Pynbna “Containment Area” ïa ka ïing ha Shnong Sohkhyllam, South West KHD

Mawkyrwat, Ïaïong 16: Ka ophis jong ka Deputy Commissioner, South West Khasi Hills District, Mawkyrwat, hadien ka jinglap ba don positive case/high risk contacts ba la tip thikna ha kawei ka ïing ha shnong Sohkhyllam, bad na ka daw jong ka jingïakynduh jong katto katne ki briew ba dei high risk bad low risk bad kito kiba ïoh positive case, kito ki jaka ba kham don jingma bad ba shah ktah ki donkam ban hap buddien ïa ki nongleit nongwan (contact tracing), jingshong pynkyrpang, testing bad ban ïada na ka jingsaphriang na ka bynta ka koit ka khiah jong u paid nongshong shnong ban lait na kino kino ki jingsaphriang jong u COVID-19, ka la pynmih ïa ka hukum ban pynbna ïa ïing bad ka phyllaw jong i kong Saralynti Syiemlieh kum ka “Containment Area” khnang ban khanglad ïa ka jingrung jingmih ha kitei ki jaka.

            Kumta, yn ym shah ïa ki briew ba kin leit ban rung sha katei ka containment area bad kumjuh ruh ki briew na kitei ki jaka kim dei ban mih shabar hynrei kin hap ban shongkhop ha ki ïing ki sem. Yn ym shah ban pynlong kino kino ki jingkhawai ne jingïalum paidbah ha kitei ki jaka.

            U Incident, Zone-V, u bah O.L. Passah, Superintendent of Fisheries, Mawkyrwat and Zonal Officer un long u Supervising Officer ban peit ban khmih ïa ka jingbud ryntih ïa kane ka hukum.

            Lada don kino kino kiba pynkheiñ ïa katei ka hukum, kin shah pynshitom katkum ki kyndon aiñ jong ka Disaster Management Act, 2005 bad IPC. Na ka daw jong ka jingdonkam ba kyrkieh, kane ka hukum kan treikam mardor.