Rakhe ia ka sngi kyrpang ki riew tymmen (International Day of older person) ha South West Khasi Hills District

Mawkyrwat, Risaw 01, 2021: Ka ophis jong ka District Social Welfare Officer (DSWO) ha ka jingiatreilang bad ka ophis jongka District Legal Service Authority (DLSA), South West Khasi Hills District (SWKHD), Mawkyrwat mynta ka sngi ki la pynlong ia ka jingrakhe ia ka International Day for Older Person  (Ka jingrakhe ia ka sngi burom jong ki riewtymmen ha satlak ka pyrthei) halor ka phang “Digital Equity for all ages” (ka jinglong ryngkat ki riewtymmen ha kaban pyndonkam ia ki kor ki bor ka juk mynta) kaba la pynlong hapoh Community hall VEC, Jakrem Mission.      

            U Dr. A. Lyngdoh,  Medical & Health Officer, Mawkyrwat CHC u la ong ba ka jingnoh syniang jong ki riewtymmen ka long kaba khraw bha bad kaei kaba ngi long mynta ka dei na ka daw jong ka jingtrei shitom ka jongki. U la ong ruh ba lada ym don ki meiieid paieid ka imlang sahlang ka long kaba dkhoh. U la ong ba ka pyrthei ka iaid sted bha bad busien ngi kum klet noh ia ka jingnohsynniang bad ka jignkyrkhu ba ki la wanrah ha ka imlang sahlang jongngi. Ka sorkar ka kwah ba ki riewtymmen kin don ka jinglong iaryngkat ha ka ban pyndonkam ia ki kor ki bor ka juk ba mynta. U la bynrap ruh ba kane ka hok jong ka jinglongryngkat ha kaban pyndonkam ia ki kor ki bor kan iarap ia ki riewtymmen ha ki kam ki jam, ka koit ka khiah, ka jingioh ia ki jingtip, ka jingpynsngewbha ialade bad ban iarap iaki ba kin im ka jingim ba donjingmut. Ka jingpyndonkam ia ki kor ki bor ka juk mynta ka kynthup ia ka computer, internet, mobile bad kiwei kiwei kiba lah ban iarap ia ki ba kin ioh ia ki jingtip. U la iathuh ruh ba ka tnad ka koit ka khiah ka ai lad shuwa ia ki riewtymmen haba ki leit shim dawai ne donkam ia ki doctor bad katba nang mih ki sngi lyngba ki doctor, ki nurse bad ki nongtrei ba la ioh ki jinghikai ba pura ka sorkar ka kwah ban ai ka jingshakri ba bha tam ia ki riewtymmen.

            Haba kren ha katei ka sngi kong N. Hahshah, Panel Lawyer, DLSA, SWKHD, Mawkyrwat ka la kren halor ki ain ba iadei bad ki riewtymmen. Ka la ong ba ka DLSA ka ai jingiarap lyngba ka ain bad ki kanoon ba ym donkam ban da siew pisa na ka bynta ki riew tymmen. Ka la bynrap ruh ba katkum ka riti synshar ka ri India (Constitution) ha ka khyrnit ba 41 ki riewtymmen ki don la ka jong ka hok ba kin ioh ia ka jingpule, ba kin bylla bad ka jingiarap paidbah. Ka la ong ba ki kmie ki kpa ki lenlade bad ai ia kaei kaba bha tam na ka mynta ki khun ki kti bad bunsien ha ka juk kaba mynta ki khun ki kti ki ki klet noh ia ka jinglehbha jong ki bad ki lehbein iala ki kmie ki kpa te namarkatta, ka ain kam shah iaki ba kin leh kumta namar ka dei ka hok jong ki riewtymmen ba kin ioh ia ka baibam bad ka jingsumar namar ka ktah ia ka imlang sahlang. Ka la bynrap ruh ba ka ain kam shah ba ki riewtymmen ba kin shah iuhroit bad lada jia ba ki shah lehbein ki riewtymmen ki don ka hok ban shim noh ia ka nongkynti ba ki la sam ha ki. Ka la iathuh ruh ba lada ki riewtymmen ki donkam ha kaba iadei bad ki kot ki sla ne ki jingiarap ba iadei bad ka ain ki lah ban iakynduh ia ki para legal volunteers ba don ha ki shnong ki thaw jongki.

            Ka kong P. Marwein, Programme Manager, Meghalaya Health Insurance Scheme (MHIS) ka la batai sani bha halor ka MHIS. Ka la iathuh baka  sorkar ka la pynkiew ia ka jingiarap na ka T.30000 (lai phew hajar) sha ka T. 5,00,000 (san lak tyngka).  Ka la ong ruh ba ka jingthmu ka sorkar ka long ban pynsting ia ki paid nongshong shnong haba ban ka pang ka shitom bad ka jingjynjar haba ki thiah ha ki hospital. Ka la bynrap ruh ba ka MHIS ka kynthup lang ia baroh ym kumba long mynshuwa ba kynthup tang ia ki BPL hynrei lait noh tang ia ki nongtrei sorkar. Ka la batai ba ban ioh ia ka jingiarap lyngba ka skhim dei ban pynrung kyrteng bad ban ioh kawei ka card. Ka jingmyntoi ban ioh na ka skhim ka long ym tang ia ki ba thiah hospital hynrei wat ia kiba leit sumar lyngba ki OPD bad ka iarap ruh na ka bynta ki jingleh test bapher bapher. Ka la kyntu ia ki paidbah ba kin rah borabor ia ka MHIS card khnang ba kin lait na ka jingban khiah ban siew ia ki bai dawai. Ka la batai ruh shaphang ki kot ba donkam ban rah ha ka por ba ki leit ban pynrung kyrteng na ka bynta ka MHIS. Ka ong ruh ba kiba don ration card ki dei ban rah ia ka card jongki khnang ba kin ioh jingiarap khambun. Ka la pyntip ruh ba lada ki briew ki kwah ban ioh jingtip ba kham bniah ki lah ban peit lyngba ka website www.mhis.org.in lane www.pmjay.gov.in bad lada ki paidbah kim sngewhun bad kim ioh jingiarap ki lah ban ujor lyngba u number 0364-2507477 lane phone sha u Toll Free No-1800 102 4762.

            Ha katei ka prokram ba la pyniaid da ka kong H. Sahkhar, CDPO, I/C District Social Welfare Office, SWKHD, u myntri ka Shnong Jakrem bah P. Wahlang u la pdiang sngewbha ia baroh ki nongpyniaid bad ki nongshim bynta, ka la don ruh ka jingai sngewbha ia ki riewtymmen ba la iashim bynta ha katei ka sngi burom bad ka kong B. Wanniang, Supervisor, DSWO, Mawkyrwat ka la ai ia ki kyntien ai khublei.