Kumba 160 ngut ioh eksamin ei ki briew ha ka jing rakhe ia ka World Cancer Day, 2021

Mawkyrwat, Rymphang 04, 2021: Ka Ophis jong ka District Medical & Health Officer, South West Khasi Hills District ka la pynlong ia ka jingrakhe ia ka World Cancer Day, 2021 mynta ka sngi ha Mawkyrwat CHC, Ranikor CHC, Mawthawpdah PHC, Wahkaji PHC bad Rangthong PHC halor ka phang “Nga dei bad nga kloi-Ryngkatlang ki kam jongngi baroh ki long kiba donkam (I am and I will-Together all our action matter)”.

U Dr. R. Lathong, Medical & Health Officer, Mawkyrwat CHC u la kren halor ka jingpang Cancer bad u la ong ba ka jingpang cancer lane ka jingpang bam pong ka dei ka jingpang ba la ktah shibun eh ha kine ki sngi kiba mynta. U la bynrap ruh ba ka jingthmu jong katei ka jingrakhe ka long ban pyntip bad pynshai ia ki paidbah nongshnong shnong shaphang ka jingpang cancer lane ka jingpang bam pong bad ban iarap ia ki paidbah ban iatylli kawei bad ialeh ia kane ka jingpang na ka bynta ka jingkoit jingkhiah bad ka lawei kaba phyrnai khlem ka jingpang bampong. U la kren ruh halor ka jingpang bampong khamtam jong ka Shyntur, ka shadem kynthei, ka tduh ka pla khun bad kiwei kiwei de ki jingpang bam pong bad ruh shaphang ki lad jingiada bad jingsumar na katei ka jingpang kaba shyrkhei.

Ha katei ka sngi ka la don ruh ka jingpynlong ia ka screening lane ka jing examine kaba bniah da ki Doctor na ka bynta ka Shyntur, ka shadem kynthei, ka tduh ka pla khun bad kiwei kiwei de ki ban peit bnai ioh don kino kino ki dak ki shin jong ka jingpang bam pong. Ha baroh kawei ka District la don kumba 160 kiba la ioh ban wan phah check up na ka bynta ka Jingpang Bam pong ha katei ka sngi.