Mawkyrwat, Jylliew 11, 2021: Ka ophis jong u Block Development Officer, Mawkyrwat mynta ka sngi ka la pynlong ia ka prokram ban plie ia ka Multi-Facilitation Centre ha ka Iew shipor jong ki Nongrep (Temporary Farmers Market) kaba don hajan Mawkyrwat Community Hall ha kaba ka kong Caramai Kharkongor, IAS, Deputy Commissioner, South West Khasi Hills District, Mawkyrwat ka la long ka kongsan ha ka jingiadon ryngkat jong u Bah F. Basan, BDO, Mawkyrwat C&RD Block, u bah K. Thabah, ADC, Mawkyrwat, bah M. Mawroh, EE, PWD (Rds) Mawkyrwat, kiwei ki ophisar Sorkar, ki seng samla shnong, ki nongshongiew bad ki nongwan iew.
Haba kren
kum ka kongsan ka kong Caramai ka la ong ba katei ka jaka ai jingiarap (Multi-Facilitation
Centre) kan sa ai jingmyntoi shibun ia ki nongshongiew, ki nongwaniew,
ki Self Help Groups (SHGs) bad ia ki paidbah ba kin ioh jingtip ba thikna halor
u COVID-19, kumno ban tehlakam ia ka jingpur sted utei u khniang jingpang bad
ban tip thikna ia ka jingmyntoi ba ki paidbah ki lah ban ioh da kaba ai ia ka
tika iada COVID-19. Ka la bynrap ruh ba katei ka jaka ka long kum ka jingplie
lad plie lynti ia ki nongrep, ki SHGs bad ia ki nongshong iew ba kin lah ban
die ia ki mar jongki, ban ym sepei ki jhur ne kiwei ki mar, ban ym duh kamai
kajih bad ba kin ym jynjar palat ha kum kane ka por jong ka khlam. Ka la ong
ruh ba lyngba katei ka iew shipor ki briew ki lah ban iadie iathied bad ban
kamai ha ryngkat ka jingbud ryntih ia ki kyndon ba la bthah da ka tnad ka koit
ka khiah kum ka jingpyniajngai parabriew, ka jingsait ia ki kti shuwa ban rung
bad ynda mih na iew bad ban deng ia ki jingda khmut bad shyntur namar katei ka
jaka ka long kaba kylluid bad kaba biang bha. Ka la pynkut da kaba kyntu ia
baroh ba ki dei ban ai ia ka tika iada COVID-19 bad ba kin ym tieng ban leit
leh test namar u khniang jingpang COVID-19 u dei u khniang jingpang u ba ktah
ym tang ialade shimet hynrei u saphriang sha kiwei, te ha kane ka
jingwanlyngshop ba arsien ki briew ki dei ban don ka jingkitkhlieh ba kim dei
ki nongrah ia utei u khniang jingpang sha kiwei.
U Dr. W. N
Narry, District Surveillance Officer, Mawkyrwat u la batai halor ka jingdonkam
ka jingdon katei ka jaka (Multi-Facilitation Centre) na ka bynta ka jingiarap
ba pura ia u paidbah. U la iathuh ba la sdang ia ka “Iew shipor ki Nongrep”
(Temporary Farmers Market) namar ka jingkhapngiah ka iew Mawkyrwat bad ban dup
lah ban tehlakam ia ka jingpursted u khniang jingpang COVID-19 khamtam ban dup
lah ban pyniajngai parabriew. U la ong ruh ba bun ki briew hapoh ka District kim
pat tip bha shaphang ka jingpang COVID-19 bad shaphang ka jing myntoi jong ka
jingai tika iada na utei u khniang jingpang te katei ka jaka kan sa ai jingtip
bapura ia ki. U la bynrap ruh ba ki don ki khubor hamsaia ba lah ban don side
effect ne iap noh hadien 7 snem hadien ba la ai tika hynrei u la ong ba kam dei
kumta bad ki lah ban peit da la ki jongki kmat ia ki briew ba la dep ai tika
bad u la iathuh ruh ba bun na ki ba iap pang COVID-19 ki dei kito ki bym pat ai
tika. U la ong ruh ba namar ka jingshem
jingeh jong ki paidbah nongshongshnong ban thep kyrteng online ka sorkar ka la
pynsuk ba ki briew ba 18 snem haduh 44 snem ka rta ba ki lah ban shu thep
kyrteng ha ki jaka ai injek hi (spot registration). U la kyntu ia ki khun samla
ba kin ai tika iada COVID-19 noh kloi khnang ba kin dup lah ban pyshai ia ki
kmie ki kpa ban shim ia katei ka kabu ban ioh tika ban dup iada ialade, iakiwei,
ia ka district bad ia ka jylla na utei u khniang jingpang COVID-19.
Ha katei
ka prokram ba la pyniaid da u bah F.Basan, BDO, Mawkyrwat C&RD Block la
ailad ban kren ruh ia u Bah D. Marwein ba dei na ka kynhun Seng Samla Shnong,
Mawkyrwat ba pyniaid ia katei ka Iew shipor ki Nongrep.
No comments:
Post a Comment