Rakhe Sngi Kyrpang ki Riew Tymmen ha South West Khasi Hills

 Mawkyrwat, Risaw 01, 2020: Ka ophis jongka District Legal Services Authority (DLSA), South West Khasi Hills District (SWKHD), Mawkyrwat mynta ka sngi ki la pynlong ia ka jingrakhe ia ka Sngi Kyrpang ki Riew Tymmen  ba la pynlong hapoh ka skul Hynriew Shnong Higher Secondary School, Shngimawlein.

Ka phang pdeng jong kane ka sngi kyrpang ki riew tymmen ka long “Hato kane ka Khlam ka pynkylla ia ka jingpeit jong ngi ia ka rta bad jinglongtymmen”. Kane ka sngi kyrpang ki riewtymmen ka long ka sngi ban pynkup burom ia ka jingtrei shitom bad jingnohsynniang ki riewtymmen ha ka imlang sahlang bad  ka long ruh ka sngi ban niewkor ba ka jingdon ki riewtymmen ka long ka jingkyrkhu bad ka spah ba khraw ia ki longiing longsem ne ka imlang sahlang.

Haba kren ha katei ka sngi u Dr. F.R. Lartang, District Medical and Health Officer, SWKHD, Mawkyrwat u la pynpaw ia ka jingkordor ban sumar ia ka koit khiah jong ki riew tymmen bad ia kito kiba don ia ki jingpang ha ka met kum ka jingpang shini, jingkiew ka blood pressure, ka jingpang ki tor, jingpang khyllai, ka jingtlot ka bor met bor phat bad kumta ter khnang ba kin im da ka jingkmen. U la ong ruh ba ngi dei ban burom ia ki riewtymmen khnang ba kin nang iai im shongprah shongshang. U la iathuh ruh ba ka sorkat ka la sdang ka National Programme jong ka Health Care of the Elderly (NPHCE) ka ba long ka prokram hapoh ka shatri jong ka National Health Mission ban hikai ia ki riewtymmen, ban iada na ki jingpang bapher bapher, ban sngap ia ka jingeh ba ki don kumjuh ruh ban ai jingshngain ia ki namar ha ka jinglong tymmen ka don ka jingsngewkynjah. U la bynrap ruh ba ha kum kane ka por jong ka khlam COVID-19 ngi dei ban sumar kham kyrpang ia ki riew tymmen bad pynbiang la ka jong ka kamra katba lah ei namar ba kane ka khlam ka ktah kham jur ia ki riew tymmen namar ba ki la kham tlot ka bor ialeh ha ka met ka phat. U la ong ruh ba ki bahaiing ki dei ban phikir bha da kaba bud ia ki kyndon treikam kum ka jingdeng ia ki mask, ka jinglehkhuid, ka jingpyniajngai parabriew khnang ban iada iala ki kmie ki kpa ne ki riewtymmen ha iing ha sem na ka jingshah ktah ha u COVID-19. U la kyntu ia baroh ba ngi dei ba sumar bha ia ki riewtymmen kum ka jingsiewkylliang ia ka jinglen lade jongki iangi bad lada ngi don ka jingim mynta ka dei tang na ka daw ka jingdon jongki.

U Bah L. Lyngdoh, District Social Welfare Officer, SWKHD, Mawkyrwat u la ong ba lada ngi peit ia ka imlang sahlang jongngi naduh ki por mynshuwa ngi don ka jingburom ia ki ba la kham heh kham san. U la ong ruh ba ki kmie ki kpa jongngi ki trei shitom na ka bynta jong ngi ki khun hynrei bunsien yna ki khun ki kti ki la heh la san, la don ki kam ki jam bad ki la bit la biang la ju lap ba kim don por shuh ban sumar ia la ki kmie ki kpa ynda ki la tymmen bad ki shu leit bret ia ki sha ki Old Age Home ne ki jaka sah ki riewtymmen. U la bynrap ruh ba ha ka imlang sahlang jongngi katba nang iaid ki por ka jingburom, ka jingieid, jingsumar ne jingniewkor jongngi ia ki riewtymmen ka la synjor bad kane ka long ki dak ki shin ba ma tam jong ka imlang sahlang. U la pynpaw ba kum kane ka jingrakhe ia ka sngi burom ki riewtymmen ka dei ban pynkynmaw bad pynkyndit bynriew iakane ka juk ba mynta ba ngi dei ban kylla kaba mut bad ngin phai biang sha ki dustur ban burom bad ban iarap ia ki ruh ha ka por ba ki riewtymmen ki donkam ia ki khun. U la kren ruh halor ka Old Age Pension skhim na ka bynta ki riewtymmen ba la dap 60 snem ka rta bad ki lah ban ioh 500 tyngka shibnai. U la ong ruh ba ynda la tymmen ki kmie ki kpa ki shanniah tylli tyllan ha ki khun hynrei ki khun pat ki lehrain ia la ki kmie ki kpa bad ki leh lyndet bad klet ia ka jinglen lade jongki iala ki khun bad ki khun ki ong pynban “tymmen biej”. U la pynkut da kaba kyntu ba katba dang don ki riewtymmen ka long ka jingkyrkhu  bad ki long ki blei kiba im (living god) te namarkata ngi dei ban burom, sumar bha ia ki bad pynkmen iaki namar ka jingburom ia ki kmie ki kpa ka long ka jingburom ia U Blei bad kata ka dei kawei na ki kamram kaba U Blei u kwah ia ngi ba ngin leh hangne ha sla pyrthei. 

Ia katei ka prokram la pyniaid da u Bah Tensing Lyngdoh Nonglait, Para Legal Volunteers bad ia ki kyntien ai khublei la pyndep da ka kong Nosmi Hahshah, Advocate.