Mawkyrwat, Naiwieng 04, 2020: Ka ophis jong ka Assistant Labour Commissioner, South West Khasi Hills District (SWKHD), Mawkyrwat ha ka jingiatreilang bad ka ophis jong u District Manager, Common Service Centre (CSC), South West Khasi Hills District, Mawkyrwat mynta ka sngi ki la pynlong ia “ka prokram ai jinghikai bad ka jingpynrung kyrteng ia ki nongiohjingmyntoi lyngba ka skhim e-Shram” kaba la pynlong hapoh Iew Mawkyrwat. Ha katei ka prokram la kren ai khublei da u bah A. Marbaniang, Office Assistant, Labour Department, Mawkyrwat.
U bah J. Thongni, LDA, Labour
Department, Mawkyrwat uba la pyniaid ia katei ka jingialang u la batai janai
ruh shaphang ka skhim e-Shram. U la ong ba ka Ministry of Labour and Employment
ka la sdang ia ka e-Shram portal ha ka 26 tarik August, 2021 ban lum jingtip ia
baroh ki nongbylla sngi, ki ba trei na ki iing ki sem, kiba trei misteri, ki
nongdie madan, ki nongtrei bylla ha iing ki briew, ki briew ba trei ki kam rep
kam riang bad kiwei de ki jingtrei khnang ba kin dup lah ban ioh jingiarap na
ka sorkar. U la iathuh ba ki nongtrei bylla ba la 16 snem haduh 59 snem ka rta
ki bym pat long ki member jong ka EPFO, ESIC ne NPS ki lah ban pynrung kyrteng
ialade ha ka e-Shram. U la bynrap ba hadien ba ki briew ki la dep ban pynrung
kyrteng bad la ioh ia ka e-Shram Card ba don ia u unique Universal Account
Number (UAN) ki lah ban ioh ia ki jingiarap bapher bapher kum ki skhim na
social welfare, ka jingiarap na ka jinglynshop ka mariang, ka accidental
insurance policy kaba kot haduh T. 2 lak (ar lak tyngka) lada jia ba ki briew
ki kylla long anna shyrta ne duh noh iala ka jingim bad ki la ban ioh T. 1 lak
(shi lak tyngka) lada ki long anna malu mala. U la pyntip ruh ba na ka bynta
ban ioh ia ka insurance policy lyngba ka e-Shram ki nongioh jingmyntoi ki
donkam ban siew tang T.12 tyngka ha ka shisnem. U la batai ruh ba lyngba ka
e-Shram ka sorkar ka lah ban tip ia ka jingdon ki briew ba shu bylla sngi bad
lah ban thaw ki lad ki lynti ban ai kam ai jam ia ki ne ban pynmih ki skhim ban
iarap ia ki. U la iathuh ruh ba ki briew ki lah ban pynrung kyrteng ha ka
e-Shram da kaba ki leh hi na ki mobile ne computer ne da kaba ki leit sha ki
Common Service Centre (CSC) bad ki donkam ban rah ia u Aadhaar Number bad tip
ia u mobile number ba ki la register na ka bynta u Aadhaar number bad ruh ki
donkam ban ai ia u Bank Account Number. U la kyntu ia ki paid nongshong shnong
ba kin ia shim ia katei ka kabu ba ka sorkar ka la ai khnang ba kin ioh
jingmyntoi bad ba kin ym babe hadien habud. U bah J. Thongni, LDA, Labour
Department, Mawkyrwat u la pyntip ruh ba ka ophis jong ka Labour Department,
SWKHD, Mawkyrwat ka pynbna ba la plie mynta ka sngi ia ka e-Shram ha South West
Khasi Hills District.
U District Manager, CSC, Mawkyrwat,
bah Donkupar, u la batai shaphang ka Common Service Centre (CSC) bad u la ong
ba ka sorkar lyngba k Labour Department ka la ai bynta ia ki CSC ban iatrei
lang ban pynrung kyrteng ha ka e-Shram khnang ban pynsuk ia u paidbah nongshong
shnong kumjuh ruh ba kin pynpoi ia ka jingpynshai shaphang ka e-Shram sha ki
kyndong kynshrot jong ki shnong ki thaw haka district bad ka jylla baroh kawei.
U la kyntu ia ki briew ba kin shim ia ka jingiarap lyngba ka e-Shram ba kin ioh
ia ka jingmyntoi na ka bad ngim dei ban kyrngah namar ba ioh ngi khohreh hadien
ynda ka la poi u pud ba ngi donkam. U la ban ruh ba ki paidbah ki dei ban
register sha ka e-Shram bad shna ia ki Card namar kan sa don ka por ba kin sa donkam
ia ka e-Shram Card. U la batai ruh ba ka premium (ne ka jingsiew na ka bynta ka
e-Shram ka long tang T.1 tyngka (shi-tyngka) shibnai ne T.12 tynga (khat-ar
tyngka) shisnem te u la kyntu ba ki briew kim dei ban bynnud ban register na ka
bynta ka e-Shram namar kin sa ioh shibun ki jingmyntoi.
No comments:
Post a Comment