Ai jinghikai ban tehlakam ia ka jingsaphriang ka khlam COVID-19 ha Rangblang (Awareness Programme on Prevention and spread of COVID-19)

 Mawkyrwat; Nailar 27, 2020: Ka ophis jong ka Deputy Commissioner, South West Khasi Hills District (SWKHD), Mawkyrwat mynta ka sngi ka la pynlong ia ka jingai jinghikai halor ka phang ‘Ka jingiada ban tehlakam ia ka jingsaphriang ka khlam COVID-19’ ba la pynlong hapoh hall jong ka Mary Mother of the Church, Parish Rangblang.  

Haba kren ha katei ka sngi u Bah L.K Diengdoh, MCS, EAC, Mawkyrwat u la ong ba ka jingtipbniah kumno ban iada ialade na ka jingsaphriang u COVID-19 da kaba bud pyrkhing ia ki kyndon kum kaba deng ia ki mask, jingpyniajngai parabriew, ka jinglehkhuid da kaba sait ia ki kti da ka um bad ka sabon ne pyndonkam da ki hand sanitizer bad ka jing kiar ban ktah ia ki khmat, khmut bad syntur ki long ki atiar ba khlain bor tam ban ialeh pyrshah ia kane ka thma. U la pyntip ruh ba haba lap ba don ki nongpang COVID-19, ka jingtest kan long shuwa ia ki primary bad ki high risk contact bad da dei ba don positive ki primary contact yn sa test ia ki secondary contact bad da dei ba ioh positive ki secondary contact yn sa test sa ia ki tertiary contact. Ka jingtest ba nyngkong ka long da ka Rapid Antigen test bad hadien katto katne sngi yn sa leh sa da ka RT-PCR test ban pynthikna. Kumjuh ruh u la ia jinghikai halor ka Behavioural Change Management Committee (BCMC) bad u la ong ba ki member jong ka BCMC ki dei ban ai jinghikai ia ki briew hapoh shnong bad kan buddien ia ki jingkylli bad pynshai ia ki paidbah hapoh shnong. U la kyntu ruh ba ha kum kane ka por jong ka khlam ngim dei ban iashun, isih bad iakhun parabriew hynrei ngi dei ban iashun, isih, peitmatdong, bad iakhun ia u corona. Lada ngi peit mationg iwei ia iwei u Blei yn sa nang tynjuh iangi bad dei na katta ka daw ngi dei ban im ha jingieid. U la pynshlur ia baroh ki ba la shah jied kyrpang ban ioh bynta ia katei ka prokram jinghikai ba ki dei ban long long ki nong leit hikai iakiwei pat ha ki shnong ki thaw jongki.

 U Dr. Paul Lyngdoh, MHO, Mawthawpdah PHC u la batai bniah shaphang ka jingpang COVID-19 bad kumno ban tehlakam. U la ong ba ka jingpang COVID-19 ka dei ka jingpang iabit na ka um ba mih na u briew ba la shah ktah ha katei ka jingpang bad na ka lyer bad ngi lah ban lait na katei ka jingpang dakaba bud pyrkhing ia ki kyndon treikam ba la btah ka tnad Health bad Family Welfare. Kumjuh ruh ban iada ialade u la ong ba ‘ka pliang ja jongngi ka dei ban long kum ka rong sympyllieng’ kum ki jhur jyrngam, ka ja, pylleng, pathaw bad ban kilan met man ka sngi khnang ba ki bor treikam ka met ka phat jongngi (immunity system) kan long kaba khlain bor. U la batai halor ka jingphiah ia ki nongpang ba ioh ia u kniang jingpang COVID-19 sha ka Category A,B,C bad D da kaba batai ruh shaphang ki Primary, Secondary, Tertiary, High Risk bad Low Risk Contact kumjuh ruh shaphang ki Containment area. U la ong ruh ba lada ki briew kim khein snep bad bud pyrkhing ia ki kyndon treikam bad jingbthah ka Sorkar ka jylla Meghalaya kan mat ia ki jingeh hakab kumba 70000 (Hynniewphew hajar) ngut ki briew ki lah ban shah ktah ha u kniang jingpang COVID-19 bad ha kum katta ka por baroh ki Hospital, CHC ne PHC kin sa dap lut bad yn ym don jaka shuh ban sumar bad ki hap ban sumar hi ha la iing la sem. U la iathuh ruh ba kiba bun na kito kiba khlad na u COVID-19 ki dei kito kiba don bun jait ki jingpang te namar kata ngim dei ban tieng hynrei ngi dei ban phikir. U la ai jingpynshai ruh kumno ban sait ia ki mask, ban khleh ia u bleaching powder ban pynkhuid ia ki kamra bad ban kiar na ki khubor hamsaia ne ban pynthohbria ia ki briew da ka jingpeit mationg ne kdew kti ia kiwei haba ki shong pynkyrpang ialade hala ki iing ki sem. U la kyntu ba ki longkmie ki dei ban leit pyndep ban ioh ia ki immunization bapher bapher kum ka BCG, Polio ban iada ialade bad ki khun na ki jingpang bapher bapher namar namar kham bun kito kiba la duh noh iala ka jingim ka long na ka daw jong kiwei pat ki jingpang ym na u COVID-19.

 Haba kren shaphang ka kamram bad rukom treikam ki nongiarap (volunteer), U Bah Bah Benteen M. Kharkongor, Assistant Director Agriculture, Mawkyrwat, u la ong ba ki nongiarap ki dei ban long kiba sngewrit, kiba kylluid mynsiem, kiba kloi ban hikai, kiba kloi ban iarap bad ki nongpyntip sha kiwei. U la ong ruh ba ki dei ban long ki nuksa babha ia kiwei da kaba im bha bad bud bha ia baroh ki kyndon treikam bad jingbthah ka sorkar. U la batai ruh shaphang ki jingbthah ba ki briew ki dei ban bud pyrkhing ha ki iew ki hat bad haba shong kali.

 Ka Dr. B. Nongtraw, CHC, Mawkyrwat ka la batai sani bha kumno ban sumar ia ka metiap jong kito ba khlad na u COVID-19. Ka la ong ruh ba ki briew kim dei ban tieng,  sngewthuh bakla  bad ngeit ia ki khubor hamsaia halor ka jingsaphriang utei u jingpang da kaba ong ba utei u khniang jingpang u iabit na ka umbiah ne na ka jynhaw bad kam don shuh ka jingsaphriang na u briew ba lah khlad namar ka jingpang ka sahkut tang ha ki tor kata ruh tang kumba 48 kynta eiei. Ia ka metiap la pynkhuid ruh da u dawai,  sei lut ia ki tiar ba la  pyndonkam, thep  iaka ha ki pla thep metiap (zip bag) bad nangta ki sa buh sha ka jaka buh metiap (mortuary) haduh ban da aiti sha ki ba haiing bad pyndep ia ka jinglehniam ba khatduh ha kaban sa leh da ki briew ba la buh kyrpang ka sorkar na ka bynta katei ka kam. I la ong ruh ba lah ban ailad tang kumba 20 ngut ki bahaiing ba kin leit peit bad yn ym shah ia ki khynnah ba hapoh 12 snem ne ki tymmen ba 60 snem shajrong . Haba leit ontep ne thang yn shah tang kyndiat ngut ki briew bad baroh ki dei ban bud ia ki kyndon treikam kum kaba phong da ki ppe, face shield, gloves bad mask bad hadien da dep pyndonkam dei ban buh noh ha ki ambulance ba kit ia ka metiap. 

 Ia katei ka prokram jinghikai la pyniaid da I Bah Edilbert Iawphniaw, Chairman, JACC Rangblang Sohsyniang.