Hiar jurip u Minister ha SWKHD halor ka jinglong ba la kreh ka District ban tehlakam bad iakhun pyrshah ia ka khlam COVID-19

Mawkyrwat, Jymmang 07, 2021; U Ma Sniawbhalang Dhar, Hon'ble Minster jong ka Transport Department, Government of Meghalaya mynta ka sngi u la hiar jurip ia ka South West Khasi Hills District ban peit ia ka jinglong ba la khreh jong ka District ha kaban tehlakam bad iakhun pyrshah ia u kniang jingpang COVID-19. Ha katei k prokram ba la pynlong hapoh Multi-Purpose Hall DC Campus la iadon lang ruh ka DC, SP, ADCs, SDO (C) Ranikor, BDO jong ka Mawkyrwat bad Ranikor C& RD block, Bah Renikton Lyngdoh Tongkhar MLA Mawkyrwat Constituency, Bah Carnes Sohshang, MDC Mawkyrwat Constituency, DM&HO Mawkyrwat, District Surveillance Officer, ki Zonal Magistrates, ki nongtrei ka tnad ka  koit ka khiah, ki Nongialam niam, ki Nongialam Shnong, ki ophisar sorkar bad kiwei ki riewrangbah. 

         Haba kren ha katei ka sngi u Ma Sniawbhalang Dhar u la ong ba ka kham suk ban iakhun pyrshah ia u nongshun ba ngi iohi ban ia kaba ialeh pyrshah ia u nongshun ba ngim iohi kum ka jingialeh ba mynta pyrshah ia u khniang COVID-19. U la pynpaw ka jingsngewkmen ban iohi ba ka District ka la long kaba la kreh ban tehlakam bad iakhukhun pyrshah ia ka khlam hapoh ka District. U la pynpaw ruh ba ka sorkar ka shikmkhia bha bha shaphang ka entry bad exit point ha Umling ha ka juh ka por ka la phah ia ki minister ha jan man ka district ban leit jurip ia ka jinglong ba la khreh khnang ba lada jia ba ka jur ka jingpur sted u khniang jingpang COVID-19 kin long kiba la kreh.  U la bynrap ruh ba ki shnong ki thaw ki don ka bynta ba khraw eh ban tehlakam ia ka jingpur sted u tei u khniang jingpang da kaba ong ruh ba ki Nongialam shnong ki dei ban long ki nongpeit nongkhmih ha kino kino ki kam iathoh ne jingiap briew khnang ba ki briew kin bud ryntih ia ki jingbthah ka sorkar ba dei ban don tang 20 ngut ki nongshim bynta. U la ong ba ka long kaba eh shisha ban iakhun ia ka khlam namar ka long ka jingiakhun pyrshah ba ktah ia ka ioh ka kot bad ka koit ka khiah. U la ong ruh ba ka sorkar kam shim ka rai kyllum na secretariat ban peit ia ki district hynrei ka la pynkup bor ia ki Deputy Commissioner ba kin peit katkum ka jingdonkam ka District. U la pynpaw ruh ia ka jingsngewkhia halor ka jingsaphriang ki khubor hamsaia shaphang ka tika iada COVID-19 bad halor ka jingpeit mationg ia ki iing ki sem bad ia kito kiba ioh COVID-19 positive case bad u da kyntu ia ki bor pyniaid District ba khin shimkhia ban pynshitom ia ki briew ba leh kum kitei ki kam. U la kyntu jur ia ki paid nongshong shnong ba kin shimkhia bad leit ai ia ka tika iada khnang ban dup lah ban iada na ka jingpur sted u tei u khniang jingpang. U la khot ia ka jingiatreilang jong ki Balang bad Nongialam shnong ban pynsngewthuh ia u paidbah bad ban khring ia ka mynsiem jongki khnang ba kin leit ai tika iada. U la pynkut da kaba ong ba dei tang ka jingiatreilang ba pynpaw da ki kam ba  ngin sa lah ban iakhun pyrshah ia kane ka thma pyrshah ia ka khlam COVID-19.

          U MLA ka Mawkyrwat Constituency u Bah Renikton Lyngdoh Tongkhar, u ba long ruh u  Minister PHE jong ka Sorkar Meghalaya u la ong ba dei tang da ka jingai tika iada COVID-19 kaba long ka lynti kaba lah ban iakhun pyrshah ia kane ka thma pyrshah ka khlam COVID-19. U la bynrap ruh ba ka jingjop ka dei ka jingrai jongngi iwei pa iwei ban ialeh pyrshah ia kane ka khlam bad lada ngi mon ban ialeh pyrshah marwei marwei ngi dei ban shim ka rai ba ngim ym pynsaphriang ia u ne u khniang jingpang sha kiwei bad ba ngim dei ban ioh na kiwei ruh. U la pynpaw ba kawei na ki jingeh kum ki nongialam paidbah ka long ban kiar na ka jingleh ieid ki parabriew namar ki paidbah kiba pyni ia ka jingieid ba shisha jong ki hynrei u la ong ba ka kham bha ban kiar ban iakaba siewkylliang da u khniang jingpang ia ki. U la kyntu ia ki paidbah ka District ba kin ym tieng ban ai tika iada COVID-19 namar ba kam don kaei kaei kaban ktah iangi. U la bynrap ruh haba peit ia ki khana samari naduh hyndai hynthai haba don ka khlam ki don beit ki tika iaka kumjuh ruh ka jingpyniajngai parabriew. U la ong ruh tangba ngi dei na ka juh ka shnong ngim dei ban khein shlur palat ba ‘para mangi ym ju lei lei’ namar ngim tip ba ngi lah ban long pynban ki nongkit ia u tei u khniang jingpang.

     U Bah Carnes Sohshang, MDC Mawkyrwat Constituency u la ong ba ka jingwan jurip jong ki minister kan sa iarap ia ka District ban nang pynbha shuh shuh ia ka rukom pynkhreh ban tehlakam ia ka khlam COVID-19. U la ong ba ngi baroh ngi wan ha ka jingialang da ka jingsngewkhia namar ka jingeh ba wanrap biang kane ka khlam bad ngi mat biang ia ka jingjynjar. U la pynpaw ba kum u nongmih khmat u paidbah u la shem ba ki briew ki la mat shibun ki jingeh bad ki shnong ruh ki la jynjar bha namar namar ka jingwan ka khlam. U la pynpaw ruh ba ka long kaba donkam ban sdang biang ia ka check point, ban ym don kyrkhieh ia ka jingkhang khyrdep hapoh ka district namar ba ki ba bun ki nongpang ki dei ki ba wanphai na shabar, ka jingdonkam ban dang pynkhlain bad pynbun ki hospital bad ki nongtrei ka tnad ka koit ka khiah hapoh ka district bad u la kyntu ruh ba baroh ki dei ban ai ia katika iada COVID-19. U la pynkut da kaba ong ba u long u ba la kloi ban leit sha kino kino ki jaka ban leit pynsngewthuh ne ai jinghikai ia ki paidbah halor ki ka tika iada ne kumno ban tehlakam ia ka khlam COVID-19 lada donkam.

 

Ka kong J.U Kharpuri, ADC ka la ai jingtip shaphang ka jingpynkhreh ka District ha kaba iadei bad ka khlam COVID-19. Ka la iathuh ba ia ka District la phiah ha ki Zones bad ki don 

16 tylli ki zones ha ka area Mawkyrwat bad 7 tylli ki zones ha ka area Ranikor ha kaba  la peit ia kitei ki zones da ki Zonal Magistrates bad Sectors officers ha ryngkat ka jingiatreilang bad ki nongialam shnong. Ka la iathuh ruh ba la pynkhie im biang ia ki 166 tylli ki CCMCs and BCMC ha ka thain Mawkyrwat bad ki 170 tylli ki CCMCs and BCMCs ha ka thain Ranikor. Ka la bynrap ba hapoh ka District ki institutional quarantine centre ki don kumba 7 tylli ha ka thain Mawkyrwat bad 2 tylli ha Ranikor, ki Community quarantine centre hapoh ka thain Mawkyrwat ki don 166 tylli bad ha ka thain Ranikor ki don kumba 170 tylli, ki Market Covid Management Committee ki don 5 tylli ha ka thain Mawkyrwat bad 3 tylli ha ka thain Ranikor. Ka la iathuh ruh ba ka District ka la pyniaid ia ka jingai tika haduh ki shnong ki thaw.

         U Dr. W.N Narry, District Surveilance Officer, Mawkyrwat u la kren halor ka rukom pynkhreh ka tnad ka koit ka khiah bad ki tiar ki tiar ki tar ba donkam ba ka district ka don haduh mynta ban tehlakam ia ka khlam COVID-19. U la iathuh ba ka jingai tika iada ka dang iaid shakhmat hynrei ka jingwan ki briew ban shim ia ka tika ka dang long tang 23% bad ka dang duna bha hapoh ka District.

      Ka Kong Caramai Kharkongor, IAS, Deputy Commissioner, South West Khasi Hills District Mawkyrwat kaba la pyniaid ia katei ka jingialang ka la ai ruh ia ki ktien lamphrang halor ka jingpang COVID-19. U Bah W. Biam MCS, ADC Mawkyrwat u la ai ia ki kyntien pdiang sngewbha, U Bah L. K Diengdoh MCS, u la long u nongpyniaid ia ka jingiathir jingmut bad ki paidbah bad u Bah K. Thabah MCS, u la ai ia ki kyntien ai khublei ha katei ka prokram.