Mawkyrwat, ‘Nailur 07: Ka ophis jong ka District Mental
Health Programme (DMHP), South West Khasi Hills District kaba hap hapoh ka
jingpynïaid jong ka District Medical & Health Officer, South West Khasi
Hills District, ha ka 4 tarik u 'Nailur, 2021 ha ryngkat ka jingïatreilang
bad ka Jingïaseng Samla Balang Mawten ka la pynlong ïa ka ‘Suicide Prevention
Camp’ halor ka phang “Creating Hope Through Action”.
Ka
jingthmu jong kane ka program ka long ban pynshai ïa ki samla shaphang kaei
kaba pynlong ba bun ki briew ba kin dkhat noh ïa ka jingim bad kumno ban ïada
na katei ka apot. La pynlong ïa kane ka program ha ka Jingïaseng Samla
Presbyterian Mawten kaba dei ruh ka jingrakhe ïa ka taïew ba pyrpang jong ki
samla.
Ha
katei ka sngi la ïoh ka jingkren na ka kong A. Lyngkhoi, Clinical Psychologist
ha kaba ka la kren shaphang, “ka jingdkhat noh ïa ka jingim (suicide) bad ki
lad ki lynti ban ïada ïa lade na kaba shim noh ne dkhat noh ïa ka jingim”. Ka
la kren ruh shaphang ki daw kiba pynlong ïa u ne ka briew ban shim noh ïa la ka
jong ka jingim kiba kynthup ïa ka jingkhuslai, jingsngewsih sha ba palat bad
kiwei de kiba hap ha ka thup jingpang kaba ktah ïa ka jingmut jingpyrkhat lane
lah ban ong ka mental illness.
Ka
kong W.L. Marweiñ, Psychiatric Social Worker kaba la kren ha kaba ïa dei bad ka
jingbun jong ki briew kiba dkhat noh ïa ka jingim lade bad ruh ka la ban bniah
halor ka jingkordor ka jingim ba baroh ki briew ki don la ki jong ki jong ki
jingeh. Kumta ka la kyntu ba haba ïa kynduh ki jingkut lad, ymdei ban shu shim
noh ïa ka jingim hynrei dei ban wad ki lad ki lynti ban ïoh ki jingsumar.
Hadien ka jingkren la pynbud ruh da ka skit kaba la ai da ka Jingïaseng Samla
Balang Mawten hapoh ka jingïalam jong u bah L. Wanniang bad ki paralok kaba dei
shaphang. “Ban ïada na ka bthat noh ïa ka jingim (suicide prevention)”.
Ïa ka
program la pynïaid da u T.Bn. K.H. Shangdiar bad bud sa ka jingrwai kyrpang na
ka liang jong ka ophis DMHP, kata na ka kong B. Snaitang, Psychiatric Nurse bad
ki para ba ïatreilang.
La
kut ïa kane ka program da u bah C.A Lyngdoh u ba dei ruh uwei na ki rangbah na
ka Balang Presbyterian Mawten.
No comments:
Post a Comment