Hiar Jurip u Bah A.L Hek bad Dr. Aman War ia ka SWKHD halor ka jinglong ba la kreh jong ka District ban iakhun pyrshah ia u COVID-19

Mawkyrwat, Jylliew 17, 2021: U Bah Alexandar Laloo Hek, Minister ba dei peit ia ka tnad ka koit ka khiah bad u Dr Aman War, Director of Health Services (MI), Shillong ha ryngkat ka jingiadon lang u Bah Renikton Lyngdoh Tongkhar, PHE Minister bad MLA jong ka Mawkyrwat mynta ka sngi ki la hiar ban jurip ia ka South West Khasi Hills District (SWKHD) halor ka jinglong ba la kreh jong ka District ban iakhun pyrshah ia u COVID-19 mynta bad lada jia ba ka wan ka jinglynshop kaba lai (3^rd Wave) ka ban ktah ia ki khyllung khynnah. La pynlong ia ka jingialang ha Multi-Purpose Hall DC Campus, nangta ki la hiar jurip sa ia ka Hospital 100 jingthiah ha Mawkyrwat bad ki la aiti noh ia kawei ka Ambulance sha ka Rangthong PHC ha ryngkat ki tiar ka koit ka khiah ba donkam eh.

Haba kren ha katei ka sngi u Bah Alexander Laloo Hek, Minister Health bad Family Welfare Department u la ban khiah halor ka jingdonkam ban ai tika iada na u COVID-19. U la ong ba ka ktien u Blei ka ong ba “U Blei u iarap ia kito kiba iarap ialade bad U Blei u la phah shibun ki briew ban iarap iwei ia iwei pat kum ki doctor, ki nurse, ki pulit, ki nongtrei sorkar bad ki saiantis”. U la bynrap ba ka jingduwai bad ka jingngeit jongngi ha U Blei ka la wanrah ka jingkyrkhu ha kaba u Blei u la ai ia ka jingstad bad shemphang ban lap ia u tika iada na u COVID-19. U la ong ruh ba u tika iada (vaccine) u long kum ki suloi, ki tank thma ban iakhun pyrshah ia u khniang jingpang COVID-19 bad ka jingkyntu ki Deputy Commissioner ban ai tika ka dei namar ba ki ieid iangi bad ki kwah ia kaei kaei kaba bha na ka bynta jongngi ki paidbah. U la ban ruh ba ngi iakhun ia u khniang u ba long u nongshun ba ngim lah ban iohi bad lada ngi shu khynniad beit tang ha ka sorkar ba kan iada iangi kamut ngi la rem lypa ia ka thma hynrei lada mangi da lade ialade ngi sumar bad ialeh pyrshah ngin sa jop ia ka thma pyrshah ia une u khniang. U la iathuh ruh ba ka project jong ka hospital ba 100 jingthiah ha Mawkyrwat ka dei kawei na ki project ban rakhe ia ka jingdap 50 snem (Jubili Rupa) jong ka jingioh jylla ka Meghalaya te ka Sorkar ka la buh ka thong ban pyndep bad ai ia ka ba bha tam ha katei ka hospital katkum ka juk sumar ba mynta. U la pynpaw ruh ba ka long kaba eh ban pynbiang lut nadong shadong na ka liang jong ka Sorkar hynrei kam ju duh jingkyrmen bad ka pyrkhat ia ki jingeh u paidbah ha ka imlang sahlang na ka por sha ka por bad leh ia kaei kaei kaba bha tam. U la pyntip ruh ba ka Sorkar ka la ai kawei ka ambulance, ki oxygen cylinder bad ki tiar ba donkam eh ban ai sha ka Rangthong PHC na ka bynta ban pynbiang shuh shuh ia ka jingdonkam katei ka PHC.

U Bah Renikton Lyngdoh Tongkhar, PHE Minister u la ong ba ka jingsumar bad jinghusiar jongngi marwei marwei ha ryngkat ka jingkut jingmut ban ai tika kan sa iarap iangi ban lait na kane ka khlam. U la bynrap ba ka lad ba nyngkong eh ban iada iangi na kane ka khlam ka long tang ka jingai tika. U la iathuh ruh ba ki ri European mynta ki la laitluid ha ka imlang sahlang, ki la lah ban ialehkai bad ban ym deng shuh ia ki mask tang namar ba ki la dep ai tika. U la ban khia ruh ba ka lad ban iakhun ia kane ka khlam ka dei tang ka jingai tika (vaccination) bad ngim dei ban don ka jingartatien namar ba ka pyrthei baroh kawei ka la pdiang ia kane, hynrei lada don kiba artatien ki dei ban ai iangi da kiwei ki lad ki lynti kumno ban iakhun ia ka khlam. U la pynpaw ruh ba bun ki briew kiba ong ba ngi shanniah ha U Blei bad ngim donkam ia ka tika hynrei dei U Blei hi u ba la ai ia ka jingstad ha ki briew ban lap ia u tika iada, la ong u Bah Renikton. U la bynrap ruh ba lada ngi dih dawai bad U Blei ym don ryngkat bad ngi ka dawai kan ym treikam. U la pynkut da kaba kyntu ba ngin ia shim ia ka tika iada (vaccine) da ka jingngeit namar ba ka tika ka don ka jingiada kaba long kumba 94% na u khniang jingpang COVID-19.

U Dr. Aman War, Director of Health Services (MI), Shillong u la ong ba ka jingiadonlang jong ki nongialam balang bad ki nongialam shnong ka ai mynsiem bha ia ki nongtrei ka tnad ka koit ka khiah bad ka sorkar namar ki long kiba hakhmat duh ban pyniaid ia ki kam ba dei ha ki shnong ki thaw bad khlem ka jingiarap ka jongki kane ka jingialeh pyrshah ia ka khlam kan sa pulom. U la ong ba ka jingpynjari Khangdam (Lockdown) ka dei ka lad ka lynti ban tehlakam ia ka jingsaphriang u khniang jingpang bad ka long ka nongshun iangi hynrei da ka jingpyniaid bastad u Blei Trai Kynrad u la ai iangi u tika iada (vaccine) u ba long u paralok ban iada iangi. U la iathuh ruh ba kumba 99% ka jingktah jong ka jingpang COVID-19 ka kham duna ia kito kiba la ioh ia ka tika iada bad lada ka Sorkar ka lah ban ai tika 100% ia ki nongshong shnong kan ym don shuh ka jingkhangdam (Lockdown) bad kan sa don ka jinglaitluid ha ka imlang sahlang. U la kyntu ba ngim dei ban don ka jingtieng namar ba baroh ngi long ki trai muluk trai jaka bad ka sorkar ne ki nongtrei ka tnad ka koit ka khiah kin ym leh kaei kaei kaban ktah ia ki para briew jongngi. U la iathuh ba ka Sorkar ka la phah 75 tylli ki Oxygen Cylinder ki baheh hapoh Mawkyrwat bad kan sa ioh ruh ia kawei ka Oxygen plant. U la pynkut da kaba kyntu ba ki briew ki dei ban nang iatreilang namar ba  ha ka khlam ym don politik, ym don niam, ym don kur, ym don hima bad ym don baieid ba thoin ka sar lut naphang.

U District Surveillance Officer jong ka South West Khasi Hills District, U Dr. W. N. Narry u la iathuh halor ka jingpynkreh ka District ban iakhun pyrshah ia ka khlam COVID-19. U la iathuh ba haduh mynta ki total case ba ioh COVID-19 ki long 864 ngut, kiba la koit 561 ngut, ki ba la khlad ki long 4 ngut bad ki active case ki long 300 ngut ha kaba 199 ki dei ha ka thain Mawkyrwat bad 101 ki dei ha thain Ranikor. U la bynrap ba ha ka thain Mawkyrwat 20 tylli ki shnong ba kynthup ia 118 tylli ki longiing ki la shah ktah ha u khniang jingpang bad ha ka thain Ranikor 11 tylli ki shnong ba kynthup ia 41 tylli ki longiing ki la shah ktah. Katkum ka jingiathuh u Dr. Narry la don kumba 15 ngut ki longkmie ba armet ba la shah ktah ha utei u kniang jingpang ha kaba mynta 4 ngut (active case) ki dang don ia utei u khniang jingpang bad u la ktah ia 257 ngut ki khynnah ba 18 snem shapoh ha kaba 133 ngut ki dang don ia utei u khniang jingpang (active case). U la iathuh ruh ba haduh mynta la dep test kumba 12,029 ngut ki briew ha kaba 10875 da ka RAT, 253 da ka RTPCR bad 901 da ka TRUENAT. U la pyntip ruh ba ka District ka don 39 tylli ki Oxygen Concentrator, 56 tylli ki Oxygen Cylinder type-D, 38 tylli ki Oxygen Cylinder type-B, bad 3 tylli ki Corona Care Centre (CCC) ba kynthup ia ka Mawlangwir Community CCC, Mini Secretariat CCC bad Ranikor CCC.

Ia katei ka jingialang ba la iashim bynta da ki nongialam niam, nongialam shnong, ki Zonal Magistrate, Sector Officer, bad kiwei ki ophisar la pyniaid da ka Kong Caramai Kharkongor, IAS, Deputy Commissioner, South West Khasi Hills District, Mawkyrwat bad la ai ia ki ktien ai khublei da ka kong J.U Kharpuri, MCS, ADC, Mawkyrwat.