Buh mawnongrim ia ka surok Thiepbamon sha Mawpud

Ranikor, Risaw 30, 2020; Ka ophis jong u Executive Engineer PWD (Roads), Ranikor Division, Ranikor mynta ka sngi ka la pynlong ia ka jingbuh mawnongrim ia ka surok Thiepbamon sha Mawpud kaba don kumba 2.60 Km ha ka jinglut kaba T. 4.95 klur kaba la pynlong ha phyllaw ka skul Mawpud Secondary School ha kaba u Bah Pius Marwein, Hon'ble MLA & MDC Ranikor Constituency u la long u kongsan bad u Bah H.S Diengdoh, ADC i/c Ranikor Civil Sub-Division, Ranikor u la long u symbud kongsan.

Haba kren ha kum u kongsan u Bah Pius Marwein u la ai ka jingkhublei ia ka jingtrei shitom bad jingaiti lut met bad mynsiem jong ki nongtrei sorkar ban wanrah ia ka roi ka par hapoh ka Sub-Divsion bad ka District hi baroh kawei. U la ong ruh ba kane ka surok ka long kaba pyniasoh ia ka District bad ki shnong bapher bapher. U la bynrap da ka ba ong ba "ka shnong Mawpud ka ba la pynmih shibun ki riewkhraw ha ka jylla hi baroh kawei bad kaba pynlyngngoh ia u haba u poi sha katei ka shnong ka long ba katkum ka jingpaw ka kyrteng ka jinglong jingman ka shnong ka thaw pat ka dang duna bha  bad sah dum te nga la buh jingmut kyrpang ban iarap ia ka shnong lyngba ka jingiatreilang ban pynioh surok rong sha ka shnong bad ban buh mawnongrim ia ka surok Thiepbamon sha Mawpud ban pynsting ia ka lyngkor ba khia u paidbah". U la buh ka jingkular ruh ba kane ka surok kan ym kut tang ha kaba buh mawnongrim hynrei ban pynurlong bad iohi ban pyndonkam ia ka surok. U la kular ruh ban buddien ia ka jingdonkam ki paidbah ban ioh noh ia ka PHC  hapoh shnong, ban peit ruh ia kiwei ki jingdonkam ka shnong bad ban nang trei shitom ban pynurlong noh sa ia ka surok Ranikor-Wahkaji-Nonstoin. U la ong ruh ka jingwan ka khlam ka la pyndkhoh ia ka roi ka par namar ba ka sorkar ka la pynlut bun ka pisa ban tehlakam ia u COVID-19 wat la katta u la ong ba na ki 214 tylli ki shnong ha ka Constituency u la pyrshang ban ai ki jingiarap kat kaba lah ei ban kyntiew ia ka roi ka par bad ka bha ka miat ka dong ka thain.

U Bah H.S Diengdoh, ADC i/c Ranikor Civil Sub-Division, Ranikor u la ong ba ka surok ka long u budlum ne u thiedsnam jong ka roi ka par bad wanrah jingshai ha ka imlang sahlang. Kane ka long ka sngi ka ba kmen tam ba ngi la kyrmen da ki bun bun snem bad ka jingiaishah ka wanrah da u soh ba bha tam ban sah jingkynmaw shirta ka jingim bad ha ka lawei  ban wan. U la pynkut da kaba ong ba “haba don ka mon bad ka jingtreishitom ngin sa ioh kheit ia u soh jong ka jingjop”. 

Na ka liang u BDO, Ranikor C&RD Block, Ranikor, u Bah L.G. M. Kharmih, MCS, u la kyntu ba haba ioh ia ka surok wat klet ia ka jingim bad jinglong nongwar ban sumar ia ka mariang, ban rep ban riang bad ka jingwan ka surok kan long ka nongiarap ban kyntiew ia ka rep ka riang bad ka ioh ka kot. 

U Er. K.C. Nongrum, E.E PWD (Roads), Ranikor Division, Ranikor u la ong ba “ka jingplie ia kane ka surok ka long ka matti sah jingkynmaw ia ka roi ka par jong ka dong ka thain”. U la ong ruh ba ka shnong Mawpud ka dei ka shnong ba la pynmih shibun ki khlur phyrnai ha ka imlang sahlang wat lada ki mat shibun ki jingeh na ka daw ka surok. U la bynrap ba katei ka surok kan sa pynlyngkot ia ka jingiaid lynti jong ki shnong border ban leit sha mawkyrwat bad ka long ka jingkhang ka roi ka par ia ka shnong Mawpud, Bamon bad kiwei ki shnong.  U la iathuh ruh ia ka khana samari bad ki jingeh ba la iakynduh  wat la katta  ka jingtrei shitom ka ophis bad u MLA  kala wanrah ia u soh ban pynurlong ia ka jingbuh mawnongrim ia katei ka surok. U la pynkut da kaba ong ba katei ka surok kan long ka challenge bad ka experience ia ka department ban trei ia kum katei ka surok ba kham jynjar. 

Ia katei ka prokram la pyniaid bad pdiang sngewbha da u Er. D. Kyndiah, AEE PWD (Roads), Nonghyllam Sub-Division, Nonghyllam. Kiwei pat kiba kren ha katei ka sngi ki long u Bah Welldone Wanniang, Rangbah Shnong, Lower Mawpud, Bah Slander Wanniang, Rangbah Shnong, Upper Mawpud. Bah C. Nongbri, Ex Student Mawpud Sec. School, Bah S. Lyngdoh, Rangbah Shnong Bamon, bad u Bah G.G. Bung, Vice-Chairman Meghalaya State Planning Board & Myntri Nongkenbah. U Tbn. K.C. Mawnai u la ai ka jingduwai, u Bah Becareful K. Wanniang u la ai ia ka jingrwai pdiang sngewbha bad ia ka Jingkren ai khublei la pyndep da u Er. R.B. Dkhar,AEE PWD (Roads), Ranikor Sub-Division, Ranikor.