Ka jingduwai ban lait na ka khlam COVID-19

Jisu, ha ka por ba Me dang hikai ha kane ka pyrthei, Me pyni ia ka bor bad ka jingieid jong Me lyngba ka jingpynkoit ia ki briew naduh ki barit haduh ki tymmen ki kro bad ia baroh ki ba mat ki jingjynjar bad ki ba pang na ka daw jong ka met ka phad, ka jingmut jingpyrkhat bad ka jingpang mynsiem. Trai to don mynta bad ktah da ka kti baieid jongme ia baroh kito kiba donkam ia Me ha kum kane ka por jong ka khlam COVID-19. Ai ba kin iohmad ia ka bor jong ka jingkoit jingkhiah lyngba ka jingsumar ki doctor bad ki nurse. Shim ma Trai ia ka jingsngewtieng, ka jinglynga mynsiem bad ia ka jingsngewkynjah na kito ki ba dan don hapdeng ka jingsumar bad kiba sah marwei. Ai mynsiem ma Me ba kane ka por jingsumar ka long ka por ban ioh noh ia ka met ba koit ba khiah bad ban iada n aka jingsaphriang jong kane ka jingpang sha kiwei pat. Iada ma Me Trai ia ki ba haiing ha sem, ki paralok bad ia baroh kiba ieid ia ki khnang ba kin lait na katei ka jingpang bad ba kin ioh ka jingsuk mynsiem. Ko Kpa Badonbor, Kynrad jong ka Bneng bad ka pyrthei, bad jong ki jingthaw baroh kiba ngi iohi bad kiba ngim lah ban iohi, da ka jingieid jingsbun bakhraw tam tong Me, to khmih isynei ia u paid jongMe ba ialum lang hangne ha ka kyrteng jong Me. To long ma Me  U Nongiarap bad Nongiada ha kum kane ka por jingjynjar. Me tip ia ki jingtlot briew jongngi. To Sngap ia ka jingiam basngewsih jong ka dohnuhd jongngi da ka ba kut jingmut ban kylla noh. Ko Trai Me u ba dap da ka jingieid ia ngi ki briew pyllait noh iangi na kane ka jingshah lyngshop ia kane ka khlam Corona Virus. To phah ia ki Angel ba kin peit iangi bad kin iada iangi. To ai noh ka met kaba koit ba khiah ia kito kiba pang ba shitom na u ne u khniang. Iarap ia ngi  iwei ba iwei ba ngin lah ban trei ia la ki kam ki jam bad to pynkhlain ia ka mynsiem sngewlem parabriew. Ma Me Uba ai jingtngen ha ka jingthait bad U Nongkyrshan haba ngi tlot lyngba ka jingiasaid jong ka Mei Bneng baieid jongngi ka Maria ryngkat ki doctor bad ki nongpynkhiah ba la kyrkhu u Blei, to shim noh ia ki jingsniew na ngi. Pyllait iangi na kane ka Khlam kaba ktah iangi khnang ba ngin lah ban bteng biang ia ki kam ki jam jongngi, ban iaroh bad ban sngewnguh ia me da ka mynsiem ba jai bad ka jingim bathymmai. To ialam ma Me ia ki kti jong ki nongsumar, bad pyllait ia kito kiba koit ba khiah krat khnang ba ngin nang iai lah ban shakri ia Me da ka jingsuk bad pyndonburom ka kyrteng Badonburom bad Bahalor tam ka jong U Kpa, bad U Khun bad U Mynsiem Bakhuid, mynta bad junom la junom. AMEN.