Ki soh na U symbai

Ka mariang kam pat duhjait bad ka nang iai jyrngam wat lada ngi ki briew ngi pynjulor iaka. Ki briew ki nang roi ha ka jingnang jongstad bad ka rukom im ka la kham suk kham bha. Ki bor machine (technology) ne saian ki la kham kiew bad kham janai. Ka daw jong ka jingneh ka mariang, jingroi ka jaitbynriew bad jingkiew ka bor saian ka dei na ka daw jong u SYMBAI ba la thung da U Blei, ka mariang bad ki briew.

U symbai u long kum u attiar ba wanrah jingkylla. Haba ki nongrep ki thung ki symbai ba bha bad ki sumar bha ngi kyrmen ba kita ki symbai kin sa wanrah ia ki soh ba bha bad kin sa wanrah shispah shah. U symbai haba la thung ha ka khyndew u ailad ialade ban iatrei lang bad ka mariang, u shah ia ki jingeh lyngba ka jingshit ka sngi, jingther u phria, jingsait u slap bad jingsympat ka lyer. U pyrshang ban shim ia kiei kiei ki babha na ki bad u kwah ban pynroi bad pynkhlain ialade lyngba kine ki jingeh ba u shah. U symbai u tip shai ba khlem ki jingeh, jingtrei lang bad jinglen lade yn ym lah ban long u symbai ba seisoh. Ha ka jingim jongngi ruh ngi donkam ia ki symbai ki ba bha bad ki ba kloi ban shah ia ki jingeh ban ialam iangi sha ka jingbha.

Lada ngi ki briew ngi thung u symbai babha ngin sa kmen bad ngin sa long briew man briew. Lada ngi ki samla ngi thung ia u symbai jong ka jingbishni, jingpihuin, jingsngew hangamei, jingkhwan shimet, jingim thala pyrthei bad jingbym patiaw ia ka sneng ka kraw ki kmie ki kpa bad ki ba ha iing ha sem kin sa poi beit sha ka jingjot. Ka jingjot kan sa pynlanot iangi ym tang mynta hangne ha pyrthei bad kumjuh ruh ha ka jingim lawei. Lada ki khynnah skul ki thung ia u symbai jong ka jingjaithuh, jingbuhteng, jingbym kohnguh ia ki nonghikai bad jingleh heh kin sa poi sha ka kyrdan bym longeiei. Lada ki kmie ki kpa ki thung ia u symbai jong ka jingiamai iania, jingbymiatreilang, jingim lyngkar, jingtharai sniew bad jingisih iwei ia iwei ka iing ka sem kan sa poi sha ka jingkulmar bad jingkordit.

U symbai ba ngi ki briew ngi thung ha ka jingim jongngi un sa btin lynti ia u soh ba ngin sa ioh kheit ha ka jingim jongngi mynta bad ha ka lawei. Lada u symbai jongngi u sniew ngin sa thaw ka history ba bud nam sniew. Da ngi kwah ba ka lawei jongngi kan phyrnai, ka parish ne skul jongngi kan kiew shaphrang, ka shnong ka thaw jongngi kan kham roi bad kham shai te ngi kum ki khun kristan ngi dei ban thung u symbai ba bha mynta. Ngin pyrshang ban thung ia u symbai jong ka jingieid, jingiamap, jingiatrei lang, jingsngewlem, jingiarap parabriew bad jingsngewrit. Thang noh da ka ding ia ki symbai ba sniew bad pyrshang ban thung bad sumar bha tang ia ki symbai ba bha ha ka jingim jongngi. Da ngi kwah ki soh ba bha ngi dei ban thung da ki symbai ba bha.