kren shaphang ka jingdonkam ban
shon Aadhaar card khnang ba kin lah ban ioh shibun ki jingmyntoi.
Haba batai shaphang
ki jingdonkam lyngba ka Bank ka Kong K. Kharsyntiew, BM, MRB Mawkyrwat ka la
iathuh ba ki bank ki la sdang ban pynsuk ia u paidbah da ka jingdon jong ki
Bank Sakhi ha ki shnong ki thaw na ka bynta ban thep ne sei pisa kumjuh ruh na
ka bynta kiwei ki jingdonkam ha ka bank. Ka la kyntu ruh ia u paidbah ba kim
dei ban sheptieng ban pyndonkam ia ki lad jingshakri lyngba ka online namar kan
pynsuk shibun ia ki tang ki briew ki dei ban long kiba phikir bha.
Ka Kong S.
Iawphniaw, Branch Manager, MCAB Mawkyrwat ka la batai shaphang ka
jingdonkam ban pynbeit bha ia ki kot ki sla shuwa ba kin leit ban pynrung
kyrteng na ka bynta ki lad jingiarap kum ka PMJJBY, PMSBY bad ka KCC loan (ram
nongrep) khnang ba kin ym don kino kino ki jingeh hadien habud.
U Bah K. Snaitang ,
DPM, DRDA u la batai shaphang ka jingmut jong ka Convergence Camp bad kumno ka
pynsuk ia ki paidbah nongshong shnong ban pynrung kyrteng na ka bynta ki skhim
sorkar bapher bapher.
“Ka
MHIS ka long kawei na ki skhim sorkar ba la ai jingim ia shibun ki briew”, ong
ka Kong Prilin Marwein, DPM, MHIS, Mawkyrwat ka la kren halor ka skhim MHIS bad
kiei ki lad jingiarap ba ki lah ban ioh lyngba jongka. Ka la bynrap ruh ba bun
ki briew mynshuwa ki tieng bad ki ong ba ka MHIS bad Aadhaar ki long ki number
666 hynrei mynta ka la ai jingmyntoi ia shibun ki briew te namar katta ka la kyntu
ba ki briew kim dei ban long ki ba ngeit biej.
Ka kong U.
Kharlyngdoh MSSDS, Mawkyrwat ka la kren shaphang ki jinghikai bapher bapher ba
ka sorkar Jylla ka ai sha ki paidbah nongshong shnong ba kynthup ia ki kam rep
kam riang, kam ri jingri bad kiwei de.
U bah L. L Nongbri,
DPM, DDU-GKY u la kren shaphang ka DDU-GKY bad kumno ban kyntiew ia ka ioh ka
kot u paidbah lyngba ki jinghikai ba ki ai. U la ong ba lyngba ka DDU-GKY ka
sorkar ka ai jinghikai (training) khlem da siew pisa eiei bad hadien ba la dep
ioh jinghikai ki ka DDU-GKY kan iarap ban pyniohkam ha ki kompeni katkum ka
jingpyntbit jong ki khynnah. U la iathuh ruh ba ka jingsiew kan long T.6000
shibnai shajrong ha kano kano ka kam ba ki trei.
Ka kong D. Marwein,
Gram Sevika, ka la batai shaphang ki skhim lyngba ka National Social Assistance
Programme ba kynthup ia ka Old Age Pension, Widow Pension, bad Disability
Pension.
U Bah J. Thongni,
LDA, Labour Department, Mawkyrwat u la batai shaphang ka skhim e-Shram ba kumno
ki briew ba shu bylla sngi kiba naduh ka 16-59 snem ki lah ban pynrung kyrteng.
U la batai ruh shaphang ka Meghalaya Building & Other Construction Worker’s
Welfare Board.
Ka BPM, MSRLS/NRLM
Mawkyrwat Block, ka kong Rila A. Kharlyngdoh ka la iathuh ba ka Meghalaya State
Rural Livelihood Society (MSRLS) ryngkat ka Kudumbashree NGO kum ka NGO ba
pynteikam jong ka PRI-CBO Convergence Project ki treikam ha 4 (saw) tylli ki
Block jong ki 3 (lai) tylli ki District hapoh ka Jylla Meghalaya ha kaba ha
Mawkyrwat ka shnong Jakrem kadei kawei na ki shnong ba la shah jied. Ka la
bynrap ruh ba ki don kumba 3 tylli ki Village Organisation tang hapoh shnong
Jakrem bad kumba 56 tylli ki Self Help Groups.
Ka Sathi M, Field
Coordinator, Kudumbashree, NRO ka la maitphang shaphang ka Convergence Camp bad
ka la ong ba ka thong ba hakhmat eh ka long ban pynduna ia ka jingduk
jingkyrduh ha ki shnong ki thaw khamtam ha ki nongkyndong da kaba wanrah ia ki
lad jingrap lyngba ki skhim sorkar bapher bapher hapoh shnong. Ka la ong ruh ba
lyngba ka Village Poverty Reduction Plan (VPRP) ki briew ki lah ban ioh ia ki
jingtip ba pura shaphang ki skhim bapher bapher jong ka sorkar pdeng bad sorkar
jylla.
Ha katei ka prokram
ba la pyniaid da ka kong Shimtilin Margnar la ioh k jingkren pdiang sngewbha na
u Bah P. Wahlang, Myntri Shnong Jakrem bad la kren ai khublei da ka kong T.
Jyrwa, SHG member.
No comments:
Post a Comment