Iamir jingmut ka Bor Pyniaid District bad ki Nongialam Niam ha Mawkyrwat

Mawkyrwat, Risaw 01, 2020: Ka ophis jong ka Deputy Commissioner, South West Khasi Hills District, Mawkyrwat ka la pynlong ia ka jingiamir jingmut bad ki Nongialam Balang ryngkat ki Nongialam shnong halor ka jingplie noh ia ki jaka mane blei ha South West Khasi Hills District ba la pynlong hapoh Multi Purpose Hall, DC Campus.

Ka Kong Caramai Kharkongor, IAS, Deputy Commissioner, South West Khasi Hills District, Mawkyrwat ka la kren halor ka jingdonkam jongngi ki briew ban duwai bad shakri katkum ka jingngeit jongngi. Ka la bynrap ruh ba kum ki briew ngi donkam ban don ka mynsiem iatreilang te ka la kyntu ba ka District Administration, Nongialam Niam, bad ki Nongialam Shnong ki dei ban iatreilang na ka por sha ka por na ka bynta ka bha ka miat ka imlang sahlang bad ban ai jingshai ha ki paidbah.

Haba kren ha katei ka sngi U Bah L. K Diengdoh, MCS, EAC Mawkyrwat u la batai halor ki kyndon treikam na ka bynta ki jaka mane blei ba la bthah da ka tnad ka Koit ka Khiah bad ka Family Welfare ban tehlakam ia ka jingsaphriang jong ka khlam COVID-19. U la ong ba ka jingdeng ia ki mask, ka jing pyniajngai parabriew, ka jingsait ia ki kti ne ka jinglehkhuid, ka jingtap bha ia ka khmut ne shyntur haba synriah ne jyrhoh bad ka jingkiar na ka jingiatyngkhuh parabriew ki long ki bynta ba kongsan eh haba ki briew ki leit sha ki iingmane.

U Bah Ebormi F. Langshiang, District Disaster Management Officer, SWKHD, Mawkyrwat u la ai ka jingkhublei kyrpang ia kito ki nongpyniaid skul bad kiwei ki jaka ban pyndonkam kum ki Community Quarantine Centre (CQC) da ka bynrap ba mynta ka sorkar ka la ai jingmut ba dei ban pyllait noh ia ki skul bad KHADC kum ki CQC khnang ba kin lah ban sdang treikam noh. U la ai khublei kyrpang ia ka Nativity Convent ba ki dang ai jaka ban pynlong kum ka CQC na ka bynta ka District. U la kyntu ruh ba ki shnong ki dei ban wat jaka tymmai bad pyndonkam ia ki Anganwadi Centre kum ki CQC.