La phiah haki Zones bad Sectors katkum ki kamram ba la bynshet

Kum kawei na ki lad ban pynkhlain bad pynjanai  ia ka rukom treikam na ka bynta ban shim ki lad jingiada  na ka jingsaphriang  ka jingpang  COVID-19  ha baroh kawei ka South West Khasi Hills District, ka  Deputy Commissioner jong ka South West Khasi Hills District ka la phiah ha ki Zones bad Sectors  hapoh ka jingpeit jong Ki Zonal Magistrates bad Sector Officers  ha kaba kawei ka Zones ka kynthup  ar ne lai tylli ki sectors bad kawei ka sector ka kynthup kumba ar  ne lai tylli ki shnong tam ne duna. Ha kaba iadei bad kane  ka Deputy Commissioner ka la kyrpad ia ki Rangbah Shnong, ki bor shnong, ki volunteers, ki nongialam jong ki Seng-Bhalang, jong ki  shnong ki thaw bad kiwei kiwei ban ai ka jingkyrshan bad ka jingiatreilang bad  ki Zonal Magistrates (ZMs) bad Sector Officers (SOs) na ka bynta ban pyntyllun bad pyniaid beit ia ki kam na ka bynta ban the lakam ia kane ka jingpang.

     Khnang ban kynjoh sha ka thong na ka bynta ban ai jingiada ia ki  paid nong-shong-shnong  na ka jingsaphriang jong kane ka jingpang kumba la thmu da ka sorkar ka la pyntip ba la buh da ki volunteers ha  jan man la ka shnong bad la bynshet ha ki ia ki kamram na ka bynta ban iarap  ban ai awareness ha ki iew ki hat bad ki shnong ki thaw kaba iadei bad ki jingbthah (advisories) na ka tnat ka koit ka khiah halor ka jingleh khuid ,ka rukom sait kti ,ban peit ba ka dei ban don ka social distancing ha ki jaka paidbah kum ha ki iew  ki hat bad kiwei kiwei  bad ban ym don ka jingialum paidbah ha kino kino ki jaka.Shuh shuh kum ki volunteers ki dei ban peit pyrman ia kito kiba hap ban shong quarantine bad ia ki briew ne ki kali kiba pynkhein ia ka Lockdown ne Curfew bad ban pyntip mar mar sha ki Rangbah Shnong bad  kine kin pyntip sha ki Zonal Magistrates ne Sectors officers kiba dei peit ia kita ki thain lada don kiba pynkhein kum ia kita ym ban shim ia ka ain ha ki kti. Ha ka juh ka por la bthah ia ki ban ym leh kano kano ka kam ka ban buh jingeh ne jingpyrkhing ha kino kino ki bynta  kum ha kaba khang ia ki lynti ki syngkien ne ia ka leit ka wan jong ki kali kiba don  Curfew ne Car Pass, ki briew kiba don ki ID Cards kiba biang, ki nongtrei sorkar, ki ba pang ba shitom, ki kali jong ki nongtrei jong ka koit ka khiah  bad ia kiwei kiwei.

       Nalorkata ka la pynshai ba ki volunteers ki dei ban peit ba ki nongwan iew bad ki nongdie dukan kin don  ki ID Cards bad ba ki dei ban deng mask, ban sam ia ki mask sha ki bym don  bad ban pyntip sha ki Team Leaders ne Supervisors lada don ki kali kiba wan iew khlem ka Curfew lane Car Pass. Namarkata ka la kyntu ba ki volunteers ki dei ban long kiba donburom, kiba jai jai, ki bym laplah bad ban kiar na ka jingiakajia bad ban ai ka jingiatreilang bad ki pulit, ki Zonal Magistrates bad ki Sector Officers bad ban long  barobor kiba kloi ban pyntip mar mar sha ki lada don kino kino ki jingjia kiba iadei bad ka jingpynkhein ia ka Lockdown ne Curfew na ka bynta ban tehlakam ia ka jingphriang ka jingpang COVID-19.