Pynjari “Containment Area” ia ka shnong Balat Baroh kawei

Mawkyrwat, Jylliew 15, 2021: Ka ophis jong ka Deputy Commissioner, South West Khasi Hills District, Mawkyrwat ka pynmih ia kane ka hukum ba katkum ki kyndon ain jong ka Epidemic Diseases Act, 1897 bad ka Meghalaya Epidemic Diseases COVID-19 Regulations, 2020 na ka bynta ka koit ka khiah jong u paid nongshong shnong bad ban tehlakam ia ka jingsaphriang jong ka khlam COVID-19, ka pynbna ia ka “shnong Balat baroh kawei” kum ka “Containment Area” khnang ban khanglad ia ka jingrung jingmih ha kitei ki jaka.

Ka ophis ka la shim ka katei ka rai katkum ka kaiphod ba la ioh na u Zonal Magistrate, Zone-I bad na u District Surveillance Officer, IDSP, ba ka la don ka jingkiew sted jong ki briew ba ioh COVID-19 positive hapoh ka shnong Balat tang hapoh 1 (shi) sngi. Te khnang ban khanglad ia ka jingiabit jong ki paid nongshong shnong ba kham tlot bor, ka long kaba donkam eh ban wat bniah ha man la kawei pa kawei ka longiing (house to house search) ia kito ki briew ba paw ki dak ki shin, ki briew ba don ki jingpang ba bunjait, bad ban hap buddien ia ki briew ba ia kynduh(contact tracing) jong kito kiba long ki high-risk bad low-risk contacts.

Ki kyndon ha kaba iadei bad katei ka hukum ki long ba yn ym shah ia ki briew ba kin leit banrung sha kitei ki jaka bad kumjuh ruh ki briew na kitei ki containment area kim dei ban mih shabar. Baroh ki briew kiba hap hapoh ka Containment area kin hap ban shongkhop hala ki iing ki sem. Yn ym shah ban pynlong kino kino ki jingkhawai ne jingialum paidbah ba kum kino kino ha kitei ki jaka. Yn ym shah ban don kino kino ki jingiakynduh la ki dei Social, Political, Religious, Economic ha kitei ki jaka. U Incident Commander, Zone-I, Bah A. Lyngdoh, BADO, Ranikor, Zonal Magistrate un long u Supervising Officer ban peit ban khmih ia ka jingbud ryntih ia kane ka hukum. Ki CCMCs ki dei ban pynthikna ba ym dei ban don mano mano kiban iaid sharum shaneng ha hapoh shnong Balat kat haduh ban da weng noh ia ka hukum Containment. Kane ka hukum kan ym kynthup ia ki nongtrei ka tnad ka koit ka khiah, kito kiba pynbiang ia ki tiar ba donkam eh, ia ki Press ba kynthup ia ka Electronic bad Print Media, Petrol Pumps bad ia ki nongsam ia ki gas LPG.  Hynrei baroh ki dei ban bud pyrkhing ia ki kyndon treikam ba la buh na ka bynta ban iada na ka jingsaphriang jong u COVID-19.

Lada don kino kino kiba pynkhein ia katei ka hukum kin shah pynshitom katkum ki kyndon ain jong ka Disaster Management Act, 2005 bad IPC. Na ka daw jong ka jingdonkam ba kyrkhieh kane ka hukum kan treikam mardor.