Da ka jingïakop kren muk-mak pynlong ka DC (Election) Mawkyrwat

Mawkyrwat, Kyllalyngkot 23: Ka ophis jong ka Deputy Commissioner (Election), South West Khasi Hills District, Mawkyrwat, lyngba ka Election Commission jong ka Ri India ka Systematic Voters Education & Electoral Participation (SVEEP) ha ryngkat ka jingïatreilang bad ka Election Literacy Club (ELC), kum shibynta ban rakhe ïa ka National Voter's Day 2020, ka la ïoh ban pynlong ka jingïakop kren muk-mak ne ka extempore speech na ka bynta ki khynnah skul ha Multipurpose Hall, DC's Office, Laitlawsang.

             Shwa ban sdang ïa ka jingïakop, la ïoh ban pynlong ïa ka jingïalang ba lyngkot ha kaba u bah H.K. Thabah, ADC, South West Khasi Hills District, u la pynïaid ïa ka jingïalang bad kren lamphrang ruh ïa ka jingthmu jong ka prokram.

             U bah W. Biam, Additional Deputy Commissioner, South West Khasi Hills District , haba kren ha ka jingïalang kum u kongsan, u la ong ba ha kane ka sngi la pynlong khnang da ka jingïakop kren muk-mak kum shibynta ban rakhe ïa ka National Voter's Day 2020 ha kaba la ju rakhe ïa ka man la u snem. Namarkata, u la pynkynmaw ïa ki samla ba ynda ki la dap 18 snem ki dei ban mih shakhmat ban pynrung ïa lade ha ka electoral roll ne ban don noh la ki jong ki EPIC da kaba kin leit mih ha ophis treikam hapoh DC's Office ne lah ban leh da ka online ruh. Ha ka juh ka por, u la ïathuh ruh ba ïa ki nongmihkhmat la jied hi da u paidbah lyngba kito ki briew kiba la don la ka jong ka EPIC Card.

             "Ym dei tang ban don kyrteng ha ka dur thep vote hynrei ha ka por ba dei ka sngi jong ka jingjied ïa ki nongmihkhmat kito baroh kiba don la ki EPIC ki dei ban mih shakhmat ban jied ïa u ne ka nongmihkhmat", ong bah Biam. Lyngba kane ka prokram, u la kyntu ïa ki khynnah skul ba kin long ki nongrahkhubor na ka bynta kiwei pat ki samla, bad ba kin long ki briew kiba shimkhia ha kaba ïa dei bad ka jingpynrung kyrteng ïa lade ha ki Electoral Roll khnang ba kan long ka jingmyntoi. Shuh shuh u la ai mynsiem ruh na ka bynta ki khynnah skul ba haba ki don hapdeng ki jingpule kim dei ban hun tang ban don ha la ki jong ki shnong ne pule tang dep rukom hynrei ki dei ban pyrkhat bad da kaba minot thop ha ki jingpule khnang ba ka lawei jong ki kan long kaba phyrnai. U la ai mynsiem ruh ba haba ki ïashimbynta ha kane ka jingïakop kren muk-mak kim dei ban lehraiñ hynrei ki dei ban ïashimbynta da ka jingshlur.

             Ki nongïashimbynta ha ka jingïakop kren muk-mak ne ka extempore speech ki don baroh 7 ngut katba ha ka ïakop thoh Slogan ki don baroh 13 ngut. Ïa ki khusnam nongjop ha kine ki ar tlli ki jingïakop yn sa sam paidbah ha ka 25 tarik u Kyllalyngkot, 2021 kaba dei ka sngi jong ka jingrakhe ïa ka National Voter's Day 2020.