Plie pyrda u Bah Pius Marwein ia 3 tylli ki jingkieng ha Maheshkola

 Ranikor, Rymphang 18, 2020: U Bah Pius Marwein, MLA bad MDC jong ka Ranikor Constituency u la plie pyrda ia 3 tylli ki jingkieng (jingkieng No. 1/1, 2/1 bad 4/1) kiba don ha ka surok Maheshkola Darengiri ba la pyntrei lyngba ka skhim RIDF XXII & XXIII ha ka jinglut ba la kot haduh T 13 klur.

Haba kren ha katei prokram ba la pynlong ha phyllaw skul Blue Star, Upper Primary, u bah Pius u la pynpaw ia ka jingsngewnguh ia ki Engineer, SDO bad contractor ia ka jingtrei shitom ka jongki ban pyndep ia ki jingkieng ha ka por ba biang ban pynduna ia ka jingeh jong ki paid nongshong shnong jong katei ka dong ka thain khamtam lei lei ha ki por ba slap. U la ong ruh ba kitei ki jingkieng ki long ki lynti jong ka jingsdang ban kyntiew ia ka roi ka par ha ka dong ka thain kumjuh ruh ban wanrah ka jingkylla ha ka pule puthi, ka koit ka khiah bad kiwei de. U pynpaw ruh ba kum u nongmihkhmat jongki u tip ia ka khia ka shon jongki bad u treishitom ban wat ki skhim bapher bapher kum ki skhim um, skhim pynbiang bording bad kiwei ki skhim na ka liang jong u MLA. U la iathuh ruh ba u la pyrshang ki lad ki lynti ban iarap ia ki jingdonkam ba hakhmat eh jong ki paidbah bad u la kular ruh ban ai jingiarap kumba T 15 lakh ia ka Blue Star, Upper Primary Skul na ka bynta ban pynbha bad ban shna tymmai ia ki kamra klass na ka bynta ban kyntiew ia ka jingpule jong ki khynnah.

Ka kong C. Kharkongor, IAS, Deputy Commissioner, South West Khasi Hills District, Mawkyrwat ka ong ba ka jingplie pyrda ia ka jingkieng kan sa wanrah shibun ki jingmyntoi ha ioh ka kot, ka roi ka par ha ka dong ka thain, kan sa pynsuk ia ka kit ka bah jong ki briew khamtam ia ka jingkit ia ki nongpang sha ki jaka sumar bad kumjuh ruh ban pynpoi ia ki mar rep jongki sha ki iew ki hat. Ka la pynpaw ruh ba ka jingwan jngoh jong I ia katei ka dong ka thain ka long ruh kum kawei ka lad ban sngewthuh ia ka khia ka shong bad ka ka jingjynjar jong u paidbah katei ka dong ka thain bad ka la kular ban iarap katba lah ei. Ka la ong ruh ba kan pyrshang ban iarap ban pynsuk ia ki briew ban ioh lad ban shondur aadhaar noh kham kloi da kaba phah ia ki nongtrei ba kin leit sha katei ka shnong bad ka da kyntu ruh ba ki briew baroh ki dei ban shondur aadhaar noh kham kloi khnang ban ioh ia ki skhim sorkar kiba pher bapher. Ka la kyntu ruh ia ki nongtrei ka tnad ka koit ka khiah, Anganwadi, bad ia ki ASHA ba kin shim ia ka kabu ksiar ban shim ia ka jingai tika iada na u COVID-19 khnang ban iada ialade bad ba kin ym long pynban ki nongpynsaphriang ia katei ka jingpang ha kito ba ki peit ki khmih. Ka la bynrap ruh ba ki briew kim dei ban sngap bad ngeit ia ki khubor hamsaia kiba hakaba iadei bad ka jingai tika iada na u COVID-19 hynrei ba kin pdiang khnang ban tehlakam ia ka jingsaphriang katei ka khlam. Ka la kyntu ruh ia ki paidbah katei ka dong ka thain ba kin sdang ki kynhun ne society bad ban shim ia ki skhim ri sniang lyngba ka Piggery Mission khnang ban kyntiew ia ka ioh ka kot jong ki briew.

Haba kren kum nongpeit nongkhmih ia ka jingpyntreikam ia kitei ki 3 tylli ki jingkieng u Bah K.C Nongrum, EE, PWD (Roads), Ranikor Division u la iathuh ia kitei ki 3 tylli ki jingkieng la pyntrei lyngba ka skhim RIDF XXII & XXIII ha ka mang tyngka ba T 8.30 lakh na ka bynta ka jingkieng No 1/1 bad T. 9.20 Lakh ia ka jingkieng 2/1 bad 4/1. U la iathuh ruh ba ka tnad PWD (Roads) Ranikor ka la pyrshang ruh ban ai rong noh ia ki surok bym pat iohrong ba kumjuh ruh la don ki bynta jong ka surok Maheshkola Dadengiri ba la aiti sha ki contractor ba kin treikam noh ban siang rong.

Ban pynphuh pynphieng shuh shuh ia katei ka sngi kaba la pyniaid da u Bah H.S Diengdoh, ADC i/c Ranikor Civil Sub-Division la don ruh ki jingkren na ki contractor, ki riew rangbah bad ia ka jingkren ai khublei la pyndep da u bah D. Kyndiah, AEE, PWD (Roads), Nonghyllam Sub-Division. La don ruh ka jingduwai, jingrwai pdiang sngewbha, jingshad Garo Traditional Dance, Manipuri dance bad kiwei de ki program ban pynbyrngia ia u paidbah ba la iadon bynta ha katei ka sngi.