Ka jingpynbeit thymmai ha ka rukom shong bad pyniaid kali hapoh South West Khasi Hills District

Mawkyrwat,  Jylliew 13, 2021: Ka ophis jong ka Deputy Commissioner, South West Khasi Hills District Mawkyrwat ka pynmih ia kane ka hukum halor ka rukom pyniaid ia ki kali bad ka rukom shong hapoh ki kali hapoh South West Khasi Hills District naduh ka 14 tarik Jylliew, 2021 haduh ban da pynmih da kumwei pat. Ki kali kamai bad private ki dei ban iaid katkum ki jingpynbeit odd-even number naduh ka 14 tarik Jvlliew, 2021 haduh ban pynbna da kumwei pat. Ha ka sngi Nyngkong yn shah ban iaid tang ia ki kali badon u Number bakut ha 1,3,5,7 bad 9 (odd Number), ha ka sngi ba-ar tang ki kali badon u Number bakut ha 0,2,4,6 bad 8 (even number), ha ka sngi balang tang ki kali badon u Number bakut ha 1,3,5,7 bad 9 (odd number), ha ka sngi palei tang ki kali ba don u Number bakut ha 0,2,4,6 bad 8 (even number) bad ha ka sngi thohdieng tang ki kali badon u Number bakut ha 1,3,5,7 bad 9 (odd number). Ka rukom shong (seating capacity) ha ki kali ka long ha ki Maruti Car -1 +3, Sumo-1+ 4, Local Taxi (Regional)-3+1, Three Wheelers (Auto Rickshaw) - 2+1 bad ha ki bus-50 %.

Yn pyrkhing ia ka jingleit jingwan jong ki briew na kawei ka jylla sha kawei (Inter-State) bad kumjuh ruh sha bar ka district (Inter - District) bad khamtam ha ki containment area ba la pynbna da ka ophis Deputy Commissioner, South West Khasi Hills District, Mawkyrwat.

Kino kino ki kali kiba donkam kyrkieh, kum ka jingleit shim dawai (medical emergency) ki lah ban apply pass lyngba ka Transport Cell jong ka ophis Deputy Commisioner, Mawkyrwat lane online.