Plie u Myntri ka tnad PHE ia 3 tylli ki skhim sorkar ha Jakrem

Mawkyrwat, Naiwieng 05, 2021: U Myntri ka tnad PHE jong ka Sorkar Meghalaya u Bah Renikton Lyngdoh Tongkhar u ba long ruh u MLA jong ka Mawkyrwat Constituency u la plie pyrda mynta ka sngi ia 3 tylli ki skhim sorkar hapoh ka shnong Jakrem ba kynthup ia ka Community Hall, ka skhim surok bad ka skhim um jong ka Shnong Jakrem mynta ka sngi ha ka jingiadonlang ka kong C. Kharkongor IAS, Deputy Commissioner, South West Khasi Hills District, Mawkyrwat, ki ADC, u BDO, ki ophisar na ki department bapher bapher jong ka District bad ki paidbah jong ka shnong ha ka jingialang ba la pynlong ha Madan Pyndenkseh, Jakrem. 

Haba kren ha katei ka sngi u Bah Renikton Lyngdoh Tongkhar u la ong ba ka long ka sngi ban sah jingkynmaw ia ka shnong ka thaw ba ka sorkar ka aiti ia 3 tylli ki skhim sha u paidbah ba kin long trai. U la ban ba ka jinglongtrai ia kitei ki skhim pynroi ka long jong man la ki longiing jong ka shnong Jakrem te namarkatta, ki donkam ban ieid bad sumar bhai a baroh kum ki jingdon jingem jongki hi. U la ong ba ka jingiatrei lang jong ki shnong bad ka Sorkar ka la wanrah ia ka jingjop ha kiba bun ki liang hapoh ka shnong ka thaw. U la ong ba ka jingiatylli jong ka shnong Jakrem ka long ka nuksa ia ka ri bad ka jaitbynriew. U la bynrap ba hapoh shnong Jakrem ka kam politik kam lah ban pyniapait ne pynsniewdur ia ka shnong ka thaw namar ba ki nongialam shnong ki buh ia ki kam ka shnong ka thaw ne ia ki kam balang hakhmat eh ym ia ka kam politik. U la ban ruh ba ki khun samla ki dei ban peit ia ka nuksa ba bha ba ki nongialam ki pynpaw ha ki bad kin bud bad pyrto hadien habud. U la ong ba ka shnong Jakrem ka la ai ia ka memorandum ha u namar ka pynpaw ba ki kam ka roi ka par kim ju kut bad ki dei ban nang iai bteng na ka por sha ka por. U la bynrap ba katba ki nongialam shnong ki dang iai trei bha, kin nang iai pan na ka bynta ka bha ka miat bad ka roi ka par bad dei tang ynda ki briew ne ki rangbah nongtreikam shnong kim treikam shuh ka la kut ka jingpan. U la iathuh ruh ba ka thong ka sorkar ka long ban pynpoi um lut ha man la ki thliew iing ha ki shnong ki thaw hapoh u snem 2022 ha ka jylla Meghalaya.

Ka kong Caramai Kharkongor, IAS, Deputy Commissioner, SWKHD ka la kren shapphang ka jingdonkam bad myntoi jong kitei ki 3 tylli ki skhim ka sorkar. Ka la ong ka um ka long kaba kongsan ha ka jingim jongngi bad ngi dei ban pyndonkam bha bad tyngkai ia ka. Ka la kyntu ia ki khynnah skul ba kin pynmlien ban dih um shibun namar kan pynkhuid ia ka met ka phad jongngi. Ka la ong ruh ba mynta ka um ka la poi sha ki tynkong iing jongngi te ki paidbah nongshong shnong ki dei ban pyndonkam hok ia ka. Haba kren shaphang ka surok ka la ong ba ka sorkar ka ai ia ka surok ban pynsuk ia ka leit ka wan, ka kit ka bah ha ki shnong ki thaw. Ha ka jingkren shaphang ka Community hall ka la ong ba ka community hall ka long kaba donkam bha ha ka shnong ka thaw ban ia kynduh lang bad pynlong ia ki prokram bapher bapher. Ka la bynrap ba ka long ruh ka jaka ba ki ophis bapher bapher ki donkam ia ki community hall ban ai training ne ban pynlong prokram. Te ka la kyntu ia ki paidbah nongshong shnong ba kinsumar bad burom ia ki bad ki dei ban sngew ba ki dei ki tiar lajong. Ka pynkut da kaba ong ba ki shnong kiba stad ki sumar bha ia ki tiar ki tar bai oh na ka sorkar na ki skhim bapher bapher khnang ba ki jingmyntoi kan long ia ka shnong hi.

Ha katei ka jingialang ba la pyniaid da u Bah L. K Diengdoh, MCS, EAC, Mawkyrwat bad BDO, C&RD Block Mawkyrwat la ioh ruh ka jingkren na u bah M. Mawroh, EE, PWD (Rds), Mawkyrwat, Bah S. Nongdhar, SDO, PHE, Mawkyrwat, Bah D. Kharjahrin, Executive Member, ka shnong Jakrem, Bah P. Wahlang, Myntri shnong Jakrem, bad na u Rev. P. Nongsiej, Pastor i/c Balang Jakrem. Ka la don ruh ka jingrwai pdiang sngewbha na ka Jakrem Presbyterian Higher Secondary, School, Jakrem bad ka jingpynbyrngia na ka Ionglajong Cultural Group, Mawlangwir. Ia ka jingkren pdiang sngewbha la leh da u Bah H. A. Nongrem, Headmaster, Jakrem Presbyterian Higher Secondary, School, Jakrem bad ia ka jingkren ai khublei la pyndep da u bah J. K. Lyngdoh, Secretary shnong Jakrem.