Ka hukum halor ki kyndon treikam hapoh Iew Mawkyrwat/ SOPs at Mawkyrwat Market

Mawkyrwat, Jylliew 15, 2021: Ka ophis jong ka Deputy Commissioner, South West Khasi Hills District Mawkyrwat ka pynmih ia kane ka hukum shaphang ka rukom plie ia ki dukan hapoh Iew Mawkyrwat katkum ka jingpynbeit Odd bad Even Number kaban sdang naduh ka 16 tarik Jylliew, 2021 kat haduh ban da pynbna da kumwei pat.

Katkum kane ka hukum ki dukan kiba don u Registration Number 1 kin plie ha ki sngi ba dei Odd katta ha ka sngi nyngkong, sngi balang bad sngi thohdieng bad kiba don ia u Registration Number 2 kin plie ha ki sngi ba dei Even katta ha ka sngi ba-ar, sngi palei bad sngi saitjain.

Ki kyndon jong ki Nongshong Dukan ha Iew Mawkyrwat ki long ba ki nongshong dukan ki dei ban long kiba lah dep ai tika, ki dukan ki dei ban plie kat kum ka hukum ba la bthah da ophis, ki trai dukan ki dei ban tah ia u number ha ki dukan katkum ba la ai na ka ophis, ki nongshong dukan ki dei ban long ki nongkitkhlieh na ka bynta ban peit ia ka jingia jngai iwei na iwei pat kumba 6 phut (2meter) hapdeng ki nongthied bad ban kiar na ka jingialum bun briew hapoh dukan lane ha rud ha kiar dukan, ki nongshong dukan ki dei ban buh ia ka jaka sait kti lane sleh kti (hand sanitizer), ki nongshong dukan ki dei ban deng 2 tylli ki mask bad ban die tang sha kito ki nong thied kiba deng mask, ki nong shong dukan kidei ban tah I kynja poster ia ki kyndon sumar sukher (health protocols) ba la bthah da ka tnat ka koit ka khiah lane da ka ophis, baroh ki dukan ki dei ban khang ha ka por khangdam (lockdown) lait noh tang ki dukan shnong la shah ban plie bad ki dukan dawai (pharmacies), la mana ban ym pyndonkam bakla ia ki odd-even number certificate ba la ai da ka ophis, bad ka por plie iew kan long ha ka por 9 .00 baje mynstep bad khang ha ka por 5 :00 baje janmiet.

Ki kyndon ha kaba iadei bad ki Nongshong Dukan ha ka Iew Shipor hajan Community Hall Mawkyrwat ki long ba ki nongshong dukan ki dei ban long kiba lah dep ai tika, ki nongshong dukan ki dei ban long ki nongkitkhlieh na ka bynta ban peit ia ka jingia jngai iwei na iwei pat kumba 6 phut (2meter) hapdeng ki nongthied bad ban kiar na ka jingialum bun briew hapoh dukan lane ha rud ha kiar dukan, ki nongshong dukan ki dei ban buh ia ka jaka sait kti lane sleh kti (hand sanitizer), ki nongshong dukan ki dei ban deng 2 tylli ki mask bad ban die tang sha kito ki nong thied kiba deng mask, ym dei ban biah pathar lane don kano kano ka jingbret pathar ia ki nuit, ki dukan ki dei ban plie man ka sngi lait noh tang ha ka por khangdam (lockdown) ba la pynbna da ka ophis ha kaba yn ym shah ban plie ia ki dukan, ka por plie iew kan long ha ka por 9:00 baje mynstep bad khang ha ka por 5 :00 baje janmiet.

Katkum katei ka hukum ki dukan ki bym pat shah ban plie ha Iew Mawkyrwat ki kynthup ia ki dukan die sha, dukan die doh bad doh kha, ki nong die madan ha lew Mawkyrwat, dukan die kwai, tympew, duma, dukan jhur, dukan soh, bad dukan ktung,

Katei ka hukum ka la shah ia ki Restaurant ba kin plie hynrei tang ban pynpoi bam sha ki ing (home delivery) ryngkat ka jingbud ryntieh ia ki kyndon ba la bthah da ka tnat ka koit ka khiah lane da ka ophis). Ka ophis ka btah ruh ba kito ki nongshong dukan lane nong die madan ha lew Mawkyrwat ki bym pat ioh odd- even number na ka ophis, la maham ba kim dei ban plie ia ki dukan jongki. Lada don kino kino ki briew kiba leh pyrshah ia kitei ki kyndon ba la bthah kin shah khang kyrdep syndon ia ki dukan jongki.