Hiar jurip u PHE Minister ia ki skhim Jal Jeevan Mission ha South West Khasi Hills District

 Mawkyrwat, Risaw 02, 2021: U PHE Minister jong ka Sorkar Jylla, U Bah Renikton Lyngdoh Tongkhar u ba long ruh u MLA ka Mawkyrwat Constituency u la hiar ban jurip ia ki shnong ba la dep 100% ka jingai umbam umdih ha ki iing ki sem (Functional Household Water Tab Connection) na ka skhim Jal Jeevan Mission ha ka thain Mawkyrwat kum shibynta jong ka jingrakhe ia ka Gram-Sabha and Samvad bad ki Village Water and Sanitation Committee (VWSCs) jong ki shnong.

            Haba kren ha ka jingleit jngoh ia kawei na ki shnong napdeng ki 56 tylli ki shnong ka District ba la ioh 100% ka jingai umbam umdih kata ha Pynden Mawthawiang u bah Renikton u la pynpaw ia ka jingsngewkmen ba ka um lyngba ka skhim JJM ka la lah ban pynpoi um ha man la ki thliew iing hapoh ka shnong. U la ong ruh ba ka jingim ka la pher namar ki la ioh ia ka um hala ki thliew iing. U la iathuh ruh ba mynta ka sngi ngi rakhe ia ka Gram-Sabha bad Samvad ban pynsah kynmaw ia ka sngi kha u Mahatma Gandhi bad ha kum kane ka sngi ngi pynkhuid ia ki iing ki sem, ki lynti synkien bad shnong ki thaw jongngi. U la bynrap ruh ba ka sorkar mynta ka thmu ban pynlong ia ki shnong na ka ODF sha ka ODF+ te namarkatta, ki paid nongshong shnong ki dei ban nang iaid bteng ia ka kam ban lehkhuid. U la ong ruh ka sorkar ka la ai ia ki skhim painkhana hynrei ki briew ki dei ban pynthikna ba ki painkhana ki long kiba treikam bad ba lyngba ka jingdon jong ka um ka la iarap ban lehkhuid leh suba ia ki painkhana. U la batai ruh shaphang ka solid bad liquid waste management da kaba ong ba ki niut ki lah ban kylla long pisa. U la ong ruh ba ka Swacch Bharat Mission ka la iarap ban kyntiew ia ka khuid ka suba ha ka imlang sahlang, ka ri bad ka jaitbynriew hi baroh kawei.

            Ha katei ka jingleit jurip la iadon lang u Bah R. Nongdhar, SDO, PHE, Mawkyrwat, ki nongtrei na ka tnad PHE, myntri shnong bad kiwei ki riewrangbah.