Ka hukum pyrkhing iaid kali na ka surok MBGM bad Assimgittim

Ranikor, Kyllalyngkot 21, 2022: Katkum ka jingpyntip ba la pynmih da u Executive Engineer PWD (Roads), Ranikor Division ha ka 16 tarik Kyllalyngkot, 2022 halor ka jingdkut ka jingkieng No. 14/1 jong ka surok Mawphlang-Balat-Gumaghat-Maheskhola (MBGM) kaba dei ha Photkroh, South West Khasi Hills District hapoh Ranikor Civil Sub-Division bad ba yn khang shipor ia ka jingiaid kali na katei ka surok. Kumjuh ruh ka jingjot jong ka jingkieng No 10/1 ha Assimgitim hajan Upper Puksora ka long kaba donkam ban pyrkhing ia ka jingiaid ki kali khia. La pyntip ruh ba ka jingshna ia ka jingkieng RCC No 14/1 ha Photkroh ka dang iaid shakhmat bad yn shah ban iaid tang ia ki kali rit ynda la dep maramot.

Te namarkatta, namar ka jingmih ki jingdonkam ba kyrkhieh ha kaban iaid ia ki kali bad ka long kaba donkam ban pyniaid ia ka jingiaid ki kali khnang ba kan ym khanglad ia u paidbah kumjuh ruh ia ka jingshna ia katei ka jingkieng, U Bah L.G.M Kharmih, MCS, Addl. District Magistrate In charge Ranikor Civil Sub-Division u pynmih ia kane ka hukum katkum ka kyndon Ain 144 CrPC u pynjari ba  yn ym shah ban iaid ia ki kali ba khia (heavy vehicles) kat haduh ban da pyntip da kumwei pat, yn ym shah ia ka jingiaid bym pyniajngai ne bym sangeh ki kali (staggered movements), yn ym shah ban iaid ryngkat baroh ar liang (two way movements) ia ki kali sting, yn ym shah ban iaid kali naduh ka por 8.00 janmiet haduh 5.00 baje mynstep bad yn ym shah ban pynieng kali halor/hajan ka jingkieng.

Na ka daw jongka jingdonkam ba kyrkieh bad na ka bynta ka jingshongshngain u paidbah ia kane ka hukum la pyntreikam mardor ha ki jaka hajan ka jingkieng No 14/1 ha Photkroh bad jingkieng No 10/1 ha Assimgittim bad kat haduh ban da pynmih da kawei pat ka hukum