Pynkup bor ka sorkar ia ki tymmen ki san lyngba ki ain ki kanoon: ai jinghikai ka ophis DSWO ia ki riewtymmen ha Rangblang Sohynniang.

Mawkyrwat, Naiwieng 03, 2020: Ka ophis jong ka District Social Welfare Officer (DSWO), South West Khasi Hills District (SWKHD), Mawkyrwat mynta ka sngi ki la pynlong ia ka prokram ai jinghikai halor ki ain ki kanoon ba iadei bad ka jingpynbiang, ka jingpeit jingsumar bad ki lad jingshakri na ka bynta ka bha ka miat jong ki tymmen  ki san ( Maintenance and Welfare of Senior Citizens Act and Services available for Senior Citizens) kaba la pynlong hapoh St. Mary's Hall, Rangblang Parish, Rangblang Sohsynniang.

Ha ba kren ha katei ka sngi ka kong Ibanri Lyngkhoi, Advocate, Shillong Bar Association ka la kren halor ki ain ki kanoon ba iadei bad ka jingsumar, ka jingiada bad ka jingpeit ia ka bha ka miat ki tymmen ki kro (Maintenance and Welfare Senior Citizens Act) kiba la dap 60 snem ka rta shaneng. Ka la ong ba ki tymmen ki san ki don la ka hok ban ioh ka jingiada ym tang na ka sorkar hynrei na ki khun ki kti bad ka imlang sahlang. Ka la bynrap ba bunsien ki riewtymmen ki shah ñionbein, lehbeiñ, iehbeiñ, kim ioh ka bam ka dih ne ka kup ka sem kaba biang bad im ha ka jingsangsot bad jingkordit. Te ka la ong ba ka sorkar lyngba ka ‘Maintenance and Welfare of Parents and Senior Citizens Act 2007’ ka sorkar ka ai jingim ia ki riewtymmen kiba la shah iehbein ha la ki khun ki kti khamtam lei lei hadien ba ki la ioh ia ka ka bhah ka bynta jongki ba la ai da ki kmie ki kpa. Ka ka pynshai ba ki ki kmie ki kpa ki don ka hok ban ioh ia ka bam ka dih, ka kup ka sem, ka jingsumar ba biang, bad ban im da ka jingkmen hynrei lada ki khun kim niewkor bad ki lehbein ia ki ki lah ban ujor sha ki Maintenance Officer ne sha ka Iingkashari ban dawa ia ka hok ba kin ioh ka jingsumar kaba biang ka la bynrap ruh ba ki don ruh ia ka hok ba kin knieh ne shim biang ia ki bhah ki bynta ba ki la sam sha ki khun kum ki jingai sngewbha. Ka la iathuh ba ka Ain kan sa pynshitom da kaba set byndi bad dainkuna haduh T. 5000 (san hajar tyngka) ne kin ngat baroh ar. Ka la pyntip ruh ba ka kamram ban peit ia ki kmie ki kpa kam dei eh tang ki khun ba shong ba sah lang hynrei wat ki khun ba la don la ka iing ka sem, kiba trei shabar jylla bad ri ruh. Kumjuh ruh ka la ong ba katkum ka Riti Synshar ka ri India (Constitution) ha ka khyrnit ba 21 ka aibor ia ki riewtynmmen ba ki don ka hok ba kin ioh ia ka jingsumar ba pura, ba kin pyntip ia ka jingdonkam jongki, ban pan pisa na ki khun, ban leit shane sha tai ban kynduh ia ki paralok jongki, ban leit sha ki iing kashari ne sha ki ophis bapher bapher na ka bynta ki kam jongki. Ka la ong “ki tymmen ki kro ki dei u budlum ka imlang sahlang namar dei maki kiba la seng nongrim”. Te namarkata riewtymmen ki don ka hok ba kim dei ban ap line kumba ieng lem kiwei hynrei ki lah ban rung beit sha ki jaka ba donkam bad pyndep ia ki kam jongki, ki dei ruh ban ioh duna dor haba ki shong kali, bad ki don ka hok ban ioh ia ka jingbishar hok. Ka la iathuh ruh ba ka Sorkar ka thmu ba ha man la ka district ki dei ban don ki iing na ka bynta ki riewtymmen kiba shah iehnoh ha ki khun ki kti ne ki bym don khun bad ki dei ban ioh ia ka jingsumar ba pura. 

Ka kong B.Wanniang, Supervisor, DSWO, Mawkyrwat ka la kren halor ka phang “ki skhim ba ki riewtymmen ki lah ban ioh (Schemes available for Senior Citizens)”. Ka la iathuh ba katkum ka khana samari, 2011 ka jingdon ki briew ba la noh ka rta, katta 60-69 snem ha ka jylla Meghalaya ka long 1, 38, 279 ngut bad katkum ka jinglap ki stad wat jingtip 12 ngut na man la ki 100 ngut ki tymen ki san ki sa kynjoh palat ia ka 60 snem ka rta ha u snem 2030. Ka la iathuh ba ki don saw tylli ki jongdonkam ba kongsan eh ia ki long tymmen longsan bad kita ki long ka ioh ka kot, ka jingim ba donburom, ka jingbam-jingdih bad ka jingsumar sukher ha ka koit ka khiah, bad ka jingiadei para-briew. Ka la ong ba ka Sorkar Pdeng bad ka Sorkar Jylla ki sngewthuh shai ia ki jingdonkam jongki bad ki buh ki skhim bapher bapher kum ka Integrated Programme for Senior Citizen ba kynthup ia ka jingpynbiang ia ki iing sumar tymmen ban sumar 25 ngut, 50 ngut ne ban sumar ia 50 ngut ki riewkynthei ba la tymmen (Maintenance of Senior Citizens Home for 25, 50 or specifically for 50 elderly women), ki jaka sumer linter ia ki longsan kiba shitom na ka jingpang Alzheimer, ka Rashtriya Vayoshri Yojana (RVY) ban ai ia ki jingiarap kum ki wheel chair, ki tiar shkor ban iohsngew, ki dieng duh, ki bniat ba shu buh (dentures) bad ki iitkhmat, kumjuh ruh ki don ki ki Helpline number ban ai jingiarap ia ki riewtymmen. Ka la ong ruh ba ka jingrakhe ia ka sngi kyrpang ki tymmen ki san ba ju pynlong shisien shisnem ha ka 1 tarik Risaw ka long kawei ka lad ban ai jingtip bad pynsngewthuh ia ka jingkordor ki tymmen ki san. Ka la iathuh ba ki skhim na ka Sorkar Jylla ki kynthup ia ka Chiej Minister Social Assitance Skhim ba ki ju ioh T. 500 (sansphah tyngka) man la u bnai, ka jingiarap pisa ban sumar ia ki ba la tymmen kaba long T. 2200 tyngka shi jingim, ka jingai jingiarap (Grant-in-Aids) ia ki sengbhalang (NGOs) kiba trei na ka bha ka miat ban buh kum ki jaka sumar ia ki riewtymmen, ka ai jingiarap lyngba ka State Action Plan sha ki sengbhalang (NGOs) kiba buh ia ka jaka sumar mynsngi (Day Care Centre) bad ai jingiarap ia ki NGO kiba pynlong ia ki prokram ai jingtip ba iadei bad ki riewtymmen. Ka la khot la wer ia ki seng bhalang ne ki seng mon trei sngewbha ba kin mih shakhmat bad shim ia ki lad jingiarap ka sorkar ban sdang ki iing ai jingiarap na ka bynta ki tymmen ki san namar ki long ka bynta ba kordor ha ka imlang sahlang.

U bah Yesterland Dkhar, Myntri Shnong Rangblang Sohsynniang u la pdiang sngewbha ia baroh bad pynpaw ka jingsngewnguh ia ka ophis DSWO ba ki la pynlong kum katei ka porkram. U la batai ruh khyndiat shaphang ki skhim ba iadei bad ki riewtymmen bad u la kyntu ia baroh ki riewtymmen ba kim dei ban shu ia thnum ia kaei kaba kim ioh hynrei ki dei ban pyntip sha ki sordar shnong bad ban leit mih sha ka ophis ban ioh ia ki jingiarap.

Ha katei ka prokram ba la pyniaid da ka kong H. Sahkhar, CDPO I/c DSWO, SWKHD, Mawkyrwat ka la don ruh ka drama na ka Ïonglajong Sports & Cultural Organisation, Mawlangwir, Ka jingsam iaki kot lyngkdop ba iadei bad ki skhim na ka bynta ki riewtymmen, bad la kren ai khublei da ka kong P.L Lyngkhoi, LDA, DSWO, SWKHD, Mawkyrwat.