Pynjari CURFEW MIET naduh ka 14-17 bad KHANGDAM naduh ka 17-21 tarik Jylliew, 2021 ha South West Khasi Hills District

Mawkyrwat, Jylliew 13, 2021: Kum ban pynthymmai ia ka hukum ba la pynmih ha ka 5 tarik Jylliew, 2021 bad ban bud ryntih ia ka hukum ba la pynmih da ka Sorkar Jylla ha ka 28 tarik Jymmang, 2021 ban pyntreikam ia ki kyndon ban tehlakam hapoh ka Jylla Meghalaya, namar ka jingpur sted jong une u jait khniang jingpang, ka long kaba donkam eh ban shim kyrkhieh ki lad jingiada ban tehlakam ia ka jingsaphriang jong u khniang COVID-19, ban lait na ka jingeh jingjynjar ha ka liang ka tnad ka koit ka khiah  bad ban lait na ka jingduh ia ki mynsiem ba kordor.

Te namarkatta ka kong C. Kharkongor, IAS, District Magistrate, South West Khasi Hills District, Mawkyrwat katkum ka kyndon ain 144 Cr.P.C ryngkat ka Regulation 3 jong ka Meghalaya Epidemic Diseases, COVID-19 Regulations, 2020 ka pynjari CURFEW MIET (NIGHT CURFEW) hapoh South West Khasi Hills District naduh ka 14 Jylliew, 2021 (sngi nyngkong) haduh ka 17 tarik Jylliew, 2021 (sngi  palei) naduh ka por10:00 janmiet haduh ka por 5:00 mynstep bad la pynjari KHANGDAM (Lockdown) naduh ka por 10 baje janmiet jong ka 17 tarik Jylliew, 2021 (sngi palei) haduh ka por 5.00 baje mynstep jong ka 21 tarik Jylliew, 2021 (sngi nyngkong).

Ka ophis ka la shim ia katei ka rai da ka jingthmu ban dup lah ban tehlakam ia u khniang jingpang lyngba ka jingwatbniah (tracing) bad ka jingshong pynkyrpang jong kito briew ba ioh positive ba kynthup ia kito ba wanphai na bar ka jylla (returness), ban dup lah ban pyntreikam ia baroh ki lad ki lynti lyngba ka jingkyrshan jong ki shnong na ka bynta ban ai ia u tika iada u ba long tang ka lad ka lynti ban iada ia u paidbah, ban ai jingkyrshan ha baroh ki liang kynthup ia ka jingsngewshngain ban sumar ha ki iing ki sem lada ka jingpang kam pat da jur bad kumno ban ai jingtip ba pura shaphang ki lad jingiada ia katei ka  jingpang katkum ka jingbatai ka tnad ka koit ka khiah.

Katkum katei ka hukum lah shah ban plie ia baroh ki ophis sorkar, la khang ia baroh ki jingialang paidbah kum ki jingiaseng, ki dorbar shnong, ki jingialang, ki training bad kiwei kiwei de. La khang ia ki jingiathoh shongkurim tad haduh ban da pynbna da kumwei pat. Lada don kano kano ka jingjia kum ka jingiap briew ki nongshim bynta ki dei ban long tang 10 ngut ha ryngkat ka jingioh jingbit shuwa napoh ka ophis jong I Deputy Commissioner bad yn ym shah ban don kino kino ki jingialum paidbah hadien ka jingleit on tep. La khang ia baroh ki jaka jngohkai pyrthei (tourist spots) hapoh ka district bad ia ki nongjngohkai pyrthei (tourist) ba nabar ka jylla ban wan sha ka district. La khang ia ki Schools bad Kolej, hynrei la shah ban hikai lyngba ki Online classes. Yn shah ia ki kam rep kam riang, ki Rural Schemes kum ka MGNERGA hynrei tang ha kito ki shnong ki bym don COVID-19 positive case bad katkum ka jingpynbeit jong ki BDO. Ia ki iew hapoh ka District yn shah ban plie katkum ki kyndon ba la pynbeit, ba yn shah ban plie ia ki dukan ba die ia ki tiar ba donkam eh ha ki shnong hynrei ki dei ban khang ha ka por 5.00 baje janmiet. La mana tyngeh ba ym dei ban pynlong ia ki Sngi Iew. Ia ka Iew Mawkyrwat bad ia ka Iew shipor ki Nongrep (Temporary Farmers Market) la shah ban plie naduh ka Sngi Nyngkong haduh ka Sngi Palei naduh ka por 9.00 baje mynstep haduh ka por 5.00 baje janmiet hynrei la shah ban plie tang ia ki dukan katkum ka jingpynbeit ban plie. La khang ia ki briew bad ki kali ba kin iaid na kawei district sha kawei pat (inter-district) bad yn shah tang ia ki kali kiba don ia ki pass ba kin iaid inter-district. Hynrei la shah ban iaid ia ki kali hapoh ka district katkum ka jingpynbeit odd-even. La shah ban wan ialam ia ki nongtrei ba tbit (skilled manpower) na kiwei ki jaka na ka bynta ki Government construction Projects hynrei tang hadien ba la ioh jingbit na ka ophis jong I Deputy Commissioner.

Katei ka hukum kan ym kynthup ia ki kali sorkar, Police, Security bad Armed Forces, Fire bad Emergency Services, Telecommunication Services, PHE (Water Supply), MePDCL, Banks & Post office, Information and Public Relations Department, ki jingshakri ka tnad ka koit ka khiah ba kynthup ia ki jingdonkam ba kyrkhieh haka koit ka khiah, medical teams bad ki nongtrei ba ai tika COVID-19, Fair Price Shops bad LPG distributor, Print & Electronic Media, Public Works Department (PWD),  ki ophisar bad ki nongtrei jong ka Corona Care Centre,  ka jingiaid jong ki kali ba kit ia ki tiar ba donkam eh, ki kali ba supply dawai bad pharmaceuticals, ki kam bad ki prokram pynrung kyrteng Aadhaar, Petrol Pumps, MGNREGA bad ki kam rep kam riang katkum ka jingpynbeit ki BDO, ki kam bad jingshakri ba donkam jong ka Veterinary ba kynthup ia ka jingkit jingbam na ka bynta ki jingri jong ki nongrep, bad ia ka NHIDCL (National Highways & Infrastructure Development Corporation) Ltd. Hynrei baroh ki kam bad ki lad jingshakri ki dei ban bud pyrkhing ia ki kyndon treikam (SOPs) kum ka jingdeng ia ki jingda khmut bad shyntur ba ar-syrtap, ka jingpyniajngai parabriew kumba 6 phut ne 2 meter, ka jingsait ia ki kti na ka por sha ka por, ka jingpynduna ia ki field staff katba lah ei, bad ia kiwei ki jingbtah jong ka Sorkar lyngba ka tnad Health bad Family Welfare KHLEM DA PYNKHEIN.

La shah ban iaid ia ki kali ba kit ia ki tiar ba donkam eh, Security Forces, Medical Equipment’s hynrei ki dribar bad ki nongbud jong ki kali kin hap ban leh medical screening katkum ki kyndon ba la buh.

Ki Dorbar shnong hapoh ka jingyniaid jong ki Incident Commander kin peit ia ka jingpynbiang ia ki tiar ba donkam eh ha ki shnong ki thaw lyngba ki dukan ha ki dong bad kyntoit. Hynrei ha ki por ba don CURFEW MIET bad JINGKHANGDAM (Lockdown) ki nongshong shnong ki dei ban shongkhop ha la ki iing ki sem bad ki shnong ki thaw. Na ka daw jong ka jingdonkam ba kyrkhieh kane ka hukum kan treikam mardor.