Pynlong Swachhata Rath Yatra, 2021 ka SBM (G) Mawkyrwat

Mawkyrwat, 'Nailur 30, 2021: Ka ophis District Swatch Bharat Mission (G), South West Khasi Hills District (SWKHD), Mawkyrwat mynta ka sngi ka la pynlong ia ka prokram ai jinghikai shaphang ka “Swachhata Rath Yatra, 2021” kum shibynta jong ka jingrakhe ia ka Swachhata Hi Seva kaba la pynlong hapoh PHE Hall, Mawkyrwat.

            Ha katei ka prokram la don kumba7 tylli ki skul napoh ka District kiba la iashimbynta ha ka jingiakop thoh Slogan (slogan writing), rwai jingrwai tynrai (folk song) bad jingiakop dro dur (drawing & painting competition).

            Haba kren ha katei ka sngi u Bah P. L Thongni, District Coordinator, SBM (G), Mawkyrwat u la iathuh ba ka jingrakhe ia ka Swachhata Rath Yatra, 2021 ka long shibynta jong ka jingrakhe ia ka Swachhata Hi Seva, 2021 bad ka Azadi ka Amrit Mahotsav kaba rakhe ha baroh kawei ka ri da ka sorkar ban rakhe ia ka jingdap 75 snem ka Jinglaitluid ka ri India.  U la batai ruh ba ka thong jong ka Swachhata Rath Yatra ka long ban pynsaphriang kylleng sha ki paidbah ia ka khubor ban tehlakam ia ka jingeit pathar, kumno ban lum ia ki niut ki ba pyut bad ki bym pyut kum ki plastic, bad kumjuh ruh kumno ban lehkhuid. U la ong ruh ba ka jingrakhe ia ka “Swachhta Hi Seva” ka long ban pynurlong ia ka jingthrang u Mahatma Gandhi ban pynlong ia ka ri India ka ri kaba khuid ba suba da kaba pynlong ia u paidbah ba kin iashimbynta bad kitkhlieh. U la bynrap ruh ba lyngba katei ka skhim ka sorkar ka thmu ban ai jingiarap bad kyrshan ia u duk u suk lane ki ba duna ka kamai kajih khnang ba kin lah ban lehkhuid bad sumar ia ka mei mariang.

            U Bah B. Lyngdoh Marshilong, Asst. Teacher, Maharam Govt. Higher Secondary School, Mawkyrwat u la kren halor ka jingdonkam ban lehkhuid ialade, ia ka iing ka sem, ka shnong ka thaw bad ka imlang sahlang. U la ong ba lyngba ka skhim SBM ka sorkar ka la lah ban rad diengkhong ia shibun ki jingpynjaboh ia ka mei mariang kum ka jing eit pathar, ka jingbret ia ki plastic, ka jingpynjulor ia ki lum ki wah, bad ka jingleh jakhlia ha ki shnong ki thaw. U la ong ruh ba ngi dei ban lehkhuid ia ki painkhana namar ki dei ki jaka ba kongsan bha ha ka jingim jongngi. U la ong ruh ba ka jinglehkhuid shabar ba pynpaw ia ka jingkhuid jongngi ha ka jingmut jingpyrkhat bad ka jingim. U la bynrap ba ka jingkhuid ha ka jingmut jingpyrkhat ka pynlong ia ngi ba ngin ioh ka met ba khiah krat bha, kaba pyllait iangi na ki kam sniew, kaba iarap iangi ba ngin burom markylliang ha ka imlang sahlang bad ka pyniajan bha iangi bad ka mei mariang. U la kyntu ia ki khynnah skul ba kin long borabor ki briew ba lehkhuid ha ka jingim jongki.