Rakhe ia ka Swachh Bharat Diwas ha SWKHD

Mawkyrwat, Risaw 02, 2021: Ha ka jingiasnoh kti lang ia ka jingrakhe ia ka lyngkhuh sngi kha jong u kpa ka Ri India u Mahatma Gandhi, ka ophis Swachh Bharat Mission (G), South West Khasi Hills District (SWKHD), Mawkyrwat ha ka jingiatreilang bad ka Jal Jeevan Mission mynta ka sngi ki la pynlong ia ka jingrakhe ia ka Swachh Bharat Diwas kaba la pynlong hapoh PHE hall, Mawkyrwat.

            Ha katei ka sngi la don ki prokram kyrpang i samla Baiamon Marbaniang na ka Nativity Higher Secondary School bad na ka kong Lapdiang Nongsiej. Ka la don ruh ka jingsam ia ki khusnam sha ki nongjop ha kaba ka Nativity HS School, Mawkyrwat ka la iohrah ia khusnam lahduh ha ka jingiakop rwai tynrai, ka Little Star HSS, Mawkyrwat ka la ioh ba-ar bad ka Presbyterian HSS, Mawlangwir ka la poi balai. Ha ka jingiakop thoh Slogan ka Mawkyrwat Presbyterian SS, Laitlawsang ka la poi sha ka kyrdan ba nyngkong, ka Modern Academy HSS, Rangmaw ka la ioh ba-ar bad ka Nativity HS School, Mawkyrwat ka la ioh ba-lai. Ha ka jingiakop Drawing & Painting ka Maharam Government HSS, Mawkyrwat ka la ioh ia ka nam lahduh, ka Nonglang SS, Nonglang ka la ioh ia ka kyrdan ba ar bad ka Presbyterian HSS, Mawlangwir ka la ioh ia ka kyrdan ba lai. 

            U Bah S. Snaitang, EE, PHE, bad Member Secretary DSBM, Mawkyrwat u la batai ba baroh ki longiing ki dei ban ioh ia ka skhim um lyngba ka Jal Jeevan Mission. U la bynrap ruh ba katkum ka JJM dei ban sdang ai um nyngkong ia ki longiing ki ba duk tam bad khatduh ia kito ba kham bit kham biang. U la ong ruh ba katba dang mih ki sngi ka um ha ki wah ka nang duna bad ngi dei ban wat ia ka daw. U la ban ruh ka jingjakhlia ki wah ki dei na ka daw jongngi hi iwei pa iwei bad ngi dei ban kynnoh shuwa ialade ym ia kiwei. U la kyntu ia ki paidbah ba kin ym khang ban buh top um ne pyndonkam ia ka um namar ka dei ka hok jongngi iwei pa iwei ban ioh ia ka jingim lyngba ka um. U la kren ruh shaphang ka Swacch Bharat Mission.

            Haba kren ha katei ka sngi u Bah R Nongdhar, SDO, PHE, Mawkyrwat, u la ong ba ka sorkar ka la iohi jngai bha bad ka la sdang ia ka Swachh Bharat Mission (SBM) ban wanrah ia ka khuid ka suba bad hadien katta la  sdang ia ka Jal Jeevan Mission (JJM) hadien ba la iohi ba ka shitom ban lehkhuid lada ym don ka um.  U la ong ba lyngba ka SBM la ioh ia ki skhim painkhana bad lyngba ka JJM ka sorkar ka iarap ban lehkhuid ia ki painkhana. U la iathuh ruh ba ka sorkar ka sorkar ka la jied kumba 5 ngut ki riew kynthei ba kin peit hato ka um kaba ki ioh ha ki iing ki sem ka long ka ba khuid bad kaba bit ne em ban bam ban dih u la bynrap ba la ai ia ki testing kit sha ki ba kin peit ia ka jinglong jingman ka umbam umdih ba poi ha ki iing ki sem hapoh ki shnong ki thaw jongki. U la ong ruh ba ngi dei ban pynneh pynsah ia ki tyllong um da kaba kiar ban pom ia ki dieng ki siej ioh ba ngi poi sha u pud jong ka jingkyrduh um. U la ong ruh ba mynta ka sorkar ynda ka la dep pynshna kum ia ki top um, ki pipe um bad kiwei da ka sorkar kan aiti noh sha ka shnong khnang ba ki nongshong shnong kin don ka jingkhitkhlieh bad ba kin ym ong shuh ba kadei ka mar sorkar. U la pynkut da kaba ong ba ngin long kiba niewkor ia ka um ioh ka poi ka por ba ka um ka kham rem ban ia ka ksiar.

            U JE, Ranikor Sub-Division, u Bah T. Wanniang, u la ong ba ka thong jong ka JJM ka long ban pynpoi um ha man la ki thliew iing. U la batai ruh shaphang ka jingeh ban pyntreikam ia ka skhim khamtam lei lei ha kaba iadei bad ka jingshna ia ka top um bad ka jing pyniaid ia ki pipe um. U la ong ruh ba ka shnong ka don ka bor ba khlain eh ban pyntreikam ia ki skhim te namarkatta, u la kyntu ia ki nongialam shnong ba kin iatreilang bad ka department ha ka ban pynpoi um ha man la ki thliew iing.

U bah S.R Wahlang, DPM, JJM, Mawkyrwat u la kren shaphang kumno ban pyntreikam ia ka skhim hapoh ki shnong ki thaw bad ia ka kamram jong ka shnong lyngba ka Village Water and Sanitation Committee (VWSC). U la kren ruh shaphang ka jingdonkam ban thung ia ki dieng hajan ki tyllong um khnang ba ka um kan nang roi. U la iathuh ba ruh ba ha ka tain Mawkyrwat ki don kumba 72 tylli ki shnong bym pat ju ioh um mynno mynno ruh bad lyngba ka Impementation and Super Agency ka sorkar ka pynshai bad pynsngewthuh shaphang ka JJM bad iarap ia ki ba kin ioh ia ka umbam um dih ha ki iing ki sem jongki. U la batai ruh shaphang ka phang pdeng jong ka JJM kaba ong “Ym ieh iano iano”.

            Ia katei ka programme la pyniaid da u bah P.L Thongni, District Coordinator, DSBM, la pdiang sngewbha da ka Bah B. Lyngkhoi, Accountant, DSBM bad la kren ai khublei da ka kong L. Lyngdoh, HRD Coordinator.