Plie pyrda u Bah Lahkmen Rymbui ia ka iing skul bathymmai ha Photjaud-Rangthong

Mawkyrwat, Rymphang 23, 2021: U Bah Lahkmen Rymbui, Honb’le Minister i/c Border Areas Development Department, District Council Affairs Department, Education Department, Home (Police) Department, Government of Meghalaya mynta ka sngi u la plie pyrda ia ka iingskul bathymmai jong ka Horirai Syiemlieh Memorial Higher Secondary School ha ka jingiadonlang U Bah Pius Marwein, MLA bad MDC jong ka Ranikor Assembly Constituency, Kong C. Kharkongor, IAS Deputy Commissioner, South West Khasi Hills District  (SWKHD), Mawkyrwat, Bah M. Syiem, MPS, SP, SWKHD, Bah Carnes Sohshang, MDC, Mawkyrwat ki ophisar na DSEO, Mawkyrwat bad kiwei dei. Ia katei ka skul la shna lyngba ka project Supporting Human Capital Development Project ba la kyrshan pisa da ka Asian Development Bank ha ka mang tyngka ba T 1.52 klur.

Haba kren kum u kongsan ha katei ka sngi u Bah Lahkmen Rymbui u la pynpaw ia ka jingtrei shitom jong ka sorkar ha kaba wad ki lad ki lynti ban pynbit pynbiang ia ka pule puthi hapoh ka jylla. U la iathuh ruh ba ka sorkar ka mad shibun ki jingeh ha kaban pynbiang lut ia ki jingdonkam jong ki skul, ki nonghikai ne ki kmie ki kpa katkum ka jingdawa jong ka juk kaba mynta.  Wat la kata u la bynrap ba ka sorkar ka la pyrshang ban pynbiang ia ki skul ym tang da ki jingtei ne ne tiar katkum ka juk ba mynta hynrei ka la ai ki jinghikai ba kyrpang ia ki nonghikai ba ki lah ban hikai ia ki khynnah skul. U la ong ruh ba ka jingdon ki skul katkum ka juk ba mynta ha ki nongkyndong kan iarap ban weng noh ia ka jingiapher hapdeng ki khynnah ha nongkyndong bad ha sor bad kan don ka jinglong ba iaryngkat. U la bynrap ruh ba ka juk ba mynta ka dei ka juk ba ba jur bha ka jingiakop bad dei na kata ka daw ba ki khynnah ki dei ban long kiba iar jingmut, ba pule minot ia ki kot, kiba wad jingtip kiba bniah lyngba ki teknoloji bad ba kin long borabor kiba la khreh. U la iathuh ruh ba ka sorkar ka pyrshang ban ai ruh ki jinghikai ba kyrpang ia ki samla khnang ba kin lah ban ioh kawei ne ar ki sap trei (skill training) ban pyntbit ialade katkum ka jingthrang ne ka thong jongki. U la ban ruh ba ka pule puthi ka dei ban long kaba im bha (dynamic) bad kaba ai jinghikai ba ki khynnah kin long kiba iar jingmut bad ym ban shu ap ne kut tang ha kaba wad kam sorkar. U la bynrap ruh ba bun ki khynnah ki duh jingkyrmen lada kim ioh kam sorkar ne kim ioh ia ka thong ba ki kwah hynrei u la kyntu ba kim dei ban long kumta namar haba kawei ka jingkhang ka khang ki don bun kiwei pat ki jingkhang ki ban plie lad plie lynti ia ki. U Bah Lahkmen u la ong ruh ba ki briew kim dei ban shah pynbiej ha ki khubor hamsaia bad leh ki kam ban ialeh pyrshah ia ka sorkar ha kaban pyntrei ia ki kam na ka bynta ka roi ka par hynrei ki dei ban wad jingtip kaba bniah bad long kiba shlur ban iakren khnang ba kaei kaba ki ngeit bad iohi kan long kaba dei bad kaba bha. U la iathuh ruh ba ka sorkar ka dei ka jong u paidbah bad kam ju don kano kano ka jingthmu ban leh shiliang iano iano la ka dei ha ki iingskul, ki surok, hospital bad kiwei de ki kam pynroi. U la iathuh ba ka sorkar ka la mang pisa kyrpang ruh ban maramot ia ki skul sorkar kiba don hapoh ka jylla.

U MLA bad MDC jong ka Ranikor Assembly Constituency, U Bah Pius Marwein, u la ong ba katei ka iing skul ka la long ka iing ba paka katkum ka juk ba mynta bad kan sa iarap shibun ban kyntiew ia ka pule puthi hapoh ka dong ka thain. U la ong ruh ba ka jingnang jingstad ka long kaba kordor haduh katta katta bad ka jingshimkhia jong ka sorkar, ki nongpyniaid skul, ki kmie ki kpa bad ki khynnah skul kan sa pynlong ia ka lawei ka ri bad ka jaitbynriew kaba phyrnai. U la pynpaw ruh ba kum u nongmihkhmat katei ka thain yn sa pyrshang ban wad ki lad ki lynti ban nang kham pynbha shuh shuh ia katei ka skul khnang ba ki khynnah kin ioh ia ki jinghikai ba pura. U la kyntu ruh ia ki khynnah ba kin long kiba trei shitom bad ki dei ban wanrah ia ka nam ka burom ia ka dong ka thain.  U la kyntu ruh ba ki khynnah skul ki dei ban pyndonkam bha ia ki lad jingiarap jong ki teknoloji ba mynta bad ban ym long pat  ki mraw jong ki teknoloji.

            Ka kong C. Kharkongor, IAS Deputy Commissioner, South West Khasi Hills District  (SWKHD), ka la ong ba thong jong ka Asian Development Bank (ADB) lyngba ka projek Supporting Human Capital Development Project ka long ban kyntiew ia ka pule puthi  ym tang da kaba pynshna ki iingskul ba thymmai katkum ka juk ba mynta hynrei ki don ruh ki bynta ban ai jinghikai ia ki nonghikai ban iarap ba ki khynnah kin ioh ki jinghikai ba thikna bad ba pura katkum ka juk ba mynta. Ka la ong ruh ba ka pule puthi mynta kam dei shuh tang ban shu pyndep ki klass bapher bapher ne pass ia ki eksamin hynrei ban long kiba la khreh ban ialeh ia ki eksamin iakop (competitive  exam) bapher bapher. Ka la kyntu ruh ba ki khynnah kim dei ban kiar na ki sobjek ki ba eh jong ka science (hard science) kum ka physics, chemistry lane maths namar ki long ki sobjek ba lah ban iarap bha ia ki. Ka la ong ruh ba kim dei ban klet ne leh lyndet pat ia ki sobjek social science namar kitei ki sobjek ki long ki ba donkam hi ban ioh kam iohjam. Ka da pynkut da kaba ong ba ka thong jong ka sokar lyngba ka tnad pule puthi ka long ban saindur ia ki khynnah ban ioh kam iohjam, ban long kiba tbit ban treikam,  ban long kiba lah ban ieng ha la ki jong ki kjat bad ban wanrah ka roi ka par ha ka imlang sahlang.

            Ka kong S. Kharsohnoh, DSEO, SWKHD ka la batai bniah halor ka jingsdang ia katei ka skuk bad ka la ong ruh ba ki khynnah kiba mynta kin sa long ki nongialam jong ka ri bad jaitbynreiw ha ki por ban sa wan.

Ia katei ka prokram ba la pynlong ha phyllaw skul jong ka Horirai Syiemlieh Memorial Higher Secondary School la pyniaid da u bah S. Iawphniaw Asst. Teacher, la pdiang sngewbha da ka kong O. Syiemlieh Principal. Ha kajuh ka por  la ai ia ka Memorandum da u bah C. Syiemlieh, President M.C, ki la don ruh ki prokram jingshad bad jingrwai da ki khynnah skul bad ia ka jingkren ai khublei la pyndep da u bah P. Lyngdoh, Asst. Teacher.