Buh mawnongrim u Minister PHE ban tei ia ka Mawkyrwat Rural Haat/ Foundation Stone Laying Ceremony for Mawkyrwat Rural Haat

Mawkyrwat, Iaiong 23, 2021: Ka Meghalaya State Rural Livelihood Society (MSRLS) ha ryngkat ka jingiatreilang bad ka Block Mission Management Unit, Mawkyrwat mynta ka sngi ki la pynlong ia ka prokram ban buh ia u mawnongrim na ka bynta ban tei ia ka Mawkyrwat Rural Haat kaba la pynlong ha ka madan hajan Mawkyrwat Community Hall haka ba u Bah Renikton Lyngdoh Tongkhar, Hon'ble Minister PHE bad MLA ka Mawkyrwat Constituency u la long u kongsan ha ryngkat ka jingiadon lang ka kong kong C. Kharkongor, IAS, Deputy Commissioner, u James George, DGM NABARD, Shillong, u Utpal Bezbarauh, DDM NABARD, Nongstoin,  u U Bah F.B Basan, BDO, Mawkyrwat, u T.Bn. J. S Khardewsaw, Balang Presbyterian Mawkyrwat, myntri shnong Mawkyrwat bad kiwei de.

Haba kren kum u kongsan ha katei ka sngi u bah Renikton Lyngdoh Tongkhar, Hon'ble Minister PHE bad MLA ka Mawkyrwat Constituency u ong ba katei ka sngi ka ai jingkyrmen shi katdei haban ioh ban plie ia u mawnongrim jong ka rural haat (iew nongkyndong) kaban long ka jaka ban kyntiew ia ka ioh ka kot, ka rep ka riang bad ban pynphyrnai ia ka imlang sahlang. U la pynpaw ruh ba ka jingplie ia ka iew shipor (temporary farmers market) ka long kawei ka lad ban ialeh pyrshah ia u khniang jingpang COVID-19 lyngba ka jingpyniajngai parabriew. U la pynpaw ruh ia ka jingkmen ba ki ophisar sorkar ki la shimkhia ban kham pynjanai ia ka iew shipor. U la ong ruh ba ka jingbuh ia u mawnongrim ban tei ia ka iew nongkyndong ba bha kan sa pynduna ia ka jingkhapngiah ha iew mawkyrwat bad kan sa plie lad ban nang kham bun ki dukan ba bha ha Mawkyrwat kum ki restaurant ba kham bha bad ba kylluid ka jaka ieng kali. U la pynpaw ruh ia ka jingsngewnguh ia ka Balang Presbyterian kaba la noh synniang ban ai ia ka jaka ban tei ia ka iew bad ia ka jaka sah jong ki kynthei (Girl’s hostel) da kaba ong ba “ka Balang Presbyterian ka la long ka shlem jingkyrkhu ban wanrah ia ka roi ka par ha ka dong ka thain”. U la kyntu ruh ia ki paidbah nong shnongshnong ba ki dei ban bud pyrkhing bha ia ki kyndon treikam COVID-19 kaba kim da donkam ban siew pisa kum ka jingdeng ia ki jingda khmut bad shyntur (masks), ban sait na ka por sha ka por ia ki kti da ka um bad sabon ne ban sanitize, ban pyniajngai parabriew bad ban kiar na ki jaka paidbah.

Ka kong C. Kharkongor, IAS, Deputy Commissioner, South West Khasi Hills District, Mawkyrwat kaba long ka symbud kongsan ha katei ka sngi ka la ong ba katei ka rural haat (iew nongkyndong) kan wanrah jingmyntoi shibun ia ki nongrep ha kaban die ia ki mar rep jongki. Ka la bynrap ba ka jinglong pdeng ka jaka ban shna ia ka iew kan pynsuk ia ki nongdie bad nongthied ban pyndep ia ki kam jongki. Ka la ong ruh ba ki briew kane ka thain kin ioh jingmyntoi shibun na katei ka iew ha ka ioh ka kot jongki kaban kyntiew ia ka imlang sahlang kumjuh ruh kan ai mynsiem ban nang pynmih ia ki mar rep ne ki tiar ki tar jongki. Ka DC ka la shim ruh ia ka lad ban kren halor ka jingdonkam ba hakhmat tam ban shim ia ka tika iada na u COVID-19 ban tehlakam ia ka jingpursted u tei u khniang jingpang. Ka la ong ba ka jingshim tika kan pynduna ia ka jingkhlain bor utei u khniang ban pynshitom iangi bad ka long thik kum ka shatri ba iada iangi ha ka por ba slap.  Ka la pynkut da kaba kyntu ia ki nongialam niam ba kin pynshlur ia ki parabangeit jongki ba kin shim ia ka kabu ksiar ban phah shim ia ka tika iada.

U DDM NABARD jong ka Nongstoin u Utpal Bezbarauh u la ong ba ka Mawkyrwat Rural Haat kan long ka iew nongkyndong kaba heh tam ba la kyrshan pisa da ka NABARD ha ryngkat ka jingiatreilang ka Block Development Office bad ka Meghalaya State Rural Livelihood Society (MSRLS). U la iathuh ruh ba ka jingsynniang pisa ka long T. 15 Lakh na ka NABARD, T. 15 Lakh na ka Block bad T. 3 Lakh na ka MSRLS kaba baroh ka long T. 33 Lakh. U la bynrap ruh ba yn pyndep ban shna ia katei ka iew nongkyndong hapoh ka 1 snem. U la pyntip ruh ba katkum ka saindur (plan) ban shna ia katei ka iew, ka iing ka dei ban long kaba neh junom (permanent), kaba don ka jaka buh ia ki mar ki mata (godown), kaba biang ka um (water facilities), kaba don ki painkhana ba bha (sanitation), kaba biang ka lait (electricity/solar lighting), kaba don ki jaka bret niut (proper disposal of garbage) bad kaba don ruh ka jingker (fencing). U la batai ruh ba ia ka jingtei ia katei ka iew yn sa peit da ka committee ba kyrteng RHMC kaba lamkhmat da u BDO.

U Bah F.B Basan, BDO, Mawkyrwat, u T.Bn. J. S Khardewsaw, Balang Presbyterian Mawkyrwat,bad  U James George, DGM NABARD, Shillong ruh ki la kren ha katei ka sngi. Ka Long A We Village Organisation Mawkyrwat ka la rwai ia ka jingrwai pdiang sngewbha ha katei ka prokram ba la pyniaid da u bah Eson A Khongrymai DMM, MSRLS/NRLM bad ba la ai ia ki kyntien ai khublei da ka kong Rila A. Kharlyngdoh, Mawkyrwat Block.